L-Erbgħa, 27 ta’ Settembru 2017: L-Arċisqof Charles J. Scicluna llum ħalla Malta għal Minsk, il-Belarussja, biex jieħu sehem fl-assemblea plenarja tal-Kunsill tal-Konferenzi Episkopali Ewropej (CCEE). Għal din il-laqgħa se jattendu l-isqfijiet minn 45 pajjiż fil-kontinent Ewropew.
It-temi ewlenin ta’ din l-assemblea huma ż-żgħażagħ u l-Ewropa. F’Minsk, l-isqfijiet ser jiddiskutu l-aspettattivi, il-bżonnijiet, ix-xewqat, il-biżgħat u r-relazzjonijiet taż-żgħażagħ fid-dinja tal-lum, kif ukoll l-isfidi tal-Knisja biex twassal il-messaġġ pastorali tagħha liż-żgħażagħ. L-assemblea plenarja f’Minsk se twitti t-triq għas-Sinodu tal-Isqfijiet dwar iż-żgħażagħ, li ser isir is-sena d-dieħla f’Ruma. L-isqfijiet se jaqsmu wkoll l-esperjenzi u l-ideat tagħhom dwar kif il-Knisja xxandar l-Evanġelju filwaqt li tgħin biex tikber l-għaqda fl-Ewropa.
L-Assemblea Plenarja tintemm il-Ħadd, l-1 ta’ Ottubru 2017, biċ-ċelebrazzjoni tal-Quddies
immexxi mill-isqfijiet, f’diversi parroċċi fil-belt ta’ Minsk.