Il-Kunsill Pontifiċju għall-Promozzjoni tal-Evanġelizzazzjoni ħareġ Direttorju ġdid għall-katekeżi, b’linji-gwida għall-missjoni tal-Knisja fit-tħabbir tal-Vanġelu permezz tal-katekeżi u tal-evanġelizzazzjoni.
L-ewwel parti tad-direttorju hi dwar il-formazzjoni tal-katekisti, bħala xhieda kredibbli tal-fidi, li għandhom jagħmlu kollox mil-qalb, b’dedikazzjoni u b’integrità. It-tieni parti hi dwar l-importanza ta’ mudelli effettivi ta’ komunikazzjoni u tinkuraġġixxi l-użu tal-arti u l-mużika, li jikkontemplaw is-sabih. It-tielet parti hi dedikata għall-katekeżi fil-parroċċi u fl-għaqdiet, filwaqt li fl-iskejjel is-suġġett tar-reliġjon irid jikkumplimenta t-tagħlim tal-katekiżmu fil-parroċċi.