Minn Edwaerd Tagliaferro
Darba waħda, għalliema ta’ tfal ta’ għaxar snin, talbithom biex għax-xogħol tad-dar jiktbu komponiment bit-titlu: “X’inhi l-ikbar xewqa ta’ ħajti.” L-għada, it-tfal kollha ġabu l-pitazzi b’dan il-komponiment. L-għalliema ġabrithom u poġġiethom fil-basket. Kompliet bil-lezzjonijiet tas-soltu, u meta sar il-ħin marret id-dar.
Wara li ħadet ftit kafe’, ħarġet il-pitazzi tat-tfal u bdiet tikkoreġihom. Bdiet taqra li wieħed xtaq isir bdot, ieħor supereroj; oħrajn inġinier, pittur, astronawta, u l-bqija. Imma wieħed tifel spikka aktar mill-oħrajn. Ħareġ b’ideja li l-għalliema qatt ma kienet qed tistenna. Dan stqarr li x-xewqa kbira tiegħu hi li jsir smartphone. Qabel ma kompliet taqra, laħaq ġie r-raġel tagħha mix-xogħol. Dan għamel naqra te’, u mar jistrieħ fuq petruna.
L-għalliema kompliet taqra: “Il-ġenituri tiegħi jħobbu l-ismartphone aktar minni. Jieħdu ħsiebu aktar milli jieħdu ħsiebi. Meta missieri jiġi mix-xogħol għajjien, jaqbad l-ismartphone u jitkellem fih, u lili mank jgħidli kelma waħda biss. Jekk jaqta’ ftit u jċempillu, jirrispondih mill-ewwel wara ċempila waħda biss. Meta jien ngħajjatlu jew insaqsieh xi ħaġa ma jagħtiex kasi, anki jekk inkun qed nibki. Ommi u missieri l-ħin kollu jilagħbu logħob li jsibu fih, imma ma jsibux imqar naqra ħin biex jilagħbu miegħi. Jitkellmu fuqu dejjem mal-oħrajn, imma miegħi qatt, anki meta jkolli xi ħaġa mportanti ħafna x’ngħidilhom. Għalhekk nixtieq ħafna li jiġi xi saħħar u jibdilni fi smartħhone, forsi l-ġenituri jibdew jagħtu kasi.”
L-għalliema qabżilha d-dmugħ u r-raġel tagħha nduna. “Għaliex qed tibki?” staqsieha. Weġbitu billi qaltlu x’kien hemm miktub. “U min kitbu dan il-komponoment?” Hawn l-għalliema nfexxet tibki u tolfoq, fil-waqt li qaltlu: “It-tifel tagħna!”
Il-gadgets li għandha tajbin biex jagħmlu l-ħajja tagħna aktar faċli, Imma ma nistgħux inħalluhom jiddominawna u jmexxulna ħajjitna. Jeħtieġ li niddeċiedu minn qabel meta u kemm ħin se nallokaw għalieh, bla ma ninsew x’ħin għandna bżonn għad-doveri tagħna, speċjalment jekk aħna ġenituri. It-tfal ta’ kull eta’ jafu sew x’inhu jiġri madwarhom. Dawn jagħmlu mpressjoni kbira u ċara f’moħħhom. Matul il-ġurnata ta’ skola, kull tifel jiltaqa’ ma’ diversi sitwazzjonijiet, xi wħud tajbin, imma xi wħud negattivi. Kif jasal id-dar, dan it-tifel ikun irid jiftaħ qalbu mat-tnejn min-nies l-aktar li jħobbuh. Jekk il-ġenituri ma jkunux lesti biex jisimgħuh, u joqogħdu jagħlqulu ħalqu u jgħidulu “Mhux issa!” dan it-tifel se jżomm kollox f’qalbu. Dan jista’ jkun ta’ ħsara kbira għalih u jikber bl-impressjoni li ħadd ma jħobbu u ħadd ma jagħti kasu.