Il-Ħamis, 3 ta’ Awwissu 2023, Paulo, Mariana u Aljede kienu fost il-protagonisti , f’attivitá li saret, li għaliha attendew il-Papa Franġisku u membri ta’ Scholas Occurrentes, fil-kwartieri ġenerali Portugiżi tal-Fondazzjoni Pontifiċja f’Cascais, fin-Nofsinhar ta’ Lisbona. Kienu tlieta mill-għexieren ta’ eluf ta’ żgħażagħ, ta’ twemmin u sfondi differenti, li jappartjenu għall-moviment dinji Scholas għall-edukazzjoni, imwaqqaf fl-2013 u ispirat mis-sejħa tal-Papa Franġisku għat-trasformazzjoni tal-edukazzjoni globali fl-ispirtu tal-laqgħa u l-inklużjoni.
Il-Papa sema’ x-xhieda tat-tliet studenti żgħażagħ ta’ twemmin differenti – Evanġelista, Kattoliku u Musulman – u wieġeb għal mistoqsijiet tagħhom.
Il-Qdusija Tiegħu ħeġġiġhom fil-vjaġġ komuni tagħhom f’dinja mkissra, imbandla mill-kaos u mmarkata mill-firda, u ordnalhom biex ikomplu fl-isforzi tagħhom biex jgħinu fil-ħolqien ta’ dinja fejn il-fraternitá u l-ħarsien ta’ xulxin iġibu l-armonija. Ħafna mill-konverżazzjoni ħarġet mill-kontemplazzjoni ta’ pittura mal-ħajt ikkulurita li żejjen is-sala li fiha saret il-laqgħa. Il-‘kaos’ muri fil-pittura, qal il-Papa, jirrifletti r-realtá tal-univers u l-ħajja ta’ kull wieħed u kull waħda minna. “Il-ħajja hija mibdula mill-kaos tal-ħajja u tal-univers,” huwa nnota, iżda qal li huwa f’idejn kull wieħed minna biex isib it-triq tal-veritá u sbuħija.
Wara li ngħata pinzell, li bih saret il-pittura, l-Papa żied mal-mural ta’ Scholas, billi pinġa daqqa ċirkolari b’żebgħa ħadra li tħallat bla xkiel fit-totalitá. Hu wkoll kellu pittura, rigal għall-istudenti li kien jikkonsisti f’xogħol tal-arti taż-żejt tal-qedem fuq l-injam fi stil differenti ħafna, li juri lis-Samaritan it-Tajjeb.
Filwaqt li juri r-rappreżentazzjoni, stieden lil dawk preżenti biex qatt ma jibżgħu “jħammġu idejhom” u biex dejjem ikunu hemm għal dawk fil-bżonn.
“Meta tħammġu idejkom, tistgħu żżommu qalbkom nadifa”.
L-avveniment ta’ Cascais irrappreżentat okkażjoni tassew “informali” għall-Papa u għaż-żgħażagħ, fejn waqt li kien qed iberikhom, kantant żagħżugħ mela l-arja bin-noti melankoniċi tal-Fado, simbolu tal-kultura u t-tradizzjoni Portugiża.
Għal aktar tagħrif idħol fuq is-sit: https://www.vaticannews.va/en/pope/news/2023-08/pope-scholas-occurrentes-lisbon-world-youth-day-meeting-cascais.html