IL-PAPA LJUN XIV
REGINA CAELI
Pjazza San Pietru
It-Tnejn tal-Anġlu, 6 ta’ April, 2026
Għeżież ħuti, Kristu rxoxta! L-Għid it-tajjeb!
Din it-tislima, mimlija stagħġib u ferħ, se tibqa’ magħna l-ġimgħa kollha. Hi u tiċċelebra l-jum ġdid li l-Mulej għamel għalina, il-liturġija qed tiċċelebra d-dħul tal-ħolqien kollu fiż-żmien tas-salvazzjoni: id-disperazzjoni tal-mewt tneħħiet għal dejjem f’isem Ġesù.
L-Evanġelju tal-lum (Mt 28, 8-15) jitlobna nagħżlu bejn żewġ rakkonti: jew dak tan-nisa li ltaqgħu mal-Irxoxt (v. 9-11), inkella dak tal-għassiesa, korrotti bil-flus tal-kapijiet tas-sinedriju (v. 11-14). Dawk tal-ewwel ħabbru r-rebħa ta’ Kristu fuq il-mewt; tat-tieni ħabbru li l-mewt rebbieħa dejjem u kull kif. Infatti, fil-verżjoni tagħhom, Ġesù ma rxuxtax imma l-katavru tiegħu kien insteraq. Mill-istess fatt, mill-qabar vojt, jinstiltu żewġ interpretazzjonijiet: “waħda għajn ta’ ħajja ġdida u eterna, l-oħra ta’ mewt ċerta u definittiva.
Dal-kuntrast iġagħalna nirriflettu fuq il-valur tax-xhieda nisranija u dwar l-onestà tal-komunikazzjoni umana. Infatti, spiss, ir-rakkont tal-verità jinħeba mill-fake news, kif ngħidu llum, jiġifieri mill-gideb, allużjonijiet u akkużi bla bażi. Quddiem dawn l-ostakli, però, il-verità ma tibqax moħbija, anzi: tiġi tiltaqa’ magħna, ħajja u raġġjanti, iddawwal id-dlam l-aktar oħxon. Bħalma qal lin-nisa li marru ħdejn il-qabar, Ġesù llum jgħid lilna wkoll: “Tibżgħux! Morru wasslu l-aħbar” (v.10). Hekk, hu stess isir il-bxara t-tajba li għandna nħabbru lid-dinja: l-Għid tal-Mulej hu l-Għid tagħna, l-Għid tal-umanità, għax dal-bniedem, li miet għalina, dejjem ħaj u preżenti, jeħles l-imgħoddi minn tmien qerried, biex it-tħabbira tal-Għid tifdi l-ġejjieni tagħna mill-qabar.
Għeżież, kemm hu importanti li dan l-Evanġelju jasal, fuq kollox, għand min hu mgħakkes mill-krudeltà li tikkorrompi l-istorja u tħawwad il-kuxjenzi! Qed niftakar fil-popli mifluġin mill-gwerra, fl-insara persegwitati minħabba l-fidi tagħhom, fit-tfal li m’għandhomx aċċess għall-edukazzjoni. It-tħabbir tal-Għid ta’ Kristu bil-kliem u bl-opri jfisser li nagħtu vuċi ġdida lit-tama, li altrimenti tisfa’ fgata mill-idejn vjolenti. Infatti, meta l-Bxara t-Tajba titħabbar fid-dinja, tiċċara kull dell, f’kull żmien.
B’għożża speċjali, fid-dawl tal-Irxoxt, illum niftakru fil-Papa Franġisku li propju nhar it-Tnejn tal-Anġlu tas-sena l-oħra radd ħajtu lill-Mulej. Waqt li niftakru fix-xhieda kbira ta’ fidi u ta’ mħabba tiegħu, nitolbu flimkien lill-Verġni Marija, Tron tal-Għerf, sabiex insiru ħabbara dejjem aktar imdawla tal-verità.
Wara r-Regina Coeli
Għeżież ħuti!
Insellem minn qalbi u nagħti merħba lilkom ilkoll, għeżież pellegrini mill-Italja u minn diversi pajjiżi. Insellem, partikolarment liż-żgħażagħ tad-Dekanat minn Appiano Gentile. Nerfa’ ħsiebi lejn min, f’diversi nħawi tad-dinja, qed jieħu sehem fl-inizjattivi mnedija fl-okkażjoni tal-Jum Internazzjonali tal-Isports għall-Iżvilupp u l-Paċi, waqt li nġedded l-appell biex l-isports, bil-lingwaġġ universali ta’ fraternità tiegħu, ikun benniena ta’ inklużjoni u paċi.
Irrodd ħajr lil kulmin, f’dal-ġranet wassalli l-awguri għal Għid Qaddis. Jien rikonoxxenti l-aktar għat-talb; bl-interċessjoni tal-Verġni Marija, Alla għad irodd lura lil kulħadd id-doni tiegħu! Nawguralkom li tqattgħu bil-ferħ u l-fidi dan it-Tnejn tal-Anġlu u dal-jiem tal-Ottava tal-Għid li bihom tittawwal iċ-ċelebrazzjoni tal-Qawmien ta’ Kristu. Nipperseveraw fit-talb ħerqan tagħna għad-don tal-paċi għad-dinja kollha.
It-Tnejn tal-Anġlu t-tajjeb!
Miġjub għall-Malti minn Joe Huber