Il-Ħamis 19 ta’ April 2018: Kif ġa ħabbarna jumejn ilu mis-sit Laikos (www.laikos.org) Mons. Arċisqof Charles J. Scicluna u Mons. Isqof Mario Grech se jieħdu sehem fil-Mixja favur il-Ħajja li se ssir nhar il-Ħadd li ġej 22 ta’ April 2018, u li qed tkun organizzata minn LifeNetwork. It-tema hi: Embrijun wieħed minna.
F’ittra ffirmata mill-Vigarju Ġenerali tal-Arċidjoċesi ta’ Malta, l-Isqfijiet Maltin iħeġġu lil-lajċi, saċerdoti u persuni ta’ ħajja kkonsagrata biex jissieħbu magħhom f’din il-manifestazzjoni li għandha skop wieħed: li l-ħajja tiġi mħarsa sa mill-ewwel mument tat-tnissil tagħha. Għandu jsir avviż dwar dan fil-quddies tas-Sibt 21 ta’ April filgħaxija u tal-Ħadd 22 ta’ April filgħodu.
L-Isqfijiet iħeġġu wkoll lill-komunitajiet tal-Knisja f’Malta biex jitolbu għall-ħarsien u l-protezzjoni tal-ħajja, u biex dawk li għandhom ir-responsabbiltà għal-liġijiet “verament iħarsu l-ħajja u d-dinjità umana u ma jagħmlu xejn li jkasbar id-drittijiet tal-ulied”, kif appellaw l-Isqfijiet fl-Istqarrija li huma ħarġu erbat ijiem ilu.
Aktar tard konna nfurmati li anke l-Arċisqof Emeritus Mons. Pawlu Cremona OP ser ikun qed jieħu sehem fil-manifestazzjoni favur i-ħajja.
Ara aktar favur il-ħajja umana … http://www.laikos.org/tvl4life.htm