Minn Daniel Borg
Fl-omelija tal-lum il-Papa jgħid kif l-Ispitu Qaddis jiftaħ il-fruntieri. Papa Ljun jikkwota lil Benedittu XVI meta jgħid li l-Ispirtu Qaddis jgħinna nifhmu, u jgħin biex isewwi l-feriti miġjuba mill-firda tal-qalb u tal-moħħ. Hu jwassal biex ikisser dak kollu li jista’ jifridna minn bejnietna għax fil-Knisja kollha ndaqs. U hawnhekk il-Papa jgħid li l-Ispirtu Qaddis l-ewwel li jgħinna nkissru huma l-barrieri tal-qalb. L-Ispirtu s-Santu huwa r-rigal biex aħna niftħu ħajjietna għall-imħabba. Il-preżenza tiegħu tkisser l-ebusija tal-qalb; l-egoiżmu tagħna; il-biża li jżommna ankrati u li jġegħlna naħsbu biss fina nfusna. It-tieni, l-Ispirtu s-Santu jgħinnu nkissru l-barrieri ta’ bejn xulxin. Jekk aħna jkollna n-nifs ta’ Alla fuqna, ma nibqgħux naraw fl-oħrajn id-differenzi ta’ bejnietna imma l-affarijiet li jgħaqqduna.
F’dan il-kuntest ejjew inħallu l-Ispirtu ta’ Alla jiġi fuqna kemm għad-differenzi ż-żagħar, kif ukoll għall-kbar, kemm dawk fl-ambitu ta’ familjari u ħbieb, u kemm dawk ta’ bejn il-popli. Id-differenzi ta’ bejnietna speċjalment fil-familja u bejn il-ħbieb jistgħu iwasslu għal ħafna toqol. Jista’ jkun hemm id-differenzi ta’ bejnietna imma jrid ikun hemm ukoll ir-rieda li ninfetħu għal xulxin. Dawn jistgħu jidhru li ma nistgħux negħlbuhom imma għalhekk hemm l-Ispirtu Qaddis li minkejja l-iżbalji u l-limitazzjonijiet kollha tagħna, u forsi wkoll il-kliem ta’ weġgħa li nkunu għidna lil xulxin, jista’ jaħdem fina. U l-istess japplika għad-differenzi bejn in-nazzjonijiet, il-ġenoċidju li qed naraw fil-Palestina, il-gwerra fl-Ukrajna. Ma nistgħux nibqgħu indifferenti f’sitwazzjoni fejn forsi l-politika ħallietna mingħajr ebda tama. Imma b’danakollu it-tama li tankrana hi Ġesu u l-wegħdiet tiegħu li qatt ma ġew fix-xejn. Ejjew nitolbu lill-Ispirtu Qaddis ħalli nħalluh jaħdem fina.