L-Għan tal-Ordni Agostinjan
L-għan tal-Ordni Agostinjan (OSA) huwa dak li jgħin lil dawk imsieħba fih, kemm jekk reliġjużi rġiel jew nisa u kemm jekk lajċi, sabiex f’għaqda ta’ fraternità u ta’ ħbiberija spiritwali, jfittxu lil Alla, jfaħħruh u jaħdmu għall-qadi tal-poplu tiegħu. Hekk huma jipparteċipaw fil-missjoni ta’ evanġelizzazzjoni tal-Knisja universali biex twassal il-Bxara t-Tajba lid-dinja kollha.
L-Ordni Agostinjan huwa magħruf b’dan l-isem minkejja li ma ġiex imwaqqaf direttament minn Santu Wistin. Dan jista’ jidher kontradittorju mal-ewwel daqqa t’għajn, iżda l-ispjegazzjoni tinsab kemm fl-istorja u kemm fl-ispiritwalità tal-Ordni.
L-ewwel nett, huwa importanti nżommu f’moħħna li Santu Wistin, li għex bejn is-snin 354–430 wK, kien isqof u teologu kbir tal-Knisja bikrija, iżda qatt ma waqqaf ordni reliġjuża fis-sens kif nifhmuh illum. Madankollu, hu kiteb regola ta’ ħajja magħrufa bħala r-Regola ta’ Santu Wistin, li kienet tinkludi prinċipji ta’ għixien komunitarju, talb, faqar u għaqda bejn il-membri.
Matul is-sekli wara mewtu, diversi gruppi ta’ eremiti u komunitajiet reliġjużi fl-Ewropa bdew jadottaw din ir-regola bħala gwida għall-ħajja tagħhom. Dawn il-gruppi ma kinux magħqudin taħt struttura waħda, iżda kienu jaqsmu l-istess ideali spiritwali spirati minn dan il-qaddis.
Fis-seklu tlettax, il-Papiet tal-Knisja Kattolika ddeċidew li jgħaqqdu dawn il-komunitajiet differenti f’Ordni wieħed. Dan seħħ b’mod speċjali taħt il-Papa Innocenz IV u wara taħt il-Papa Alessandro IV, li fl-1256 formalment waqqaf l-Ordni tal-Eremiti ta’ Santu Wistin, illum magħruf bħala l-Ordni Agostinjan. Dan il-proċess huwa magħruf bħala l-Magna Unio jew l-għaqda kbira.
L-Ispiritwalità tal-Ordni
Il-valuri ewlenin tal-Ordni Agostinjan huma b’mod partikolari, il-komunità, l-imħabba fraterna, it-tfittxija tal-verità u r-relazzjoni profonda ma’ Alla. Dawn kollha huma temi ċentrali fil-kitbiet ta’ Santu Wistin, speċjalment fl-opri kbar tiegħu; l-Isqarrijiet u kif ukoll il-Belt ta’ Alla.
Qaddisin mill-Ordni Agostinjan
Aktar dwar Santu Wistin