Il-Ħamis, 4 ta’ Diċembru 2014: Jeżistu bosta qaddisin moħbija: nisa, missirijiet u ommijiet ta’ familja, morda, saċerdoti li ta’ kuljum iqiegħdu fil-prattika l-imħabba ta’ Ġesù. Dan kollu jnissel it-tama, qal il-Papa Franġisku dalgħodu waqt il-quddiesa fil-kappella tad-Dar Santa Marta.
Il-veru Nisrani hu dak li jqiegħed fil-prattika l-Kelma t’Alla. Mhux biżżejjed li ngħidu li għandna l-fidi. Fil-kummenti dwar il-Vanġelu tad-dar mibnija fuq il-blat jew fuq ir-ramel, il-Papa Franġisku jistedinna biex ma nkunux Insara tal-apparenza, Insara bil-makeup, għax appena tinżel ftit xita, il-makeup jgħib.
Mhux biżżejjed li nkunu niffurmaw parti minn familja Kattolika ferventi, jew minn xi assoċjazzjoni, jew li nkunu benefatturi, jekk ma nimxux skont ir-rieda ta’ Alla. Hemm tant Insara tal-apparenza, osserva l-Papa, li jiġġarrfu mal-ewwel tentazzjoni, għax fihom m’hemmx sustanza, bnew fuq ir-ramel.
Iżda mbagħad hemm ħafna qaddisin fil-‘poplu t’Alla’ – mhux bilfors kanonizzati, imma qaddisin – tant nisa u rġiel li jqiegħdu fil-prattika l-imħabba ta’ Ġesù. Tant minnhom! Huma bnew darhom fuq il-blata li hi Kristu.
Naħsbu ftit f’dawk li huma l-iżgħar, qal Franġisku, il-morda li joffru t-tbatijiet tagħhom għall-Knisja, għall-oħrajn. Naħsbu ftit f’tant anzjani waħedhom, li jitolbu u joffru. Naħsbu ftit dwar tant ommijiet u missirijiet li jmexxu l-familja b’tant sagrifiċċji biex jedukaw lil uliedhom, bix-xogħol ta’ kuljum, bil-problemi, imma dejjem bit-tama f’Ġesù; ma jiddandnux imma jagħmlu dak li jistgħu.
Dawn huma l-qaddisin tal-ħajja ta’ kuljum, esklama l-Papa. Naħsbu ftit dwar tant saċerdoti li ma jidhrux imma jaħdmu fil-parroċċi tagħhom b’tant imħabba: il-katekiżmu lit-tfal, il-kura tal-anzjani, tal-morda, it-tħejjija tal-għarajjes għaż-żwieġ… U kuljum l-istess, l-istess rutina. Ma jiddejqux għax il-pedament tagħhom jinsab fuq il-blat. Huwa Ġesù. Dan jagħti l-qdusija lill-Knisja, u dan inissel it-tama!
Jeħtieġ li naħsbu ħafna dwar din il-qdusija moħbija li għandna fil-Knisja, afferma Franġisku, Insara li jibqgħu f’Ġesù. Midinbin, eh? Ilkoll aħna midinbin. U xi kultant dawn l-Insara jaqgħu f’xi dnub kbir, imma jindmu, jitolbu maħfra. U din hi ħaġa kbira: il-ħila li nitolbu maħfra, li ma nħalltux id-dnub mal-virtù, li nkunu nafu sewwa fejn hi l-virtù u fejn hu d-dnub. Dawn in-nies huma mibnijin fuq il-blat, il-blata li hi Kristu. Jimxu fit-triq ta’ Ġesù, jimxu warajH.
Is-suppervi, il-vanitużi, l-Insara tal-apparenza – saħaq il-Papa – għad ikunu mirbuħa, umiljati, filwaqt li l-foqra se jkunu dawk li jittrijonfaw: il-foqra fl-ispirtu, dawk li quddiem Alla jħossu x-xejn tagħhom; l-umli, li jimxu lejn is-salvazzjoni għax iqiegħdu fil-prattika l-Kelma tal-Mulej.
Illum hawn u għada m’aħniex, żied il-Papa, li kkwota lil San Bernard li qal: ‘Aħseb, bniedem, x’għad jiġri minnek: ikel għad-dud.’ Jikluna d-dud, ilkoll kemm aħna, fakkar il-Papa. Jekk ma jkollniex din il-blata, nispiċċaw mirfusin.
F’daż-żmien ta’ tħejjija għall-Milied nitolbu lill-Mulej li nkunu b’saqajna fuq il-blata li hi Hu. It-tama tagħna hi Hu. Aħna lkoll midinbin, aħna dgħajfin, imma jekk inqiegħdu t-tama tagħna fiH, inkunu nistgħu nimxu ’l quddiem.
Dan hu l-ferħ tan-Nisrani: li jaf li fiH hemm it-tama, hemm il-maħfra, hemm il-paċi, hemm il-ferħ. U ma nqegħdux it-tamiet tagħna f’affarijiet li llum hawn u għada jispiċċaw.
Ħajr lill-Kamra tal-Aħbarijiet ta’ Radju Marija, Rabat, Malta