L-Erbgħa, 29 ta’ April 2020: Illum il-festa ta’ Santa Katarina ta’ Siena, Duttur tal-Knisja, Patruna tal-Ewropa. Nitolbu għall-Ewropa, għall-għaqda tal-Unjoni Ewropea: biex ilkoll flimkien nibqgħu mexjin ’il quddiem bħall-aħwa.
Omelija – Il-konkretezza u s-sempliċità taż-żgħar
Fl-ewwel Ittra ta’ San Ġwann insibu ħafna kuntrasti: bejn id-dawl u d-dlam, bejn il-gideb u l-verità, bejn id-dnub u l-innoċenza (cfr. 1 Ġw. 1, 5-7). Imma l-appostlu dejjem jistieden il-konkretezza, il-verità, jgħidilna li ma nistgħux inkunu f’għaqda ma’ Ġesù u fl-istess ħin nimxu fid-dlam, għaliex Huwa d-dawl. Jew ħaġa jew oħra: il-griż huwa agħar: itik impressjoni li miexi fid-dawl għax m’intix fid-dlam u dan iserrħek. Il-griż hu traditur kbir. Jew ħaġa jew oħra.
L-appostlu jkompli: ‘Jekk ngħidu li ma għandniex dnub, inqarrqu bina nfusna u s-sewwa ma jkunx fina’ (1 Ġw. 1, 8), għax ilkoll dnibna, ilkoll midinbin. Hawnhekk hawn ħaġa li tista’ tqarraq bina: ngħidu ‘aħna lkoll midinbin’, qisna qed ngħidu ‘bonġu’, ‘il-jum it-tajjeb’, qisha drawwa, xi ħaġa soċjali, m’għandniex kuxjenza vera ta’ x’inhu d-dnub. Le: jiena midneb għal dan, minħabba f’hekk, minħabba f’hekk. Il-konkretezza. Il-konkretezza tal-verità. Il-verità dejjem hi konkreta; il-gideb hu fl-ajru, arja, ħaġa li ma tistax taħkimha. Il-verità hi konkreta. U inti ma tistax tmur tqerr dnubietek b’mod astratt: ‘Iva, jiena… darba tlift sabri, darb’oħra…’ Ħafna affarijiet astratti. ‘Jien midneb.’ Il-konkretezza: ‘Jien għamilt dan. Ħsibt dan. Għidt dan.’ Il-konkretezza ġġagħalni nħoss bis-serjetà li jien midneb mhux ‘midneb fl-ajru’.
Fl-Evanġelju Ġesù jgħid: ‘Infaħħrek, Missier, Sid is-sema u l-art, għax inti dawn il-ħwejjeġ ħbejthom lil min hu għaref u lil min jifhem, u għarrafthom lil min hu ċkejken’ (Mt. 11, 25). Il-konkretezza taċ-ċkejknin. Sabiħ tisma’ liż-żgħar meta jiġu jqerru. Ma jgħidux stramberiji, ‘fl-ajru’; jgħidu affarijiet konkreti, u kultant konkreti żżejjed għax għandhom dik is-sempliċità li Alla jagħti liċ-ċkejknin. Dejjem niftakar f’tifel li darba ġie jgħidli li kien qalbu sewda għax kien tlewwem ma’ zitu… Imma mbagħad ma waqafx. Jien għidtlu: ‘Allura x’għamilt?’ – ‘Eh, kont id-dar, ridt immur nilgħab il-ballun’ – tifel hu! – ‘imma z-zija – ommi ma kinitx hemm – qaltli: ‘Le, int m’intix se toħroġ, l-ewwel trid tagħmel il-homework.’ Kelma ġġib lill-oħra u fl-aħħar bgħattha tixxejjer.’ Kien tifel ta’ kultura ġeografika kbira… Qalli wkoll f’liema pajjiż kien bagħat lil zitu! Hekk magħmulin: sempliċi, konkreti.
Aħna wkoll jeħtieġ li nkunu sempliċi, konkreti. Il-konkretezza tressqek lejn l-umiltà, għax l-umiltà hi konkreta. ‘Aħna lkoll midinbin’ hija stqarrija astratta. Le: ‘Jien midneb minħabba f’hekk, f’hekk u f’hekk…’ U dan inissel fija l-mistħija li nħares lejn Ġesù u ngħidlu: ‘Aħfirli.’ Dan hu l-veru atteġġjament tal-midneb. ‘Jekk ngħidu li ma għandniex dnub, inqarrqu bina nfusna u s-sewwa ma jkunx fina’ (1 Ġw. 1, 8). Mod kif aħna nistqarru li m’għandniex dnub hu dan l-atteġġjament astratt: ‘Iva, aħna midinbin, iva tlift sabri darba…’, imma kollox l-ajru. Ma nintebaħx bir-realtà ta’ dnubieti. ‘Imma, taf, aħna lkoll nagħmlu dawn l-affarijiet.’ Jiddispjaċini, jisgħobbija, inħoss l-uġigħ: ‘ma rridx nerġa’ nagħmel l-istess’, ‘ma rridx ngħidha aktar’, ‘ma rridx naħseb dan aktar.’
Importanti li f’qalbna nagħtu isem lid-dnubiet tagħna. Il-konkretezza. Għax jekk nibqgħu dejjem ‘fl-ajru’ nispiċċaw fid-dlam. Għandna nsiru bħaż-żgħar li jgħidu dak li jħossu, dak li għandhom f’moħħhom: dawn għadhom ma tgħallmux l-arti li l-affarijiet jgħiduhom xi ftit imqartsa biex jinftehmu mingħajr ma jkunu mistqarra! Din hi l-arti tal-kbar, li ħafna drabi hi ta’ ħsara għalina.
Ilbieraħ irċevejt ittra mingħand tfajjel minn Caravaggio. Jismu Andrea. U rrakkuntali l-affarijiet kif jarahom hu. L-ittri taż-żgħar, tat-tfal, huma sbieħ ħafna għax konkreti. U qalli li kien sama’ l-quddiesa minn fuq it-televixin u ried ‘iċanfarni’ dwar xi ħaġa: għax jien ngħid, ‘Il-paċi magħkom.’ ‘Int ma tistax tgħid hekk għax minħabba l-pandemija ma nistgħux immissu lil xulxin.’ Mhux qed jara li (hawn fil-knisja) intom tagħmlu inkin b’raskom u ma tmissux lil xulxin. Imma għandu l-libertà li jgħid l-affarijiet kif inhuma.
Mal-Mulej, aħna wkoll għandu jkollna l-libertà li ngħidu l-affarijiet kif inhuma: ‘Mulej, ninsab fid-dnub, għinni.’ Bħal Pietru wara l-ewwel sajda mirakoluża: ‘Mulej, tbiegħed minni għax jiena midneb’ (Lq. 5, 8). Ikollna dan l-għerf tal-konkretezza. Għax ix-xitan iridna ngħixu fil-bruda, bierda, fil-griż; la tajbin u lanqas ħżiena, la abjad u lanqas iswed: griż. Ħajja li lill-Mulej ma togħġbux. Il-bierda ma jogħġbuhx lill-Mulej. Konkretezza. Biex ma nkunux giddibin. Jekk nistqarru dnubietna, Hu fidil u ġust tant li jaħfrilna (1 Ġw. 1, 9). Jaħfrilna meta aħna konkreti. Il-ħajja spiritwali hi tant sempliċi; tant sempliċi, iżda aħna nikkumplikawha b’dal-ħafna sfumaturi, u fl-aħħar ma naslu qatt imkien…
Nitolbu lill-Mulej il-grazzja tas-sempliċità u Hu jtina dil-grazzja li jagħti lil min hu sempliċi, lit-tfal, liż-żgħar, li jgħidu dak li jħossu, li ma jaħbux dak li jkunu jħossu. Anke jekk ħaġa tkun żbaljata, jgħiduha xorta waħda. Miegħu wkoll, l-affarijiet ngħiduhom kif inhuma: bit-trasparenza. U ma ngħixux ħajja li la tinsab naħa u lanqas oħra. Nitolbu l-grazzja tal-libertà biex ngħidu l-affarijiet, u l-grazzja li nagħrfu sewwa min aħna quddiem Alla.
Miġjub għall-Malti mit-Taljan minn Joe Huber.