VANĠELU: Min qed jaħdem, jew min hu sinjur, ma tantx iħabbel rasu x’se jiekol u jilbes għada. Imma min m’għandux għaxja ta’ lejla? Ġesu qed jgħidilna ngħalqu għajnejna quddiem il-faqar li hawn fid-dinja? Żgur li le. L-anqas qed jgħidilna biex nitolbu l-Missier biex isolvilna dil-problema f’ħakka t’għajn. Alla jrid li aħna rridu nifhmu li, wara li hu jipprovdi ġid għal kulħadd, irridu naraw aħna kif se nagħmlu biex dal-ġid jinqasam ġustament bejn kulħadd. Allura Ġesu qed jgħidilna “Tħabblux raskom….”? Ġesu qed isemmi żewġ affarijiet essenzjali għall-ħajja bijoloġika tal-bniedem:
- L-ikel hawn ifisser ħobż, job, dar, saħħa, għerf, imħabba. Ġesu mhux qed jgħid li dawn kollha mhumiex essenzjali għall-bniedem imma li m’għandniex inħabblu rasna fuqhom.
- L-ilbies ifisser ħwejjeġ, kif nidher quddiem in-nies, ma’ liema kategorija (klassi?) jien nagħmel parti, x’relazzjonijiet għandi u x’nixtieq li jkolli. L-ilbies, mela, jassigura l-ħajja soċjali tiegħi.
Mela, jekk jien qed infittex dan kollu b’ħafna ansjeta’, ifisser li hemm xi ħaġa fija li qed tfixkel l-ekwilibriju interjuri tiegħi. Ġesu qed jgħidli: “Ara u għaraf x’inhi dil-ħaġa, biex teħles minnha u b’hekk tkun tista’ terġa’ tikseb l-armonija u l-paċi miegħek innifsek u mal-oħrajn.”
“Ma tistax isservi żewġ sidien”. Ġesu u l-flus jagħtu ordnijiet opposti. “Il-flus” jordnawlek biex takkumula, tisraq (robbing, cheating), tidħak bl-oħrajn, eċċ. Ġesu jgħidlek: “Ħobb il-proxxmu u aqsam ġidek miegħu.” “Mammona” hija kelma bl-Aramajk li parti minnha tfisser “fiduċja” , i.e. dawk li jqiegħdu l-fiduċja tagħhom kollha fil-flus. Jien irrid nagħmel għażla: Ġesu jew mammona. Elija darba qal lill-Lhud: “Tridu tagħżlu: jew Alla jew Baal” (Slaten 18). Għax Alla għajjur u ma jrid lil ħadd jieħu anki biċċa żgħira mill-qalb tal-bniedem. Ir-raġunar ta’ xi Lhud kien perikoluż: “Nagħtu xi ħaġa lil Alla talli ħelisna mill-jasar, imma lil Baal ma nħalluhx b’xejn għax hu alla tal-fertilita.” Xi Nsara jagħmlu l-istess. Jobdu l-liġi u l-Kelma t’Alla sa ċertu punt. Imbagħad jinkwetaw fuq ħafna ħwejjeġ materjali, u jinsew li l-uniku ċentru tal-imħabba tagħhom għandu jkun Alla. Ġesu qed jitkellem fi żmien meta kien hemm sinjuruni u foqra. Lill-foqra qed jgħid: “Tippreokkupawx ruħkom iżżejjed.” Ma jfissirx li ma jokkupawx ruħom u jistgħu jitgħażżnu. Ġesu jridna nagħmlu dawn ir-riflessjonijiet:
- L-ikel u l-ilbies huma mportanti għall-ħajja bijoloġika, imma m’humiex kollox. Mela, meta nitilfu rasna fuq l-ikel u l-ilbies materjali nkunu qed nagħmluhom l-għan aħħari ta’ ħajjitna.
- “Ħarsu lejn l-għasafar tal-ajru; la jiżirigħu u l-anqas jaħsdu; imma Missierkom jieħu ħsiebhom.” Ma qalx “għamlu bħalhom”. L-anqas qal “missierhom” imma “Missierkom”. “Hekk qed jieħu ħsiebkom ukoll biex timxu fil-ħajja”. Mela, meta jien inħabbel rasi żżejjed fuq l-għixien inkun qed nuri li m’inhix konvint mill-Provvidenza tal-Missier li qed jieħu ħsiebi, jinteressa ruħu l-ħin kollu fija u jqis li jien niswa’ ħafna aktar minn għasfur. In-Nisrani li jafda fil-Provvidenza t’Alla jagħmel l-almu tiegħu biex jaħdem, jaqla’ l-għixien, u jonfoq il-flus bil-għaqal. Mill-bqija ma jħabbilx rasu żżejjed, għax min jagħmel hekk jirriskja li jagħmel xi għażliet ħżiena fil-ħajja tiegħu.
- Il-ħajja f’did-dinja għandha limitu. Bil-flus kollha li se takkumula taħseb li tista’ ttawwal għomrok? Hawn min hu tant iffissat fuq hekk li jinxjurja kollox, għax min għalih li se jgħix f’did-dinja għal dejjem. Min hu hekk ikun tilef is-sens ta’ direzzjoni fil-ħajja. U xi ngħidu għas-sinjurun li tant għandu ġid li l-anqas jaf x’se jaqbad jagħmel bih. Jgħix bil-biża’ li se jisirquh allura jagħmel burglar alarms ma’ kullimkien! Il-ġid għalih sar inkwiet li qed jisraqlu l-ferħ u l-paċi ta’ qalbu. Dan hu li Ġesu ma jixtieqx li jiġri lin-Nisrani.
- Rigward l-ilbies: “L-anqas Salamun ma kien jilbes bħal wieħed minn dawn il-ġilji”. (Aktarx Ġesu kien f’xatt qrib Kafarnaum, fejn ipassu ħafna għasafar u l-għelieqi kienu miżgħuda b’ħafna fjuri). “Mela jekk Alla jlibbes imqar ħaxixa selvaġġa li llum hawn u għada tinxteħet fil-forn, kemm aktar lilkom!”
- “Mela fittxu l-ewwel is-Saltna u l-ġustizzja tiegħu, u dan kollu jingħatalkom ukoll.”
Sors: lachiesa.it/liturgia/omelie/fr fernando armellini