L-Uffiċċju għall-Edukazzjoni Reliġjuża għadu kif ippublika ħarġa oħra tad- Didàskalos – Għalliem.
L-Uffiċċju għall-Edukazzjoni Reliġjuża tal-Konferenza Episkopali Maltija kien imwaqqaf fl-2022 biex jieħu ħsieb l-Edukazzjoni Reliġjuża f’Malta u Għawdex. L-Edukazzjoni Reliżjuża huwa suġġett mgħallem fl-iskejjel tal-Istat, tal-Knisja u fl-iskejjel Indipendenti mill-1 Sena sal-11-il Sena.
Dan is-suġġett jipprova jressaq lejn xulxin id-dinja tar-Reliġjon u tal-Edukazzjoni biex flimkien u b’mod interdixxiplinari jipprovdi edukazzjoni sħiħa lill-istudenti fl-iskejjel. Huwa b’din ir-rikezza ta’ dawn iż-żewġ aspetti flimkien li l-istudenti jkollhom l-aħjar tagħlim, u li tagħmel lill-Edukazzjoni Reliġjuża suġġett li ma għandux l-iskop li jindottrina lill-istudenti imma li:
- jiskopru r-rikezza tar-reliġjon fil-kultura u fis-soċjetà li huma jgħixu fiha
- jindunaw bis-sabiħ f’persuni li jħaddnu reliġjonijiet u espressjonijiet ta’ fidi oħra
- jsiru konxji tal-potenzjal li għandu l-bniedem meta jħalli l-fidi sservi bħala gwida fil-ħajja
- jikxfu l-kapaċità moħbija li għandhom biex jagħmlu għażliet morali tajba u nfurmati
- jirrikonoxxu li l-Edukazzjoni Reliġjuża mhix biss suġġett għall-eżamijiet u għaċ-ċertifikati iżda hija vjaġġ tul il-ħajja kollha li fih il-persuna tiskopri lilha nnifisha bħala persuna f’relazzjoni ma’ Alla, mal-oħrajn u mal-ħolqien.
L-Uffiċċju huwa mmexxi minn Dun Dr Carl-Mario Sultana li bħala Delegat għall-Edukazzjoni Reliġjuża għandu l-missjoni tkopri dak kollu li għandu x’jaqsam mal-Edukazzjoni Reliġjuża bħala suġġett li jiġi mgħallem fl-iskejjel tal-Istat, tal-Knisja u Indipendenti.
Flimkien mal-Uffiċjali Edukattivi għat-Tagħlim tar-Reliġjon fi ħdan il-Ministeru tal-Edukazzjoni, id-Delegat għall-Edukazzjoni Reliġjuża jfassal u jħejji programmi ta’ tagħlim u sillabi biex jiġu mgħallma fl-iskejjel u jingħata taħriġ speċjalizzat lill-għalliema tar-Reliġjon biex dan it-tagħlim jibqa’ jingħata bl-aħjar mod possibbli.
Għal aktar tagħrif tista’ tfittex minn din il-paġna … https://cre.church.mt/mt/.
Tista’ wkoll tagħmel kunttat permezz ta’ email lil … cre@maltadiocese.org
Inkella b’telefonata fuq … 25906238