24/06/2025: In-Network Teoloġiku Mediterranju (RTMed) ħareġ dikjarazzjoni b’saħħitha fejn jappella għal kelma ġdida, waħda meħtieġa u urġenti, favur il-paċi, id-dinjità tal-bniedem u d-djalogu interreliġjuż. L-istqarrija, intitolata “Necessary Word”, ġiet iffirmata minn teologi mis-soġġetti diversi tal-Mediterran u tirrifletti fuq il-kriżijiet attwali ta’ gwerra u vjolenza li għaddejjin f’reġjuni bħall-Ukrajna, l-Iran, Iżrael u Gaża.
Il-membri tan-Network qalu li t-tħassib tagħhom huwa wieħed li tnissel mill-uġigħ u t-talb. Huma rrikonoxxew is-sejħa tal-Papa Ljun, li nhar l-18 ta’ Ġunju 2025 qal: “Qatt m’għandna nidraw il-gwerra… għandna nirrifjutaw it-tentazzjoni li nirrikorru għal armi ”
Id-dikjarazzjoni tirreferi wkoll għall-Dokument dwar il-Fraternità Umana għall-Paċi Dinjija u Għixien flimkien (Abu Dhabi, 2019), iffirmat mill-Papa Franġisku u l-Gran Imam Ahmed el-Tayeb. Dan id-dokument jisħaq li r-reliġjonijiet qatt m’għandhom jintużaw biex jinkoraġġixxu l-mibegħda jew il-vjolenza. Meta jiġri hekk, dan ikun riżultat ta’ manipulazzjoni politika tar-reliġjon – prattika li in-Network jikkundanna bla tlaqliq.
It-teologi Mediterranji qed jitolbu lil komunitajiet reliġjużi differenti, speċjalment dawk fil-Mediterran, biex isibu lingwaġġ ġdid u profond li jippromwovi l-paċi u jikkundanna l-abbuż mill-kitbiet sagri li jintużaw biex ixerrdu l-mibegħda. Huma jtennu s-sejħa tal-Papa Franġisku f’Napli lura fl-2019 għal “narrattivi ġodda u kondiviżi li jitkellmu mal-qlub tan-nies u li jkunu mibnija fuq l-istorja u l-preżent.”
Skont id-dikjarazzjoni, id-dinja tinsab fil-periklu ta’ kunflitt ta’ proporzjonijiet katastrofiċi. Għalhekk, it-teoloġija ma tistax tkun indifferenti. Għandha tinħass ir-responsabbiltà li tisma’ l-għajta tal-vittmi kollha – kemm tal-preżent kif ukoll tal-passat – u li tagħmel kelmitha kelma ta’ ħajja u rikonċiljazzjoni.
F’din id-dikjarazzjoni, l-RTMed qed isejjaħ lill-komunitajiet, lill-fidili ta’ kull twemmin, u lil kull persuna ta’ rieda tajba biex jissieħbu fit-talb u fid-djalogu, mhux biss ma’ Alla imma wkoll bejnietna bħala bnedmin.
“It-teoloġija tagħna, il-mod kif nitkellmu fuq Alla, illum tintenni bħala kelma ġdida – kelma ta’ paċi li ġejja minn Alla,” tgħid id-dikjarazzjoni. Huma jtennu t-tama Nisranija fir-Reżurrezzjoni ta’ Kristu u fid-dikjarazzjoni mill-Apokalissi: “Ara, qiegħed nagħmel kollox ġdid” (Apk 21:5).
Id-dikjarazzjoni ta’ RTMed hija sejħa miftuħa għall-umanità kollha sabiex ma tibqax siekta quddiem it-tbatija u l-qerda. Hija sejħa biex il-kelma li nitkellmu dwar Alla tkun kelma ta’ tama, ġustizzja u paċi – għall-Mediterran, u għad-dinja kollha.
Sors: www.knisja.mt
Ritratt: www.knisja.mt/ritratti