Fl-Isem tal-Missier u tal-Iben u tal-Ispirtu s-Santu
Minn Fr Jimmy Bonnici
Kbir f’għemilu l-Mulej magħna!
- Niftħu qalbna għall-Kelma t’Alla
F’dak iż-żmien, waqt li Ġesù kien ħiereġ minn Ġeriko flimkien mad-dixxipli tiegħu u ma’ kotra kbira ta’ nies, kien hemm wieħed tallab agħma, jismu Bartimew, bin Timew, bilqiegħda mal-ġenb tat-triq. Dan, meta sama’ li kien Ġesù ta’ Nazaret, qabad jgħajjat u jgħid: “Ġesù, bin David, ikollok ħniena minni!”.
Kien hemm ħafna li bdew jgħajtu miegħu biex jiskot imma hu aktar beda jgħajjat: “Bin David, ikollok ħniena minni!”.
Ġesù waqaf u qal: “Sejħulu”. Huma sejħu l-agħma u qalulu: “Agħmel il-qalb! Qum, qiegħed isejjaħlek”. Dak tajjar il-mantar minn fuqu, qabeż fuq riġlejh u mar ħdejn Ġesù.
U Ġesù kellmu u qallu: “Xi tridni nagħmillek?”. “Li nerġa’ nara, Rabbuni”, wieġbu l-agħma. U Ġesù qallu: “Mur, il-fidi tiegħek fejqitek”. U minnufih raġa’ beda jara, u baqa’ miexi warajh fit-triq. (Mk 10:46-52)
- Riflessjoni/talba:
i. Waqt li Ġesù kien ħiereġ minn Ġeriko flimkien mad-dixxipli tiegħu u ma’ kotra kbira ta’ nies, kien hemm wieħed tallab agħma, jismu Bartimew, bin Timew, bilqiegħda mal-ġenb tat-triq.
Ġesù miexi, ħiereġ mill-belt,
miexi lejn kull post fejn il-bniedem jintrema (jingħata … jaqtgħuhielu għall-mewt),
miexi, lil hinn mill-għeluq tal-poter li jintuża biex jarmi
poter li jiddeċiedi d-destin ta’ persuna b’daqqa ta’ pinna.
Ġesù miexi, imma Bartimew wieqaf,
bilqiegħda, mal-ġemb tat-triq,
imwaħħal, forsi jħossu bla alternattivi,
tallab imma għama.
Irrifletti:
• Miexi jew wieqaf?
ii. Kien hemm ħafna li bdew jgħajtu miegħu biex jiskot imma hu aktar beda jgħajjat: “Bin David, ikollok ħniena minni!”. Ġesù waqaf u qal: “Sejħulu”. Huma sejħu l-agħma u qalulu: “Agħmel il-qalb! Qum, qiegħed isejjaħlek”.
Huma ħafna li jimxu mal-mentalità tal-belt
li tipproteġi l-poter u ssikket lid-dgħajjef
u żżommu bilqiegħda, fit-tarf tat-triq, għama:
lanqas tallab ma jista’ jkun: imsikket.
Imma Ġesù ħiereġ mill-belt
bi stil ieħor ta’ awtorità: ġie biex jaqdi mhux biex ikun moqdi,
jispira lil Bartimew biex isib il-vuċi tiegħu u jgħajjat aktar,
jibdel lil ta’ madwaru biex iwasslu sejħa, jittrasmettu kuraġġ (mhux isikktu):
“Agħmel il-qalb! Qum, qiegħed isejjaħlek.”
Irrifletti
• Aħna komunità nisranija/Knisja li ssikket jew li twassal sejħa, kuraġġ?
iii. Ġesù kellmu u qallu: “Xi tridni nagħmillek?”. “Li nerġa’ nara, Rabbuni”, wieġbu l-agħma. U Ġesù qallu: “Mur, il-fidi tiegħek fejqitek”. U minnufih raġa’ beda jara, u baqa’ miexi warajh fit-triq.
“Xi triduni nagħmlilkom?”
Ġakbu u Ġwanni qalulu biex joqogħdu fuq il-lemin u x-xellug fil-glorja..
“Xi tridni nagħmillek?”
Bartimew qallu “li nerġa nara, Rabbuni”!
Ftit ftit id-dixxipli jippurifikaw ix-xewqat tagħhom
u Bartimew, f’isem kull min irid jibqa’ miexi wara Ġesù, iwieġeb:
“li nerġa nara”:
nara kif timxi Int
nara kif tuża’ l-awtorità Int
nara kif tinduna b’min hu fit-tarf:
narak tassigura li ma jibqax jissikket,
narak tilliberah biex jista’ jaqbad it-triq hu wkoll!
“Li nerġa nara, Mulej”: bl-għajnejn tiegħek mhux tad-dinja!
Irrifletti
• Ikkontempla lil Ġesù u l-mod kif jara Hu.
- Missierna