It-Tnejn, 16 ta’ Diċembru 2019: Fl-omelija li għamel il-Papa Franġisku illum, fil-kappella tad-Dar Santa Marta, huwa fisser żewġ atteġġjamenti tal-Insara bierda: l-atteġġjamenti tas-saċerdoti ma’ Ġesù fit-tempju, li qiegħdu lil Alla f’rokna u jfarfru jdejhom minnu. Dawn huma perikolużi, ikkummenta l-Papa, għax ara x’ikun ir-riżultat kieku Hu jagħmel hekk magħna.
Dan l-atteġġjament huwa sfida lil Alla. Kieku l-Mulej iqiegħed lilna f’rokna, qatt ma jirnexxilna nidħlu l-ġenna. Jaħbtilna ħażin kieku Hu jfarfar idejh minna.
Fl-omelija mnebbħa mill-Evanġelju ta’ San Mattew, il-Papa Franġisku rrifletta dwar id-djalogu bejn Ġesù u s-saċerdoti li staqsewh b’liema awtorità kien qed jgħallem fit-tempju.
Ġesù kien iqanqal in-nies, ifejjaqhom, kien jgħallem u jagħmel il-mirakli. Dan kien imeżmeż lill-kapijiet tas-saċerdoti għax il-ħlewwa u d-dedikazzjoni tiegħu kienu jiġbdu n-nies lejh.
Filwaqt li lilhom, lill-uffiċjali, in-nies kienu jirrispettawhom, imma ma kinux jersqu lejhom għax ma kellhomx fiduċja fihom.
Għalhekk is-saċerdoti ftiehmu biex lil Ġesù jonsbuh. Jistaqsuh b’liema awtorità kien qed jagħmel dak kollu; Hu li ma kienx saċerdot, duttur tal-Liġi, ma studjax fl-universitajiet tagħhom. Għalihom Ġesù ma kien xejn.
Bid-dehen tiegħu, Ġesù jwieġeb b’mistoqsija oħra li tqiegħed lilhom f’nasba. Staqsiehom jekk Ġwanni l-Battista kienx jgħammed b’awtorità ġejja mis-sema, minn Alla, jew mill-bniedem.
San Mattew itina deskrizzjoni ta’ kif bdew jirraġunaw bejniethom: jekk ngħidulu mis-sema, jistaqsina għaliex ma emminniex; jekk ngħidulu li mill-bniedem, nispiċċaw minn taħt aħna. Allura jaħslu jdejhom u jgħidulu li ma jafux.
Dan hu l-atteġġjament – osserva l-Papa – tan-nies medjokri, ta’ min jgħix il-fidi f’gidba.
Mhux Pilatu biss ħasel idejh, dawn ukoll għamlu bħalu. Ma ridux jidħlu fl-istorja tal-bnedmin, ma ridux jerfgħu r-responsabbiltà tal-problemi, jitqabdu biex jagħmlu l-ġid, biex ifejqu tant nies fil-bżonn tal-fejqan…. Aħjar inżommu ’l bogħod….
Għalhekk Ġesù jwieġeb bl-istess ton: ‘Lanqas jien ma jien se ngħidilkom b’liema awtorità qed nagħmel dan.’
Dawn huma l-atteġġjamenti tal-Insara bierda, bla konsistenza. Atteġġjament li bih lil Alla nqegħduh f’rokna: ‘Jew tagħmel dak li rrid jien, inkella ma mmurx aktar il-knisja.’ U Ġesù jwieġeb: ‘Mur, mur, irranġa!’
L-atteġġjament l-ieħor tal-Insara bierda hu li jfarfru jdejhom bħalma għamlu d-dixxipli ta’ Għemmaws dakinhar tal-qawmien mill-imwiet filgħodu. Jaraw lin-nisa ferħanin għax kienu raw lill-Mulej, imma ma jafdawx…. għax in-nisa għandhom ħafna fantasija! Ifarfru jdejhom u b’hekk jidħlu fil-fratellanza ta’ Pilatu!
Quddiem l-isfidi tal-kultura, l-isfidi tal-istorja, l-isfidi tan-nies ta’ żmienna, anke quddiem l-iċken sfidi, ħafna Nsara jfarfru jdejhom. Kemm drabi nisimgħu bi Nsara li jixxaħħu quddiem persuna li tkun titlob il-karità, ma jagħtu xejn bl-iskuża li l-flus jistgħu jintużaw ħażin. Jirraġunaw li aħjar ma ttihom xejn …. bl-iskuża tas-sokor. ‘Imma dan bil-ġuħ!’ Affarih, jien ma rridux jisker! Din l-iskuża nisimgħuha spiss.
Li nitfgħu lil Alla f’rokna u li naħslu jdejna huma atteġġjamenti perikolużi għax b’hekk inkunu qisna qed nisfidaw lil Alla. Naħsbu ftit x’jiġri kieku Ġesù kellu jimxi magħna hekk, kieku kellu jitfagħna f’rokna. Kieku qatt ma nidħlu l-ġenna! U x’jiġri kieku l-Mulej jaħsel idejh minna? Imsejknin aħna!
Dawn huma żewġ atteġġjamenti ipokriti tan-nies ‘edukati’. ‘Le, dan le, ma nindaħalx.’ Lin-nies inqegħidhom f’rokna għax maħmuġin, jien naħsel idejja minnhom għax affarihom.
Neżaminaw ftit jekk fina hemmx xi ftit minn dawn l-atteġġjamenti, u jekk hemm inwarrbuhom minn ġo fina biex nagħmlu wisa’ għall-Mulej li ġej.
Miġjub għall-Malti mit-Taljan minn Joe Huber