Fl-Isem tal-Missier u tal-Iben u tal-Ispirtu s-Santu
Mulej, Alla tiegħi, ruħi bil-għatx għalik.
1. Niftħu qalbna għall-Kelma t’Alla
F’dak iż-żmien, Ġesù qal lid-dixxipli tiegħu din il-parabbola: “Is-Saltna tas-Smewwiet ixebbħuha ma’ għaxar xebbiet li ħarġu bl-imsiebaħ tagħhom biex jilqgħu l-għarus. Ħamsa minnhom kienu boloh u ħamsa għaqlin, il-boloh ħadu l-imsiebaħ imma ma ħadux żejt magħhom, waqt li l-għaqlin ħadu mhux biss l-imsiebaħ iżda wkoll iż-żejt fil-kwies. L-għarus iddawwar ma ġie, u għalhekk ilkoll ħadhom in-ngħas u raqdu.
Imbagħad f’nofs ta’ lejl instama’ min jgħajjat: “Ara l-għarus! Oħorġu ilqgħuh!”. Dawk ix-xebbiet qamu lkoll u ħejjew l-imsiebaħ tagħhom. Iżda l-boloh qalu lill-għaqlin: “Agħtuna ftit żejt minn tagħkom, għax l-imsiebaħ tagħna jintfew”. Qabżu l-għaqlin u qalu: “Għandu mnejn ma jibqax biżżejjed, la għalina u lanqas għalikom! L-aħjar morru għand tal-ħanut u ixtru għalikom”.
Xħin dawk marru biex jixtru jiġi l-għarus; dawk li kienu lesti daħlu miegħu għall-festa tat-tieġ, u l-bieb ingħalaq. Saflaħħar waslu wkoll ix-xebbiet l-oħra, u bdew jgħidu: “Sinjur, Sinjur, iftħilna!”. Iżda hu weġibhom u qal: “Tassew, ngħidilkom, lilkom ma nafkomx”.
Ishru, mela, għaliex la tafu l-jum u lanqas is-siegħa”. Mt 25, 1-13.
2. Riflessjoni/talba:
i. Is-Saltna tas-Smewwiet ixebbhuha ma’ għaxar xebbiet li ħarġu bl-imsiebaħ tagħhom biex jilqgħu l-għarus.
Meta nazzardaw naħsbu fuq il-futur
faċli nqabbluh ma xi tip ta’ diżastru
li jiġi u jeqred u jieħu dak li rridu nipproteġu.
Għal Ġesù huwa ċ-ċertezza
li x-xewqa profonda li nġorru (xebbiet bl-imsiebaħ)
tasal għall-milja fil-laqgħa sabiħa mal-għarus.
Irrifletti:
- Kif tħares lejn il-futur?
ii. Ħamsa minnhom kienu boloh u ħamsa għaqlin, il-boloh ħadu l-imsiebaħ imma ma ħadux żejt magħhom, waqt li l-għaqlin ħadu mhux biss l-imsiebaħ iżda wkoll iż-żejt fil-kwies. L-għarus iddawwar ma ġie, u għalhekk ilkoll ħadhom in-ngħas u raqdu.
Iċ-ċertezza tal-futur
ma tneħħi xejn mill-inċertezza taż-żmien.
Il-lejl jaf jieħu t-tul
l-għarus jaf jiddawwar.
Hemm bżonn impenn
f’dak li jiġġenera tama
f’dak li jiġġenera fiduċja.
Irrifletti
- X’jgħinek iżżomm it-tama ħajja?
iii. Imbagħad f’nofs ta’ lejl instama’ min jgħajjat: “Ara l-għarus! Oħorġu ilqgħuh!”. Dawk ix-xebbiet qamu lkoll u ħejjew l-imsiebaħ tagħhom. Iżda l-boloh qalu lill-għaqlin: “Agħtuna ftit żejt minn tagħkom, għax l-imsiebaħ tagħna jintfew”. Qabżu l-għaqlin u qalu: “Għandu mnejn ma jibqax biżżejjed, la għalina u lanqas għalikom! L-aħjar morru għand tal-ħanut u ixtru għalikom”.
Hemm bżonn relazzjoni tajba maż-żmien!
Il-boloh ottimisti b’mod superfiċjali:
jibqgħu ma jimmaġinawx x’jista’ jinqala
jibqgħu ma jaħsbux li l-għarus jista’ jiddawwar
li l-fjamma tal-imħabba trid iżżomma ħajja kuljum.
L-għaqlin jagħrfu l-bżonn, jagħrfu x’jista’ jinqala,
u ta’ kuljum jieħdu ħsieb
f’kull mument jieħdu responsabbiltà
Għax jafu li xi ħin, l-għarus jiġi, l-imħabba sseħħ.
Irrifletti
- Kif tgħix il-mument preżenti?
3. Missierna