Helda, xhieda ta’ qawwa spiritwali f’Ġaża. Kitba ta’ Joe Galea

HELDA JOSEPH AYYAD hi mara żagħżugħa f’Gaza, li minħabba l-attakki tal-armata Lhudija fuq id-djar tal-abitanti, sabet kenn fil-kumpless tal-Knisja tal-Familja Mqaddsa fil-belt ta’ Gaza. HELDA tikteb dwar kif, minkejja l-uġigħ u l-biża’ li l-komunità tal-familja tagħha għaddejja minnhom, il-fidi f’Alla tibqa’ għalihom l-uniku dawl fit-toroq mudlama ta’ ġrajja hekk traġika. Tgħid li: “Kull filgħodu, ix-xemx f’Gaza ma titlax biex iddawwal djarna, iżda biex tikxef kuljum aktar qerda u tagħti xhieda siekta tal-imrar tar-realtà tagħna”.

Din iż-żagħżugħa ilha sentejn tistkenn fil-knisja tal-Familja Mqaddsa. HELDA ma tqumx bl-għana tal-għasafar jew bis-sħana tar-raġġi tax-xemx, imma bil-ħoss li jtarrax tal-isparar li jriegħed l-art tal-kenn tagħhom; il-frak tal-ħadid tal-munizzjon jikser is-skiet tal-għodwa u jnissel it-terrur fil-qalb tan-nies imsejkna. Filgħaxija, HELDA u l-familja tagħha ma jorqdux għal ħolm li jwennes, iżda għar-riħa li tifga tal-porvli, li tfakkar li l-mewt tinsab moħbija f’kull rokna u li l-ħajja saret tbatija ta’ kuljum.

HELDA tiftakar li ħuha ż-żgħir, li l-innoċenza tiegħu għadha ma ġietx korrotta mill-gwerra, jgħodd l-ikel fil-laned li sar tant għażiż għalihom. Tgħid: “Nirringrazzjaw lil Alla għal dan l-ikel li kemm-il darba tarrafna ħajjitna biex insibuh. Aħna familja ta’ ħames persuni, u naqsmu bejnietna bott fażola, li għalina hi bħal barka mis-sema. Ħafna drabi hi l-unika ikla tagħna tal-ġurnata, jekk ikollna, imma hija biżżejjed biss biex ma mmutux bil-ġugħ; bilkemm qed titma’ ‘l ġisimna dgħajjef, imma żżommna ħajjin bi tbatija kbira”.

Meta jidwi l-ħoss tal-isparar, jibqgħu bla nifs u jsibu ruħhom mixħutin mal-art, imwaħħlin ma’ tama falza li s-sitwazzjoni tikkalma għal ftit żmien. Jistennew, itennu f’qalbhom kliem mill-Bibbja, jittamaw għal ftit mumenti kwieti li matulhom jistgħu jfittxu xi ħaġa biex itaffu ftit il-ġugħ tagħhom, imqar b’biċċa ħobż. Wara li l-arja tikkalma, jibdew inaddfu l-kamra, li hija maqsuma bejn diversi familji u li kienet klassi fl-iskola mal-ġenb tal-knisja. Din il-kamra, li darba kienet  il-kamra tal-ħolm għat-tfal, illum tixhed ir-reżiljenza spiritwali tan-nies li joqogħdu fiha, id-dmugħ sieket tagħhom, u l-istejjer ma jaqtgħux ta’ qabel l-irqad irrakkuntati taħt il-ħsejjes tal-armi.

Imbagħad, jinżlu għall-attivitajiet tat-tfal u għat-talb, li huwa l-uniku konsolazzjoni tagħhom. “Hawnhekk,” tgħid HELDA, “ tara qlub jibku, tara kif jinbidel il-wiċċ innoċenti tat-tfal hekk kif jisimgħu l-ħoss tal-isparar. Jitwerwru, jgħattu widnejhom b’idejhom żgħar, jew jiġru biex jinħbew fit-tgħannieqa sħuna tal-ġenituri, bħallikieku kienet tarka kontra l-ħażen ta’ madwarhom. Tara biża’ u stagħġib f’għajnejhom, mistoqsijiet li ma jinstemgħux, imma li jgħajtu fis-skiet ta’ wġigħ: “Għaliex, Mulej? Għaliex aħna?”

HELDA rat xeni ta’ swied il-qalb. Memorji ta’ ħajjithom li għebu f’daqqa. Kull rokna ta’ dawk id-djar kellha storja, kull biċċa għamara kienet xhieda ta’ ferħ jew niket, u issa ma fadal xejn ħlief trab u rmied. Huma ħafna li marru lura f’saħħithom, u wħud mietu, mhux biss għax intlaqtu mill-balal, imma wkoll minħabba nuqqas gravi ta’ ikel, nuqqas fil-kura tas-saħħa, u  mediċina li ma tasalx. HELDA tgħid: “Mietu fis-skiet, bil- ġuħ, u ħallewlna weġgħa f’qalbna li ma tisparixxix, u għajta siekta kontra dinja li tibqa’ bierda waqt li tara l-mewt riesqa lejk bil-mod.

Dwar l-ikel tgħid: “Grazzi lil Alla u l-idejn tar-rieda tajba; il-Knisja xi kultant tipprovdilna l-ikel. Drabi oħra, ommi ssajjar ikel li ssib, li bilkemm ikun biżżejjed biex isostnina. Imma anke dan l-ikel fqir sar lussu fid-dawl tal-iskarsezza tar-riżorsi. M’hemmx biżżejjed ikel, anke d-dqiq, li hu l-ikel bażiku f’kull dar, spiss mhux nadif, u jekk jinstab, ikun bi prezzijiet għolja, qisna qed nixtru d-deheb u mhux id-dqiq. Kull gidma li nieklu saret miraklu fiha nnifisha.”

“Minkejja dan l-uġigħ kollu li jifni lil ruħna”, tkompli ĦELDA, “u d-diqa kollha li ddawwarna, il-fidi tagħna f’Alla tibqa’ l-uniku dawl li jdawwal it-triqat mudlama tagħna, u jagħtina s-saħħa biex nissaportu ġurnata oħra. Inżommu sod mat-talb, ngħollu jdejna f’karba lejn is-sema, nemmnu li Alla mhux se jitlaqna u li wara t-tbatija jiġi l-ferħ”. Tikkwota l-Bibbja: “Jekk ninsiek, Ġerusalemm, ħa tinxef idi l-leminija”… vers li qatt ma jitlaq mit-talb tagħna, għax l-imħabba lejn beltna u lejn art twelidna hija mnaqqxa f’qalbna, minkejja l-ħerba kollha.”

Għalkemm bil-qtugħ tad-dawl u n-nuqqas ta’ riżorsi, jippruvaw isegwu l-aħbarijiet bil-ftit apparat żgħir li għandhom jew permezz tal-mowbajls meta jkun hemm netwerk li jaħdem. Isegwu b’qalbhom tirtogħod kull aħbar li tasal, li x’aktarx tkun ta’ traġedja, dwar qarib mitluf jew it-tifrik ta’ xi binja li ftit ilu kienu jilagħbu fiha. B’dawn il-ftit aħbarijiet, huma jibqgħumagħquda mal-bqija tad-dinja u jikkuntentaw b’dak li jkun fadal mit-tama tagħhom.

Mil-knisja tal-Familja Mqaddsa,HELDA tagħti xhieda tal-fidi tagħha u tal-familja tagħha. Jitolbu bil-qalb lil Alla u jistennew li ma jdumux ma jinħelsu mit-tbatija li jinsabu fiha.