IL-PAPA LJUN XIV
ANGELUS
Pjazza San Pietru
Il-Ħadd, 31 ta’ Awwissu, 2025
Għeżież ħuti,
qabel ma ntemmu din iċ-ċelebrazzjoni – tant mistennija – nixtieq insellem u rrodd ħajr lilkom ilkoll li ġejtu tant numerużi biex tagħmlu festa lil dawn iż-żewġ Qaddisin ġodda! Insellem b’għożża lill-Isqfijiet u l-Presbiteri. Nilqa’ b’rispett lid-Delegazzjonijiet uffiċjali u lill-Awtoritajiet distinti.
F’din l-atmosfera, sabiħ niftakru li lbieraħ il-Knisja żżejnet b’żewġ Beati ġodda. F’Tallin, il-kapitali tal-Estonia kien beatifikat l-Arċisqof ġiżwita Edoardo Profittlich, li nqatel fl-1942 waqt il-persekuzzjoni tar-reġim sovjetiku fuq il-Knisja. U f’ Verszprém, fl-Ungeija, kienet beatifikata Maria Maddalena Bódi, lajka żgħażugħa, li nqatlet fl-1945 għax irreżistiet lil xi suldati li riedu jużaw il-vjolenza fuqha. Infaħħru lill-Mulej għal dawn iż-żewġ martri, xhieda kuraġġużi tas-sbuħija tal-Evanġelju!
Inħallu f’idejn il-Qaddisin u f’idejn il-Verġni Maria, it-talb tagħna bla heda għall-paċi, speċjalment fl-Art Imqaddsa u fl-Ukrajna, u f’kull art imdemmija bil-gwerra. Lill-governanti ntennilhom: isimgħu l-vuċi tal-kuxjenza! Ir-rebħiet apparenti riżultat tal-armi, li jiżirgħu l-mewt u l-qerda, fil-verità huma telfiet li qatt ma jistgħu jġibu l-paċi u s-sigurtà!
Alla ma jridx il-gwerra, irid il-paċi, u jwieżen lil min jimpenja ruħu biex joħroġ mill-ispirali tal-mibegħda u jfittex it-triq tad-djalogu.
Miġjub għall-Malti minn Joe Huber