Ġrajja tal-għaġeb riċenti dwar l-Ewkaristija Divina:
Kitba ta’Manwel Cutajar
Wara l-waqfien mill-ġlied tas-17 ta’ April 2026, Dun Marios Khairallah mar lura lejn il–Knisja Griega-Kattolika Melkitata’ San Ġorġ f’Tibnine fin-nofsinhar tal-Libanu, li kienet ġarrbet ħsarat kbar, fejn sab Ħobż Ewkaristiku kkonsagrat kompletament intatt u bla ħsara wara 47 jum.
Minħabba kunflitt qawwi, il-parroċċa kienet abbandunata kompletament mingħajr ebda servizz ta’ qima jew manutenzjoni għal kważi seba’ ġimgħat. Il-bini tal-knisja nnifsu kien mgħotti bit-tifrik u sofra ħsara strutturali sinifikanti.
L-Ostja: Il-knejjes Kattoliċi tal-Lvant jużaw ħobż bil-ħmira għall-Ewkaristija, li naturalment jitfawwar u jitħassar malajr meta jkun espost għall-elementi.
Minkejja l-abbandun ta’ 47 jum, din l-Ostja kkonsagrata baqgħet intatta.
Dun Khairallah innota wkoll li filwaqt li t-tabernaklu kien mgħotti bit-trab mill-qerda, is-Sagrament Imqaddes ġewwa ma kienx mittiefes.
Huwa rrimarka lill-midja :“Ġesù kien qed jistenniena”:
Ta’ min jgħid ukoll li Statwa fil-qrib tal-Verġni Marija baqgħet ukoll wieqfa kompletament f’nofs il-fdalijiet, li n-nies tal-post u l-parruċċani indikawha bħala sinjal ieħor ta’ tama.
Rapporti dwar din il-ġrajja infirxu malajr permezz ta’ pjattaformi tal-aħbarijiet Kattoliċi bħan-National Catholic Register u Zenit , fejn il-fidili lokali qed isejħulha Miraklu Ewkaristiku modern f’nofs id-devastazzjoni tal-gwerra.
Naturalment, s’issa, il-Knisja Kattolika lokali għadha ma ħarġet l-ebda dikjarazzjoni uffiċjali li jiddikjara formalment l-ġrajja bħala Miraklu Ewkaristiku.
Filwaqt li l-ġrajja iġġenerat rappurtaġġ mifrux fl-aħbarijiet u devozzjoni lokali profonda, għadha taħt il-fażi preliminari ta’ rappurtaġġ lokali biss aktar milli dikjarazzjoni formali tal-Vatikan jew tad-djoċesi.
Aktar dettalji ta’ din il-Ġrajja:
Il-Knisja ta’ San Ġorġ, parroċċa Griega-Kattolika Melkita li tinsab fir-raħal ta’ Tibnine (Tbenine) fin-nofsinhar tal-Libanu.
Fis-17 ta’ April 2026 , wara waqfien mill-ġlied lokali, il-kappillan tal-parroċċa, Dun Marios Khairallah, mar lura fil-knisja fejn jaqdi l-appostolat tiegħu li kienet ġiet milquta sew mill-gwerra. Huwa sab li l-ħobż ikkonsagrat bil-ħmira użat għal-Liturġija Divina Kattolika tal-Lvant kien baqa’ kompletament intatt u ħieles mill-moffa jew mit-taħsir, minkejja li tħalla waħdu għal 47 jum fost it-tifrik u l-umdità.
Filwaqt li Dun Khairallah innota li “m’hemm l-ebda spjegazzjoni xjentifika għaliex il-ħobż Ewkaristiku ma tħassarx,” il-parruċċani lokali jqisu din il-ġrajja bħala messaġġ spiritwali ta’ tama u tfakkira tal-Preżenza t’Alla matul il-gwerra aktar milli bħala ġrajja sopranaturali approvat formalment
.Dun Marios Khairallah, qal lil ACI MENA, is-servizz oħt bl-Għarbi ta’ EWTN News, li rritorna fil-belt Libaniża ta’ Tbenine fis-17 ta’ April wara l-waqfien mill-ġlied li kien daħal fis-seħħ. Meta daħal fil-knisja, imdawwar bi ħġieġ imkisser, sab il-ħobż ikkonsagrat eżattament fejn kien ħallieh ġimgħat qabel — l-istess minkejja l-assenza tan-nies għal 47 jum. Huwa ddeskriva l-iskoperta bħala konferma tal-Preżenza dejjiema ta’ Alla fost it-tbatija.
“Wara 47 jum, m’hemm l-ebda spjegazzjoni xjentifika għaliex il-ħobż ma tħassarx,” qal Khairallah. “Imma għalina, dan mhuwiex stramb, għax nemmnu li dan huwa l-ġisem ta’ Kristu. Din hija l-fidi tagħna, la hija ġdida u lanqas mhux familjari. Aħna nemmnu fil-preżenza ta’ Alla fl-Ewkaristija.”
Huwa qal li l-istorja kienet “messaġġ ta’ tama għall–parroċċa,” u żied jgħid: “Huwa veru li hemm qerda f’Tbenine. Imma hemm ukoll laqgħa ma’ Ġesù… Ġesù stenniena għal 47 jum, mingħajr preżenza umana.”
Khairallah innota wkoll li statwa tal-Verġni Marija baqgħet wieqfa f’nofs id-devastazzjoni, u ddeskriviha bħala “l-Omm li tistenna lil uliedha.”
Dun Khairallah tkellem ukoll dwar is-sitwazzjoni tar-residenti, fejn innota li l-belt hija d-dar ta’ madwar 55 familja Kattolika Melkita li ġew imġiegħla jitilqu minħabba l-gwerra. Wara l-waqfien mill-ġlied, xi wħud irritornaw temporanjament biex jiġbru ħwejjeġ u affarijiet oħra, filwaqt li l-biċċa l-kbira issa qed joqogħdu ma’ qraba, f’appartamenti mikrija, skejjel, monasteri, jew ma’ ħbieb.
Il-qassis irrimarka li l-għajnuna għadha kważi ineżistenti s’issa, ħlief għall-assistenza li waslet permezz ta’ missjoni Papali, filwaqt li xi individwi għenu biex jipprovdu l-mediċini.
Huwa faħħar ukoll ir-rwol tan-Nunzju Appostoliku fil-Libanu, l-Arċisqof Paolo Borgia, fejn iddeskrivieh bħala “ragħaj u missier veru li jieħu ħsieb kulħadd” u nnota li “jagħmel dak li ħadd ma jagħmel, iżurna anke taħt il-bumbardament.”
Fir-rigward tal-belt innifisha, huwa qal li tbati minn nuqqas kważi komplet ta’ neċessitajiet bażiċi: l-ebda ilma, l-ebda elettriku, u l-ebda internet, flimkien ma’ kesħa qawwija li taggrava l-kundizzjonijiet diġà diffiċli. Huwa spjega li l-biċċa l-kbira tar-residenti ta’ Tbenine huma ta’ mezzi limitati: irtirati, għalliema, suldati, u bdiewa mingħajr klassi għanja li tista’ tassorbi l-impatt tal-kriżi.
Il-Proċess ta’ Dixxerniment tal-Knisja
Il-liġi kanonika Kattolika teħtieġ investigazzjoni twila u rigoruża qabel ma avveniment straordinarju jkun jista’ jiġi ddikjarat uffiċjalment bħala miraklu. Dal-proċess jirrikjedi:
Reviżjoni Djoċesana: L-Eparkija Griega-Kattolika Melkita lokali trid l-ewwel twaqqaf Kummissjoni Kanonika formali biex tinvestiga l-fatturi ambjentali, il-vijabbiltà xjentifika, u l-elementi teoloġiċi tal-Ostja.
Il-Ġrajja trid ovvjament fl-aħħar mill-aħħar tiġi studjata sew mid-Dikasteru għad-Duttrina tal-Fidi tas-Santa Sede qabel ma jkun jista’ jinħareġ formalment xi digriet uffiċjali ta’ Awtentiċità Sopranaturali.
Peress li din il-ġrajja seħħet dan l-aħħar fl-aħħar ta’ April 2026, il-Knisja għadha ma lestietx jew ippubblikat ġudizzju formali.
Din l-istorja ġiet ippubblikata għall-ewwel darbaminn ACI MENA, is-servizz oħt tal-EWTN News bl-Għarbi, u ġiet tradotta u adattata minn EWTN News English