F’Ottubru tal-2002 il-Papa Ġwanni Pawlu II żied ħames misteri fir-Rużarju biex jikkumplimentaw lil dawk tal-Ferħ, tat-Tbatija u tal-Glorja. Ħamsa u erbgħin sena qabel, fl-1957, San Ġorġ Preca kien għażel ħames episodji mill-ħajja ta’ Ġesù u sejħilhom bl-istess isem, il-Misteri tad-Dawl. Xtaq li l-membri tas-Soċjetà tad-Duttrina Nisranija, Museum, jitolbu dawn il-Misteri b’mod privat. F’dan il-filmat naraw ix-xebħ li hemm bejn il-misteri li għażel San Ġorġ Preca u dawk li inawgura l-Papa Ġwanni Pawlu II għall-Knisja universali, u li aħna nitolbuhom nhar ta’ Ħamis.
Vidjo minn Joe Galea
Il-Misteri tad-Dawl jiffukaw fuq mumenti importanti mill-ministeru pubbliku ta’ Ġesù Kristu.
1. Meta Sidna Ġesù Kristu tgħammed fix-xmara Ġordan.
2. Meta Sidna Ġesù Kristu wera min hu fit-tieġ ta’ Kana.
3. Meta Sidna Ġesù Kristu ħabbar is-saltna ta’ Alla u sejjaħ għall-indiema.
4. Meta Sidna Ġesù Kristu tbiddel quddiem l-appostli fuq il-muntanja Tabor.
5. Meta Sidna Ġesù Kristu waqqaf l-Ewkaristija, it-tifkira tal-misteru ta’ l-Għid.
Dawn il-misteri jissejħu “tad-Dawl” għax juru lil Ġesù bħala d-Dawl tad-Dinja u jgħinuna nifhmu aktar il-missjoni tiegħu ta’ salvazzjoni. San Ġorġ Preca kien iqis il-meditazzjoni fuq dawn il-ġrajjiet bħala mod biex aħna nersqu aktar lejn Kristu u ngħixu ħajja ta’ fidi, umiltà u mħabba.