L-Ekoloġija integrali proposta mill-Papa Franġisku fl-Enċiklika Laudato Si’.
Il-Ħamis 12 ta’ Marzu 2018: Fiċ-Ċentru Notre Dame ta’ Ġerusalemm saret konferenza, organizzata mill-Kummissjoni għall-Ġustizzja, Paċi u Integrità tal-Ħolqien tal-Kustodja tal-Art Imqaddsa. Bħalissa l-Franġiskani qegħdin ifakkru t-tmien mitt sena minn mindu huma waslu fl-Art Imqaddsa (L-ewwel patrijiet kien waslu fl-1217, u San Franġisk innifsu fl-1219).
L-għan tal-konferenza kien li tgħin biex tissaħħaħ il-ħidma li nbdiet tmien mitt sena ilu. Għalhekk il-konferenza kienet ukoll esperjenza li laqqgħet flimkien esperjenzi u realtajiet minn kulturi u reliġjonijiet differenti. Dan għaliex il-kelliema għenu lil dawk preżenti jifhmu aħjar kif il-messaġġ tal-enċiklika kien validu mhux għall-insara biss imma għal kulħadd, hu x’inhu it-twemmin li jħaddnu. (Il-Papa Franġisku jirreferi għad-dinja bħala d-dar komuni tagħna).
Minbarra l-Kardinal Turkson li tkellem dwar kif l-ekoloġija integrali tiddependi fuq soċjeta integrali, rajna wkoll kif il-ħtieġa li nħarsu l-pjaneta toħroġ mit-tradizzjoni kristjana, dik lhudija kif ukoll dik musulmana (Prof. Mohammed S. Dajani Daoudi). Ir-Rabbi David Rosen tkellem dwar il-perspettiva lhudija tal-ekoloġija integrali, filwaqt li l-Prof. Stefano Zamagni għaqqad il-kunċett tal-ħniena ma’ dak tal-iżvilupp integrali tal-bniedem.
Il-Kummissjoni Interdjoċesana Ambjent ta’ pajjiżna rappreżentata f’din il-konferenza mis-Sur Mario Camenzuli u dan sewa biex:
- Nesperjenzaw perspettivi differenti tal-osservazzjonijiet u l-proposti tal-qdusija tiegħu l-Papa fl-enċiklika Laudato Si’
- Insiru nafu aħjar u napprezzaw aktar il-ħidma ta’ għadd ta’ persuni, gruppi u assoċjazzjonijiet minn madwar id-dinja, favur stil ta’ ħajja aktar sostenibbli.
- Naqsmu ma’ oħrajn l-esperjenza pożittiva tal-ħidma li qiegħda twettaq il-Kummissjoni Ambjent f’Malta, kif ukoll nitkellmu dwar l-isfidi li qegħdin jitfaċċaw kontinwament minn aspetti varji.
Wieħed jittama li l-kuntatti u l-esperjenzi li kellna matul din il-konferenza jkunu għajn ta’ opportunitajiet ġodda ħalli l-ħidma tal-KA tagħti dejjem aktar frott.
Ara d-dettalji tal-programm … LaudatoSi_Conference Jerusalem