IL-PAPA LJUN XIV
ANGELUS
Pjazza San Pietru
XXVII Ħadd taż-Żmien Ordinarju
Il-Ħadd, 5 ta’ Ottubru, 2025
Għeżież ħuti,
Qabel ma nitolbu l-Angelus flimkien, nixtieq insellem u rrodd ħajr lilkom ilkoll li ħadtu sehem f’diċ-ċelebrazzjoni ġjubulari dedikata lill-missjunarji u lill-migranti. Intom missjunarji tajbin għax ġejtu minkejja x-xita! Grazzi! Il-Knisja hi missjunarja kollha kemm hi u hi wkoll poplu kbir f’mixja lejn is-Saltna t’Alla. Illum iffakkruna dan ħutna l-missjunarji rġiel u nisa u l-migranti. Imma ħadd m’għandu jkun imġiegħel jitlaq minn daru jew pajjiżu, u lanqas jisfa sfruttat jew ittrattat ħażin minħabba l-kundizzjoni tiegħu ta’ persuna fil-bżonn jew għax frustier! Quddiem nett dejjem hemm id-dinjità umana!
Insellem lill-pellegrini kollha, partikolarment li dawk mid-Djoċesi ta’ Pavia mmexxijin mill-Isqof; kif ukoll lill-fidili, fosthom xi żgħażagħ minn Betlehem, li qed iġorru l-istatwa tal-Verġni tar-Rivelazzjoni.
Nhar it-Tlieta 30 ta’ Settembru, terremot kbir laqat ir-reġjun ċentrali tal-Gżejjer Filippini, partikolarment il-provinċja ta’ Cebu u l-provinċji tal-madwar. Nesprimi l-qrubija tiegħi mal-għażiż poplu filippin, u nitlob għal dawk li għaddejjin minn prova iebsa minħabba l-konsegwenzi tat-terremot. Ejjew nibqgħu magħqudin u solidali bil-fiduċja f’Alla u bl-interċessjoni tal-Omm tiegħu, f’kull periklu.
Nesprimi t-tħassib kbir tiegħi minħabba li fid-dinja qed terġa’ terfa’ rasha l-mibegħda anti-semita kif, sfortunatament, rajna ftit jiem ilu bl-attentat terroristiku f’Manchester. Għadni nħoss qalbi tingħafas bla qies minħabba t-tbatija terribbli li għaddej minnha l-poplu palestinjan f’Gaża.
Dan l-aħħar siegħat, fis-sitwazzjoni drammatika fil-Lvant Nofsani, saru passi importanti ‘l quddiem fit-trattattivi għall-paċi, u nawgura li r-riżultati li qed nittamaw ma jdumux ma jaslu. Nitlob lil kull min hu responsabbli biex jibqa’ impenjat f’dit-triq, biex iwaqqaf l-armi u jeħles lill-ostaġġi, filwaqt li neżorta lil kulħadd biex nibqgħu magħqudin bit-talb, ħalli dawn l-isforzi jwasslu għat-tmiem dil-gwerra u jmexxuna lejn paċi ġusta u dejjiema.
Ningħaqdu spiritwalment ma’ kulmin hu miġbur fis-Santwarju ta’ Pompej għas-Supplika lill-Verġni Marija tar-Rużarju Mqaddes. Matul dax-xahar ta’ Ottubru, aħna u nikkuntemplaw flimkien ma’ Marija l-misteri ta’ Kristu Salvatur, ejjew inżidu sfiq it-talb tagħna għall-paċi: talb li jsir solidarjetà konkreta mal-popolazzjonijiet imkissrin mill-gwerra. Grazzi lill-bosta tfal li, madwar id-dinja kollha, huma impenjati fir-reċita tar-Rużarju għal din l-intenzjoni. Grazzi mill-qalb!
Angelus Domini …
Miġjub għall-Malti minn Joe Huber