IL-PAPA LJUN XIV
REGINA CAELI
FI TMIEM IL-QUDDIESA
Pjazza San Pietru
Il-Ħadd, 1 ta’ Ġunju, 2025
Fi tmiem din l-Ewkaristija, nixtieq insellmilkom ilkoll minn qalbi, intom li qed tieħdu sehem fil-Ġublew tal-Familji, tat-Tfal, tan-Nanniet u tal-Anzjani!
Ġejtu minn kull naħa tad-dinja; hawn delegazzjonijiet minn mija u wieħed u tletin pajjiż. Inħossni hieni nilqa’ tant tfal, li jagħtu ħajja ġdida lit-tama tagħna! Insellem lill-familji kollha, knejjes domestiċi żgħar, li fi ħdanhom l-Evanġelju huwa milqgħuh u mgħoddi minn ġenerazzjoni għal oħra. Il-familja – kien jgħid San Ġwanni Pawli II – taf il-bidu tagħha lill-imħabba li biha l-Ħallieq iħaddan il-ħolqien kollu (Ittra Gratissimum sane, 2). Jalla l-fidi, it-tama u l-karità jitkattru dejjem fil-familji tagħna. Tislima speċjali lin-nanniet u lill-anzjani. Intom il-mudell ġenwin tal-fidi u ispirazzjoni għall-ġenerazzjonijiet żgħażagħ. Grazzi li ġejtu hawn!
Insellem ukoll lill-pellegrini kollha li hawn preżenti, partikolarment lil dawk mid-Djoċesi ta’ Mondovì, fil-Piemonte.
Illum, fl-Italja u f’diversi pajjiżi ssir iċ-ċelebrazzjoni tat-Tlugħ fis-Sema tal-Mulej. Festa sabiħa li tgħinna nħarsu lejn l-għan tal-vjaġġ tagħna fid-dinja. B’dal-ħsieb infakkar li lbieraħ fi Braniewo, fil-Polonja, kienu beatifiakti Cristofora Klomfass u erbatax-il konsorelli tal-Kongregazzjoni ta’ Santa Katerina Verġni u Martri, li nqatlu fl-1945 mis-suldati tal-Armata l-Ħamra f’territorji li llum jagħmlu parti mill-Polonja. Minkejja l-klima ta’ mibegħda u terrur kontra l-fidi kattolika, kienu baqgħu jservu lill-morda u lill-orfni.
Nafdaw fl-interċessjoni ta’ dawn il-Beati l-ġodda lir-reliġjużi nisa kollha li fid-dinja jagħtu ħajjithom bil-ġenerożità għas-Saltna t’Alla.
Infakkar ukoll li llum hu l-Jum Dinji tal-Komunikazzjonijiet Soċjali u rrodd ħajr lill-operaturi tal-medja li bl-attenzjoni li jagħtu lill-kwalità etika tal-messaġġi, jgħinu lill-familji fil-qadi tad-dmirijiet edukattivi tagħhom.
Jalla l-Verġni Marija tbierek il-familji u ssostniehom fid-diffikultajiet tagħhom: niftakar speċjalment f’dawk li qed isofru minħabba l-gwerra fil-Lvant Nofsani, fl-Ukrajna u fi nħawi oħra tad-dinja. L-Omm t’Alla tgħinna nimxu flimkien fit-triq tal-paċi.
Miġjub għall-Malti minn Joe Huber