It-Tlieta, 12 ta’ Mejju 2020: Illum hu jum l-infermiera. Ilbieraħ bgħatt messaġġ. Nitolbu llum għall-infermiera kollha li għandhom dil-professjoni, li hi aktar minn professjoni: hija vokazzjoni, dedikazzjoni. Jalla l-Mulej iberikhom. F’daż-żmien ta’ pandemija taw eżempju ta’ eroiżmu u wħud minnhom ħallsu wkoll b’ħajjithom. Nitolbu għall-infermiera kollha.
Omelija – Il-paċi kif tagħtiha d-dinja u kif jagħtiha l-Mulej?
Qabel it-tluq tiegħu l-Mulej isellem lil tiegħu u jtihom id-don tal-paċi (cfr. Ġw. 14, 27-31), il-paċi tal-Mulej: ‘Jien inħallilkom is-sliem; nagħtikom is-sliem tiegħi; ma nagħtihulkomx kif tagħtih id-dinja’ (v. 27). Mhix il-paċi universali, il-paċi mingħajr gwerer li lkoll nixtiequ li jkun hawn dejjem, imma l-paċi tal-qalb, il-paċi tal-ispirtu, is-sliem li aħna lkoll għandna ġewwa fina. U l-Mulej itih imma jisħaq ‘mhux kif tagħtihulkom id-dinja’ (v. 27). Il-paċi kif tagħtiha d-dinja u kif jagħtiha l-Mulej? Huwa sliem differenti? Iva. Id-dinja ttik ‘paċi interjuri’: dwar dan qed nitkellmu, il-paċi f’ħajtek, l-għixien b’qalbek fil-paċi. Ittik il-paċi ġewwinija qisha xi ħaġa tiegħek personali, qisha xi ħaġa tiegħek li taqtgħek mill-oħrajn, iżżommok fik innifsek, hi kisba tiegħek. U int, bla ma tinduna, tingħalaq f’dik il-paċi. Hija paċi ftit jew wisq għalik, għal wieħed, għal kulħadd, paċi għaliha nfisha, paċi li żżommok kalm, hieni wkoll. U f’din is-serenità, f’din l-hena, tħannek xi ftit, tilluppjak u tħallik magħluq fik innifsek, f’ċertu kalma. Hi xi ftit jew wisq egoista: il-paċi għalija, magħluqa fija. Hekk ittiha d-dinja. Hi paċi li hija għalja għax ikun jeħtieġlek tibdel il-ħin kollu ‘l-istrumenti tal-paċi’: meta jkollok kilba għal xi ħaġa, dik ittik il-paċi, imbagħad tispiċċa biex tmur tfittex xi ħaġa oħra… Għalja ħafna għax hi proviżorja, sterili.
Iżda s-sliem li jagħti Ġesù huwa ħaġ’oħra. Hu sliem li lilek iċaqalqek; ma jiżolakx, ma jħallikx wieqaf, jimbuttak lejn l-oħrajn, joħloq il-komunità, joħloq il-komunikazzjoni. Il-paċi tad-dinja hija għalja; is-sliem ta’ Ġesù huwa b’xejn, gratis; huwa rigal tal-Mulej, il-paċi tal-Mulej. Hu għammiel, imexxik dejjem ’il quddiem. Eżempju fl-Evanġelju li lili jġagħalni nirrifletti dwar il-paċi tad-dinja hu dak ir-raġel għani li kellu l-imħażen mimlija u l-ħsad dik is-sena kien abbundanti. Hu jaħseb bejnu u bejn ruħu: ‘Ikolli nibni mħażen ġodda biex ikolli fejn inqiegħed dan kollu u mbagħad nistrieħ u nkun nista’ ngħix kuntent.’ ‘Iblah,’ qallu Alla, ‘illejla int se tmut’ (cfr. Lq. 12, 13-21). Hija paċi statika, ma tiftaħlekx il-bieb għan-naħa l-oħra. Il-paċi tal-Mulej hi miftuħa għal fejn mar Hu, hi miftuħa għas-Sema, hi miftuħa għall-Ġenna. Huwa sliem għammiel li jinfetaħ u miegħek tieħu nies oħrajn lejn il-Ġenna.
Nemmen li jgħinna xi ftit naħsbu: liema hu s-sliem tiegħi, fejn insib il-sliem? Fl-affarijiet tad-dinja, fil-ġid, fil-vjaġġi – imma bħalissa ma nistgħux nivvjaġġaw – fl-għana li għandi, f’ħafna hwejjeġ bħal dawn, jew bħala don tal-Mulej? Il-paċi jkolli nħallas għaliha jew nirċeviha b’xejn mingħand il-Mulej? Kif inhu s-sliem tiegħi? Meta tonqosni xi ħaġa, nirrabja? Din mhux il-paċi tal-Mulej. Din hi waħda mill-provi. Jien inħossni kalm fil-paċi, ‘norqod’? Dik mhix tal-Mulej. Jien inħoss is-sliem u rrid naqsmu mal-oħrajn u nseddaq xi ħaġa? Dik hi l-paċi tal-Mulej! Fil-waqtiet koroh, diffiċli wkoll, inħossni nibqa’ fil-paċi? Dik hi l-paċi tal-Mulej. Is-sliem li jtina l-Mulej huwa għammiel għalija wkoll għax hu mimli tama, jiġifieri jħares lejn is-Sema.
Ilbieraħ – skużawni jekk qed insemmi dan iżda huma fatti tal-ħajja li lili jagħmluli l-ġid – irċevejt ittra mingħand saċerdot tal-affari tiegħu li qalli li jien ftit nitkellem dwar il-Ġenna, u li għandi nsemmiha aktar. U għandu raġun. Għalhekk illum ridt insemmi dan: li s-sliem, dak li jtina Ġesù, hu għal issa u għall-ġejjieni. Bih inkunu bdejna ngħixu s-Sema, bil-fekondità tas-Sema. Dan mhux loppju. L-oħra iva: inti tkun illuppjat bil-ħwejjeġ tad-dinja u meta d-doża ta’ dal-loppju tispiċċa, tieħu oħra, u oħra, u oħra… Is-sliem tal-Mulej hu definittiv: għammiel u jittieħed. Mhux narċisiżmu, għax iħares dejjem lejn il-Mulej. Bil-paċi tad-dinja inti tħares biss fik innifsek: hu narċisiżmu.
Jalla l-Mulej itina dan is-sliem mimli tama, li jagħmilna għammiela u komunikattivi mal-oħrajn, li joħloq il-komunità u ħarstu dejjem fuq il-paċi definittiva tal-Ġenna.
Miġjub għall-Malti mit-Taljan Joe Huber.