QARI I
Saħqu ras l-imsejkna mat-trab tal-art.
Għam 2, 6-10.13-16
Qari mill-Ktieb tal-Profeta Għamos
Dan jgħid il-Mulej:
“Għal tliet dnubiet ta’ Iżrael, erbgħa anzi,
ma rreġġax lura kelmti,
għax huma biegħu l-bniedem ġust għall-fidda,
u l-fqir għal żewġt iqrieq;
saħqu ras l-imsejkna mat-trab tal-art,
u għawġu t-triq tal-umli;
għax huma jidħlu għand l-istess żagħżugħa,
sew l-iben, sew missieru,
biex iżebilħu l-isem qaddis tiegħi;
u għax ħdejn kull altar jimteddu fl-art fuq ħwejjeġ mirhunin;
u fid-dar ta’ alla tagħhom
ilegilgu l-inbid ta’ dawk li huma jimmultaw.
U safrattant kont jien li qridtilhom ġens l-Amurrin,
minn quddiemhom,
minkejja li kien għoli daqs iċ-ċedri,
u l-qawwa tiegħu qawwa tal-ballut.
U qridtlu l-frott minn fuqu u sal-għeruq minn taħtu.
Kont jien li tellajtkom mill-Eġittu,
mexxejtkom erbgħin sena fid-deżert,
biex tieħdu art ġens l-Amurrin.
Araw, se rrosskom mal-art,
kif jintrass ’l isfel karettun mgħobbi bil-qatet.
Il-ħafif ma jibqagħlux ħila biex jaħrab,
il-qawwi ma jwettaqx saħħtu;
lanqas il-qalbieni ma jsalva ħajtu;
min jaqbad l-ark ma jiqafx fuq riġlejh,
min hu riġlejh ħfief ma jsalvax,
lanqas ir-rikkieb ma jsalva ħajtu;
u mqar l-aqwa wieħed fost il-qalbiena,
ikollu jaħrab għarwien dakinhar !”
Oraklu tal-Mulej.
Il-Kelma tal-Mulej
R/. Irroddu ħajr lil Alla
SALM RESPONSORJALI
Salm 49 (50), 16bċ-17.18-19.20-21.22-23
R/. : Mulej aħfer id-dnub tal-poplu tiegħek
Kif titkellem fuq il-kmandamenti tiegħi,
u żżomm fuq xufftejk il-patt tiegħi,
int, li tobgħod it-twiddib,
u tixħet kliemi wara dahrek? R/.
Jekk tiltaqa’ ma’ ħalliel, tissieħeb miegħu;
sehmek taqsam maż-żienja.
Fommok ftaħt għall-ħażen,
u lsienek il-qerq jinseġ. R/.
Kontra ħuk toqgħod tpaċpaċ,
kontra bin ommok tqassas.
Dan int għamilt, u jien bqajt sieket;
forsi ħsibt li jiena bħalek.
Issa se nċanfrek, u dan kollu nqiegħed quddiemek. R/.
Ifhmuha sewwa, intom li tinsew ’l Alla,
li ma naħtafkomx, u ħadd ma jeħliskom.
Min iroddli sagrifiċċju ta’ radd il-ħajr, dan isebbaħni;
lil min jimxi bis-sewwa nurih is-salvazzjoni ta’ Alla. R/.
AKKLAMAZZJONI QABEL L-EVANĠELJU
ara Salm 94 (95), 8ab
Hallelujah. R/. Hallelujah
Illum la twebbsux qalbkom,
iżda isimgħu leħen il-Mulej.
R/. Hallelujah
EVANĠELJU
Imxi warajja.
Mt 8, 18-22
Qari mill-Evanġelju skont San Mattew
F’dak iż-żmien, meta ra ruħu mdawwar b’ħafna nies, Ġesù ordna li jaqsmu għax-xatt l-ieħor.
Imbagħad resaq fuqu wieħed mill-kittieba u qallu: “Mgħallem, tmur fejn tmur, jiena niġi warajk”. Imma Ġesù wieġbu: “Il-volpijiet għandhom l-għerien tagħhom, u l-għasafar tas-sema l-bejtiet; iżda Bin il-bniedem ma għandux fejn imidd rasu”.
Ieħor, wieħed mid-dixxipli, qallu: “Mulej, ħallini l-ewwel immur nidfen lil missieri”. Ġesù wieġbu: “Imxi warajja, u ħalli l-mejtin jidfnu l-mejtin tagħhom”.
Il-Kelma tal-Mulej
R/. Tifħir lilek Kristu