Minn Fr Jimmy Bonnici
Fl-Isem tal-Missier u tal-Iben u tal-Ispirtu s-Santu
Ħa tkun, Mulej, it-tjieba tiegħek fuqna,
kif fik hi t-tama tagħna.
- Niftħu qalbna għall-Kelma t’Alla
F’dak iż-żmien, Ġesù qal lid-dixxipli tiegħu: “Tħallux qalbkom titħawwad! Emmnu f’Alla, u emmnu fija wkoll. Fid-dar ta’ Missieri hemm ħafna postijiet. Li ma kienx hekk, kont ngħidilkom: ‘Sejjer inħejjilkom fejn toqogħdu?’. U meta mmur u nħejjilkom post, nerġa’ niġi biex neħodkom miegħi biex, fejn inkun jien, tkunu intom ukoll. U t-triq għall-post fejn sejjer tafuha”.
Tumas qallu: “Mulej, aħna ma nafux fejn inti sejjer. Kif nistgħu nafu t-triq?”. Wieġbu Ġesù: “Jiena hu t-triq, il-verità u l-ħajja. Ħadd ma jmur għand il-Missier jekk mhux permezz tiegħi. Kieku għaraftu lili, kontu tagħrfu wkoll lil Missieri: minn issa ’l quddiem tagħrfuh, anzi diġà rajtuh”. Qallu Filippu: “Mulej, urina l-Missier, u jkun biżżejjed għalina”. Ġesù wieġeb: “Ili daqshekk magħkom, Filippu, u għadek ma għaraftnix? Min ra lili ra lill-Missier. Kif tgħidli: “Urina l-Missier?”. Ma temminx li jiena fil-Missier u l-Missier fija? Il-kliem li ngħidilkom jien, ma ngħidux minn moħħi iżda l-Missier li jgħammar fija qiegħed jagħmel l-opri tiegħu.
Emmnuni! Jiena fil-Missier u l-Missier huwa fija. Jekk mhux għal ħaġ’oħra, emmnuni minħabba dawn l-opri stess. Tassew tassew ngħidilkom, min jemmen fija hu wkoll għad jagħmel l-opri li qiegħed nagħmel jien, u akbar minnhom għad jagħmel, għax jiena sejjer għand il-Missier”. Ġwanni 14, 1-12
- Riflessjoni/talba:
i. “Tħallux qalbkom titħawwad! Emmnu f’Alla, u emmnu fija wkoll. Fid-dar ta’ Missieri hemm ħafna postijiet. Li ma kienx hekk, kont ngħidilkom: ‘Sejjer inħejjilkom fejn toqogħdu?’.
Bħala bniedem inħoss il-bżonn
dak il-post li jgħinni nagħraf
li jien niswa fl-għajnejn ta’ xi ħadd.
L-ispazji diġitali m’humiex biżżejjed!
Hemm post għalija fil-qalb ta’ Alla!
Irrifletti:
• X’għarfet Santa Teresa t’Avila meta qalet: “Tħallix xi jħabbtek, tħallix xi jtaqqlek. Min għandu ‘l Alla ma jonqsu xejn.”
ii. Tumas qallu: “Mulej, aħna ma nafux fejn inti sejjer. Kif nistgħu nafu t-triq?”. Wieġbu Ġesù: “Jiena hu t-triq, il-verità u l-ħajja. Ħadd ma jmur għand il-Missier jekk mhux permezz tiegħi.
It-triq għall-qalb t’Alla
hija l-istess qalb li dehret għalina
fi Kristu Ġesù.
Għix miegħu, bl-istil tiegħU!
Timxi, u tasal
u tinduna li l-imħabba hija vera
u li l-verità hija mħabba
u tinduna li l-verità t’Alla tagħti ħajja
u l-ħajja vera hija imħabba.
Irrifletti
• Fejn qbadt triq u sibt sqaq li jagħlaq? Ġesù kif differenti?
iii. Emmnuni! Jiena fil-Missier u l-Missier huwa fija. Jekk mhux għal ħaġ’oħra, emmnuni minħabba dawn l-opri stess. Tassew tassew ngħidilkom, min jemmen fija hu wkoll għad jagħmel l-opri li qiegħed nagħmel jien, u akbar minnhom għad jagħmel, għax jiena sejjer għand il-Missier”.
Mur poġġi kejl
għall-imħabba li toħroġ minn qalb li temmen!
Kif tista’ tagħmel limitu
għall-ġid li jsir min qalb magħquda m’Alla?
Emmen, ħalli lil Alla jgħammar fik,
u ssib li kulma tagħmel ikollu l-marka t’Alla.
Irrifletti
• Stagħġeb bil-wegħda ta’ Ġesù: “min jemmen fija hu wkoll għad jagħmel l-opri li qiegħed nagħmel jien, u akbar minnhom għad jagħmel”.
- Missierna