Infakkru b’ferħ u hena
il-jum ta’ ġrajja kbira:
l-Ispirtu, l-Faraġ tagħna,
issawwab fid-dixxipli. Missierna, Sliema, Glorja
Dehrulhom qishom ilsna
tan-nar fuq ras kull wieħed:
il-kelma tqiegħdet f’fommhom,
l-imħabba tħeġġet f’qalbhom. Missierna, Sliema, Glorja
U bl-ilsna kollha tkellmu:
inġabret kotra w stagħġbet:
ħasbuhom nies xurbana
lil dawk li mtlew bl-Ispirtu. Missierna, Sliema, Glorja
Kien tmiem il-Għid Imqaddes
tal-maħfra skont il-liġi:
iż-żmien li temm għalina
l-għemil tas-salvazzjoni. Missierna, Sliema, Glorja
Għalhekk, f’riġlejk mixħuta,
Spirtu Qaddis, nitolbu:
f’dal-jum solenni u mbierek,
agħtina d-doni tiegħek. Missierna, Sliema, Glorja
Int, li bil-grazzja tiegħek
qaddist l-ulied mifdija,
agħtina l-maħfra kollha,
bis-sliem fil-għaqda miegħek. Missierna, Sliema, Glorja
Kun fina, w bid-doni tiegħek
nagħrfu l-Missier u l-Iben
u nemmnu b’fidi sħiħa
li int l-Ispirtu tagħhom. Missierna, Sliema, Glorja
Silenzju 3min
Innu: ____________
Qari mill-Evanġelju skond San Ġwann Ġw 20:19-23
Dak il-Ħadd filgħaxija, fl-ewwel jum tal-ġimgħa, meta d-dixxipli kienu flimkien imbeżżgħa mil-Lhud, bil-bibien magħluqa, ġie Ġesù u qagħad f’nofshom; u qalilhom: “Is-sliem għalikom!”. Kif qal hekk, uriehom idejh u ġenbu. Id-dixxipli ferħu meta raw lill-Mulej. Imbagħad Ġesù tenna jgħidilhom: “Is-sliem għalikom! Kif il-Missier bagħat lili, hekk jien nibgħat lilkom”. Kif qal hekk, nefaħ fuqhom u qalilhom: “Ħudu l-Ispirtu s-Santu. Dawk li taħfrulhom dnubiethom ikunu maħfura, u dawk li żżommuhomlhom ikunu miżmuma”.
Il-Kelma tal-Mulej
Tifħir lilek Kristu
Silenzju 1min
Ftit qabel ma tlajt is-sema, o Ġesú, inti tlabt lill-Appostli biex jibqgħu fil-belt ta’ Ġerusalemm, sa ma sseħħ il-wegħda. Inti wegħdthom li se jirċievu l-Ispirtu s-Santu, l-Ispirtu tal-Verità, u huma jsiru xhud tiegħek f’Ġerusalemm, fis-Samarija, u sa trufijiet tal-art. Hija wegħda li seħħet fil-festa kbira ta’ Pentekoste: jinżel l-Ispirtu s-Santu, jwelled il-Knisja, u mill-Appostli sal-ġurnata tal-lum, imexxiha biex tkun sinjal, xhieda tal-preżenza ħajja tiegħek. (10 sek pawsa)
Mulej, dakinhar tal-Qawmien tiegħek, Inti dħalt f’nofs l-appostli li kienu mbeżgħin u mifxulin; u imlejthom bil-ferħ tiegħek: tajthom il-paċi tiegħek; il-paċi li jagħti s-serħan, li timla l-qlub bis-serenità. U hemm infaħt fuqhom in-nifs tiegħek: nifs li jagħti l-ħajja: Ħudu l-Ispirtu s-Santu. (5 sek pawsa)
Illum, ukoll, f’kull talba li nagħmlu, f’kull Sagrament li niċċelebraw, f’kull Kelma ta’ Alla li nisimgħu, qed nerġgħu niġġeddu b’din iż-żiffa ħelwa tal-Ispirtu s-Santu, b’dan ir-riħ qawwi li jsaffina u li jqaddisna. Ejja Spirtu Qaddis, u ġedded il-wiċċ tal-art.
Silenzju 2 min
U dakinhar tal-Qawmien mill-imwiet tiegħek, o Ġesú, Int, mhux biss imlejt lill-appostli bil-ferħ u l-paċi tiegħek; mhux biss infaħt fuqhom l-Ispirtu Qaddis tiegħek, imma li tajtulhom għal skop preċiż: għall-maħfra tad-dnubiet; jiġifieri biex tħabbeb mill-ġdid l-erwieħ, biex tarmoniża l-qlub imċarta mill-ħażen, imfarrka mill-ġrieħi, mifruda minn xulxin minħabba s-sens ta’ ħtija. (5 sek pawsa)
L-Ispirtu biss jerġa’ jġib l-armonija fil-qalb. Jekk irridu l-armonija, ejjew inħalluh jaħdem fina, u mhux infittxu l-ferħ fil-ħwejjeġ tad-dinja, li jħalulna biss vojt u konfużjoni. Ejjew nistaqsu ftit lilna nnfusna: jien doċli għall-armonija tal-Ispirtu? Jew infittex il-proġetti tiegħi, l-ideat tiegħi, mingħajr ma nħalli lilu jagħġinni u jibdilni? (10 sek pawsa)
Il-Mulej tani l-grazzja tal-maħfra tiegħu, tani l-paċi tiegħu. U jiena naħfer?
Ejja Spiritu tal-maħfra, armonija tal-qalb, ibdilni kif taf int, permezz ta’ Marija.
Silenzju 3 min
Innu: ____________
Talbiet tal-Komunitá
Alla l-Missier ġabar il-Knisja tiegħu permezz ta’ Ibnu Ġesú Kristu. B’xhieda ta’ ferħ, nitolbuh u ngħidulu:
Ibgħat l-Ispirtu Qaddis tiegħek fil-Knisja.
Inti ssejjaħ l-insara kollha li ħadu magħmudija waħda u tridhom jingħaqdu ġemgħa waħda fl-Ispirtu: agħmel li dawk kollha li rċevew il-fidi jkunu qalb waħda u ruħ waħda bejniethom. Ngħidu flimkien:
Ibgħat l-Ispirtu Qaddis tiegħek fil-Knisja.
Int ridt id-dinja kollha timtela bl-ispirtu tiegħek: agħmel li l-bedmin kollha jaħdmu id f’id biex jibnu d-dinja fuq il-ġustizzja u l-paċi. Ngħidu flimkien:
Ibgħat l-Ispirtu Qaddis tiegħek fil-Knisja.
Inti ġġedded kollox bl-Ispirtu tiegħek: fejjaq lill-morda għeżież tagħna, farraġ l-imnikktin, agħti s-saħħa lil kulħadd. Ngħidu flimkien:
Ibgħat l-Ispirtu Qaddis tiegħek fil-Knisja.
Ftit ġranet ilu, bl-Ispirtu s-Santu ikkonsagrajt tliet saċerdoti ġodda: nitolbuk biex tberikhom u tqaddisshom. Ngħidu flimkien:
Ibgħat l-Ispirtu Qaddis tiegħek fil-Knisja.
Int tajtna, Mulej, l-Ispirtu tal-verità kollha: Ibgħatulna ħa jgħallimna kollox u jqawwina bid-doni tiegħu ħa nagħtu xhieda tiegħek quddiem id-dinja. Ngħidu flimkien:
Ibgħat l-Ispirtu Qaddis tiegħek fil-Knisja.
Ejjew fis-skiet ta’ qalbna nagħmlu t-talba personali tagħna.
Tingħata l-Barka Sagramentali: