Mhux l-ewwel darba li nkun għaddej kemm fl-isptar Sir Anthony Mamo u kif ukoll f’dak ta’ Mater Dei u nisma’ lil xi ħadd jgħid: Ara l-Father tat-televixin! U jgħid veru. Għax, minn żmien għal żmien, inkun mistieden għall-programm F’Living Show mal-ħabib dejjem antik u ġdid tiegħi Karl Bonaci.
L-istorja tiegħi fuq it-televiżjoni tmur lura għal ħafna snin. U, din l-istorja, hi dejjem imżewqa u parallela ma’ dik tar-radju. Niftakar li fis-sena 1998 kont mistieden għall-programm Pjazza Tlieta,li kien kollu fuq is-sejħa għall-ħajja tal-kunvent. Niftakarna li konna Patrijiet u Sorijiet għall-programm. Aqta’ kif żewwaqnieh l-istudjo tal-PBS! Dak iż-żmien kien tassew żmien tabilħaqq partikulari. Niftakar iċ-ĊIR, jew aħjar Ċentru ta’ Istituti Reliġjużi, immexxi mill-għażiż ħabib u ħija li nibqa’ ngħożż għal ħajti kollha, Fr Tony Sciberras MSSP u miegħu Sr Tessie Bezzina OSA. Dak kien żmien tad-deheb għalija u għal ħafna postulanti, novizzi u post-novizzi fil-ħajja ikkonsagrata. Kien żmien fejn ġejna mgħallma ħwejjeġ tabilħaqq kbar, importanti u li jiswew mitqlu deheb għall-ħajja. Kien żmien fejn għexna d-diversità tal-kariżmi li jħaddnu l-Istituti tagħna fil-kariżma li tgħaqqadna ilkoll flimkien bħala familja waħda fil-ħajja ikkonsagrata: il-fraternità.
Esperjenzi oħra
Minn hemm il-Mulej beda jiftaħni, bil-mod il-mod, għad-dinja tat-televiżjoni u anki tar-radju. Niftakar li fil-programm tar-radju li kien itella’ ħija u ħabib Patri Philip Cutajar OFM Cap fis-sena 1997 fuq l-istazzjon RTK, Fejjaqni Mulej, jiena u post-novizz ieħor Kapuċċin bħali konna mmorru nieħdu t-telefonati off air. Dik kienet esperjenza qawwija ta’ x’jiġifieri tisma’. Kemm il-karba għall-għajnuna kelli l-grazzja nisma’! U kemm ukoll kelli l-grazzja li nisma’ persuni li kienu jħossuhom waħedhom u li l-uniku refuġju tagħhom kien li jċemplu l-RTK biex jiftħu qalbhom ħalli jtaffu xi ftit mill-uġiegħ li kienet qed tikkawżalhom is-solitudni.
Wara li qaddist, il-Mulej kompla jiftaħli l-kamp tar-radju u tat-televiżjoni ġmielu. L-ewwel nett bil-progamm fuq Radju Marija Jgħannilek Fommi. Kont qattajt l-isbaħ sentejn nagħmel dan il-programm flimkien ma’ żewġ lajċi impenjati. Niftakar ukoll li f’dawk iż-żminijiet konna nagħmlu l-quddiesa ta’ billejl mill-istudjos ta’ Radju Marija kull l-ewwel ġimgħa tax- xahar. Ġieli kont immur wara tnax-il siegħa xogħol fl-Isptar Mater Dei filwaqt li l-jum tal-għada kien ikolli nqum fil-5.40 am għall-quddiesa tal-ewwel fl-isptar, li kienet tkun tas-6.30 pm. Xi żminijiet tad-deheb kienu dawk!
Ma’ dan iż-żmien tabilħaqq sabiħ u ta’ kuraġġ liema bħalu nsemmi l-esperjenza mill-isbaħ li l-Mulej kien tani fuq l-istazzjon tar-radju Big 107. Kemm il-Mulej tana l-grazzja li ntellgħu programmi ta’ diskussjoni, qsim ta’ esperjenzi u, fuq kollox, ta’ talb fuq dan l-istazzjon tal-komunità! Kemm-il darba dħalt kważi f’nofs ta’ lejl il-kunvent. Bilfors! Daqskemm kienu jċemplu nies fuq il-programm! Mill-Big 107 il-Mulej għallimni xi tfisser li tagħti ċans nies li jitħaddtu on air.
Aktar tard għamilt żmien fejn tajt il-kontribut tiegħi fil-Komunità Tiġi Saltnatek u anki kont inkun fuq il-progamm li kienet ittella’ l-komunità fuq Smash TV. Ma’ dan insemmi wkoll il-grazzja li l-Mulej kien tani meta kont għamilt xi programmi fuq DJ Radio fi ħdan l-istess komunità. L-istorja issuktat taqdef aktar ‘il quddiem sakemm fl-aħħar sibt ruħi fuq Radju Malta nagħmel programm ma’ Ivan Bartolo filwaqt li wara konna issuktajna fuq Xejk TV u Net TV bil-programm Frux. Fl-isfera tar-radju, ma’ Clint Bajada konna għamilna sensiela ta’ programmi fuq ONE Radio bit-titlu Mill-iskola tal-ħajja. Anki hawn kien hawn ftuħ tabilħaqq interessanti. Niftakarni ngħidlu lil Clint: Kemm hu sabiħ l-istudjo li għandkom hawn. Kemm hu komdu. Dan biex ma nsemmix id-diversi drabi li ġejt mistieden għal xi programmi li huma marbuta mal-Milied li jtella’, minn żmien għall-ieħor, l-istess One Radio.
Sadanittant, fix-xena tat-televiżjoni, il-Mulej fetaħli l-bieb permezz tal-ħabib tiegħi u ħija Karl Bonaci. Miegħu rajt il-programm F’Living Show jitwieled, jikber u jissaħħaħ sa ma jitla’ fil-quċċata tal-aktar programm televiż ta’ wara nofsinnhar segwit fil-Gżejjer Maltin. Din l-esperjenza kienet u għadha tant sabiħa. Bħalma ħafna jafu, għal ħafna żmien konna nkunu fil-programm Karl, Natius Farrugia u jien. Minn din l-esperjenza jien issuktajt nitgħallem dak li Papa Franġisku ilu jtambar fuqu għal dawn l-għaxar snin sħaħ: l-importanza li s-saċerdot jisma’, jisma’, jisma’. U jien, ta’ sempliċi Patri Kapuċċin, midneb, marid u limitat kif jien, ippruvajt nisma’, nisma’, nisma’… Nammetti, mhux faċli tisma’. Kemm-il darba kelli aptit naqbeż fin-nofs ħa nuri x’naf. Imma le! Ippreferejt li noqgħod fuq is-seat ta’ wara biex nisma’, nisma’, nisma’… Sakemm fl-aħħar ingħatajt, b’ħafna imħabba, rispett u għożża, iċ-ċans li nwieġeb. U, iwa, ġejt mgħejjun jien ukoll biex inwieġeb ħalli t-tweġiba tiegħi ma tkunx rejazzjoni ta’ mument imma faraġ li jfejjaq id-disprament. Is-sabiħa hi li jien stajt nagħmel dan fil-fraternità, man-nies li miegħi kienu fuq il-programm u qatt waħdi, sulu u magħluq f’xi bozza ta’ superfiċjalità li tinten is-seba’ pesti.
Illum
Għall-grazzja tal-Mulej illum din l-esperjenza għadha għaddejja. Bħalma tafu, minn żmien għal żmien Karl għadu jistedinni biex flimkien nitħaddtu fuq xi ħaġa li l-Mulej jurina u li hi mportanti li nitħaddtu fuqha.
Kemm nieħu gost immur għall-programm F’Living Show. Dan l-għaliex l-esperjenza tagħna fil-programm ma tkunx sempliċiment show fis-sens ta’ divertiment bissimma wirja ta’ tagħlim, sapport, smiegħ u kuraġġ. Id-djalogi li jkolli ma’ Karl fuq il-programm nibqa’ ngħożżhom l-għaliex fihom ikun hemm kliem-mediċina li jfejjaq il-qlub u jfarraġ fejn il-qalb tkun muġugħa, ir-ruħ dgħajfa u l-moħħ għajjien. Barra minhekk, f’dawn il-programmi nħoss ukoll il-preżenza tat-telespettaturi li għalija, bħalma żgur huma għal ħija u ħabibi Karl, huma ħutna. Dawn ħutna li jkollhom bżonn ta’ dik il-kelma li ttellagħhom ‘il fuq. Nammetti, minix xi professur, espert jew ma nafx xiex. Biss jiena l-Patri li jħobb jisma’ u jħalli lill-Mulej jgħallmu permezz tan-nies, tas-sitwazzjonijiet imlewna tagħhom u anki minn dak li ngħaddi jiena stess. Jiena STUDENT TAL-ISPRITU S-SANTU, il-Mulej li jagħti l-ħajja. U din il-verità nħobb inxandarha minn fuq il-bjut ħa tidwi mal-erbat irjieħ tad-dinja għax inħoss li tiġbor fil-qalba tagħha dak li tassew jien.
Ħija Patri Mariano
Wieħed mill-mudelli tiegħi fid-dinja tat-televiżjoni hu ħija l-Kapuċċin Patri Mariano da Torino. Dan kien il-Patri Kapuċċin li kien jgħid lil kulħadd: Pace e bene a tutti, li bl-ilsien għażiż tagħna tfisser Paċi u ġid lil kulħadd. Fil-ħajja televiżiva u anki personali ta’ Patri Mariano dan ma kienx sempliċiment awgurju li kien iħobb jagħmel fuq it-televiżjoni imma kien ifisser tassew l-essenza ta’ ħajtu. Dan kien l-awgurju li kien jiftaħ u jagħlaq kull trażmissjoni televiża tiegħu lill-udjenza tat-telespettaturi li kienet tlaħħaq bejn il-15 sas-17-il miljun ruħ u li kienet issegwih kull nhar ta’ Tlieta fuq RAI UNO. Il-Patri twil, b’saħħtu, b’leħja daqshiex, b’ħarstu penetranti u bi tbissima li tilqa’ lil kulħadd, Patri Mariano kellu f’qalbu post għal kulħadd. U dan it-telespettaturi kienu jafuh għax kienu jħossuh!
Patri Mariano, mis-sema fejn int qiegħed, għin lil Patri Mario jkun bħalek. Ibqa’ ħeġġu ħa jitlob qabel jidher fuq it-televiżjoni ħalli fih jidher Ġesù mhux hu. U, bilħaqq, ibqa’ fakkru u tanbarlu ħalli f’għeluq kull trażmissjoni jitlob dik it-talba u jagħti dik il-barka li tinkludi lil kulħadd. Mill-bqija, ħu naqra paċenzja bih u ibqa’ tambarlu għax għandu ħabta kif jinsa’. Int tifhmu għax, wara kollox, hu Kapuċċin bħalek, wieħed minn ta’ ġewwa!
Berikna Patri Mariano!
Patri Mario Attard OFM Cap