Minn Fr Jimmy Bonnici
Fl-Isem tal-Missier u tal-Iben u tal-Ispirtu s-Santu
Ta’ min ifaħħrek u jgħollik fuq kollox għal dejjem.
- Niftħu qalbna għall-Kelma t’Alla
F’dak iż-żmien, Ġesù qal lil Nikodemu: “Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem. Għax Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu. Min jemmen fih ma jkunx ikkundannat; iżda min ma jemminx huwa ġa kkundannat, għax ma emminx fl-isem tal-Iben il-waħdieni ta’ Alla”. Ġw 3:16-18
- Riflessjoni/talba:
i. Ġesù qal lil Nikodemu: “Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem.
Fid-dalma tal-lejl
Nikodemu jiskopri x’hemm fil-qalba tal-univers!
L-inizjattiva tal-Missier li joħloq
hija l-istess inizjattiva li tfittex kontinwament
li ssalva
li tara li ma naqtgħux qalbna mill-ħajja
tlaqqagħna mal-Iben il-Maħbub
u tagħtina perspettiva ġdida;
kull ħlejqa maħluqa fiH – b’imħabba
jien maħluq għaliH – mhux se nintilef
mhux se nispiċċa, fallut.
Irrifletti:
X’inhi l-perspettiva dominanti tiegħek fuq il-ħajja?
ii. Għax Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu.
L-Iben il-Maħbub tal-Missier,
natura waħda mal-Missier
imma wkoll mibgħut!
Il-meravilja ta’ mħabba li tiftaħ
biex tinkludi d-dinja
biex l-ebda ħlieqa ma tibqa’ magħluqa fiha nnifisha.
L-Ispirtu, l-imħabba bejn il-Missier u l-Iben,
huwa l-istess Spirtu li ġej mill-Missier u mill-Iben
biex aħna ma nibqgħux magħluqin fina nfusna
imma ningħaqdu maż-żifna li tiftaħna
biex ħaddieħor ukoll isalva.
Irrifletti
Fejn tara l-ħidma tal-Ispirtu fik? Madwarek?
iii. Min jemmen fih ma jkunx ikkundannat; iżda min ma jemminx huwa ġa kkundannat, għax ma emminx fl-isem tal-Iben il-waħdieni ta’ Alla”.
Ġesù ma ġiex biex jikkundanna
iżda biex biH id-dinja issalva.
Xi traġedja
meta l-għajnuna ma nilqagħhiex;
meta l-opportunità narmiha;
meta l-qalb tingħalaq flok tinfetaħ.
meta ngħix daqs li kieku Alla ma jeżistix.
Irrifletti
Kif tirrelata m’Alla fil-ħajja ta’ kuljum? Fejn tinnota l-istedina tiegħu?
- Missierna