Il-Ġimgħa, 3 ta’ April 2020: Hawn min minn issa qed jaħseb f’dak li għad irid jiġri wara l-pandemija: il-problemi kollha li se jinqalgħu… problemi ta’ faqar, ta’ xogħol, ta’ ġuħ. Nitolbu għan-nies kollha li qed jgħinu llum, imma qed jaħsbu wkoll dwar għada, biex ikunu ta’ għajnuna għalina lkoll.
Omelija
F’dan il-jum tal-Ġimgħa tal-Passjoni, il-Knisja tfakkar lil Marija Addolorata. Hija devozzjoni tal-poplu t’Alla li ilha sekli sħaħ. Inkitbu innijiet ad unur tal-Addolorata: kienet f’riġlejn is-salib u jikkuntemplawha hemmhekk, fit-tbatija. Il-pjetà nisranija ġabret dan in-niket tal-Madonna u titkellem dwar ‘is-seba’ duluri’. L-ewwel dulur jeħodna 40 jum wara t-twelid ta’ Ġesù, il-profezija ta’ Xmun li jgħidilha li sejf għad jinfdilha qalbha (cf. Luqa 2, 35). It-tieni dulur ifakkar il-ħarba lejn l-Eġittu biex issalva l-ħajja ta’ Binha (cf. Mt. 2, 13-23). It-tielet dulur huma dawk it-tlett ijiem ta’ qtigħ il-qalb meta t-tifel baqa’ fit-tempju (cf. Lq 2, 41-50). Ir-raba’ dulur huwa meta l-Madonna tiltaqa’ ma’ Ġesù fit-triq tal-Kalvarju (cf. Ġw. 19, 25). Il-ħames dulur tal-Madonna huwa l-mewt ta’ Ġesù, hi u tara lil Binha msallab, għeri, qed imut. Is-sitt dulur huwa l-inżul ta’ Ġesù minn mas-salib, mejjet, u tħaddnu kif kienet refgħetu aktar minn tletin sena qabel f’Betlem. Is-seba’ dulur huwa d-difna ta’ Ġesù.
Hekk, il-pjetà nisranija timxi dit-triq tal-Madonna hi u takkumpanja lil Ġesù. Lili jagħmilli tajjeb, filgħaxija tard, meta nkun qed ngħid l-Angelus, li nikkontempla dawn id-duluri bħala memorja ta’ Omm il-Knisja li b’tant tbatija welldet lilna lkoll.
Il-Madonna qatt ma talbet xejn għaliha, qatt. Għall-oħrajn, iva: niftakru f’Kana. meta marret tkellem lil Ġesù. Qatt ma qalet: ‘Jiena l-omm, ħarsu lejja: se nkun ir-reġina omm.’ Qatt ma qalet xejn minn dan. Ma talbet ebda privileġġ għaliha personali fi ħdan il-kulleġġ appostoliku. Kulma tagħmel hu li taċċetta biss li tkun Omm. Akkumpanjat lil Ġesù bħala dixxiplu, għax l-Evanġelju jurina li kienet issegwih: kienet issegwi lil Ġesù, tisma’ lil Ġesù, ma’ ħbiebha, nisa twajba. Darba minnhom xi ħadd għarafha: ‘Hawn hi ommok’, ‘Ommok tinsab hawn’ (cf. Mk. 3, 31). Tinsab hemm, bilwieqfa… Żgur li n-nies kienu jgħidu: ‘Imsejkna mara, kemm għad issofri.’ U l-ħżiena żgur kienu jgħidu: ‘Imma hi għandha tort ukoll għax kieku rabbietu kif suppost ma kienx jispiċċa fiex spiċċa.’ Kienet hemm, ma’ Binha, mal-umiljazzjoni ta’ Binha.
Nagħtu ġieħ lill-Madonna u ngħidu: ‘Din hi Ommi,’ għax hija Omm. Dan hu t-titlu li rċeviet, proprju hemmhekk, fil-ħin tas-Salib (cf. Ġw. 19, 26-27). ‘Uliedek, inti Omm.’ M’għamilhiex prim ministru jew taha xi titli, xi inkarigi. ‘Omm’ biss. U mbagħad l-Atti tal-Appostli jippreżentawhielna titlob flimkien mal-Appostli bħala Omm (cf. Atti 1, 14). Lil Ġesù l-Madonna ma riedet teħodlu ebda titlu; irċeviet id-don li tkun Ommu u d-dmir li takkumpanja lilna bħala Omm, li tkun l-Omm tagħna. Ma talbitx biex tkun ‘kważi-redentriċi’ jew ‘ko-redentriċi’, le. Il-Feddej huwa wieħed u dat-titlu ma jirduppjax ruħu. Dixxiplu u Omm biss. U hekk għandna niftakru fiha aħna; hekk għandna nfittxuha, nitolbuha. Hija l-Omm fil-Knisja Omm. Fil-maternità tal-Madonna naraw il-maternità tal-Knisja li tilqa’ lil kulħadd, tajbin u ħżiena: lil kulħadd.
Illum ikun tajjeb jekk nieqfu ftit naħsbu dwar in-niket u d-duluri tal-Madonna. Hija Ommna. U dwar kif kellha ħila tissaportihom, bil-qawwa, bil-biki: ma kienx biki falz, kienet proprju l-qalb mifnija bin-niket.
Jagħmlilna tajjeb nieqfu ftit biex lill-Madonna ngħidulha: ‘Grazzi li aċċettajt tkun Omm meta ħabbarlek l-Anġlu u grazzi talli aċċettajt li tkun Omm wara li ħatrek Ġesù.’
Miġjub għall-Malti mit-Taljan minn Joe Huber.