Adorazzjoni – 1 Ħadd tar-Randan (Sena A)
Mixħutin, Mulej, quddiemek,
insejħulek u nitolbuk
biex, la tiġi bħala Mħallef,
tbiegħed minna l-korla tiegħek.
Missierna, Sliema, Glorja
Bi ħtijietna nqasna ħafna
kontra t-tjieba kbira tiegħek:
iżda int, Mulej, agħdirna,
xerred fuqna grazzja w maħfra.
Missierna, Sliema, Glorja
Ftakar, Sid ħanin, li aħna
opra tiegħek, għalkemm naqgħu;
tħalli qatt ġieħ l-isem tiegħek
ikun mogħti lil ħaddieħor.
Missierna, Sliema, Glorja
Warrab il-ħażin li ġmajna,
għin it-tajjeb tagħna w kattru,
biex inkunu nogħġbu lilek
f’kulma nagħmlu, issa w dejjem.
Missierna, Sliema, Glorja
Trinità qaddiesa u mbierka,
Alla wieħed, ‘tina l-grazzja
li b’għemejjel sħaħ u tajba
niġbru frott kotran ta’ ħajja.
Missierna, Sliema, Glorja
Silenzju 3min
Innu: ____________
Qari mill-Evanġelju skond San Mattew Mt 4:1-11
F’dak iż-żmien, l-Ispirtu ħa lil Ġesù fid-deżert biex ix-Xitan iġarrbu. U Ġesù baqa’ sajjem għal erbgħin jum u erbgħin lejl, u fl-aħħar ħadu l-ġuħ. U resaq it-tentatur u qallu: “Jekk inti Bin Alla, ordna li dan il-ġebel isir ħobż”. Iżda Ġesù wieġbu: “Hemm miktub: ‘Il-bniedem mhux bil-ħobż biss jgħix, iżda b’kull kelma li toħroġ minn fomm Alla’”.
Imbagħad ix-Xitan ħadu miegħu fil-Belt imqaddsa, qiegħdu fuq il-quċċata tat-tempju, u qallu: “Jekk inti Bin Alla, inxteħet għal isfel; għax hemm miktub li: ‘Lill-anġli tiegħu jordnalhom jieħdu ħsiebek, u li fuq idejhom jerfgħuk, ħalli ma taħbatx riġlek ma’ xi ġebla’”. Qallu Ġesù: “Hemm miktub ukoll: ‘Iġġarrabx lill-Mulej, Alla tiegħek’”.
Għal darb’oħra x-Xitan ħadu miegħu fuq muntanja għolja ħafna, urieh is-saltniet kollha tad-dinja u l-glorja tagħhom, u qallu: “Dawn kollha nagħtihom lilek jekk tinxteħet tadurani”. Imbagħad qallu Ġesù: “Itlaq, Xitan! Għax hemm miktub: ‘Lill-Mulej, Alla tiegħek, għandek tadura, u lilu biss taqdi’”.
Imbagħad ix-Xitan ħallieh. U minnufih ġew xi anġli u kienu jaqduh.
Il-Kelma tal-Mulej
Tifħir lilek Kristu
Silenzju 1min
Ġesù, għalkemm Int sirt bniedem bħalna, minn barra d-dnub; imma bħalna, Int ma kontx meħlus milli tiġi mġarrab. U għalhekk mill-bidu tal-ministeru tiegħek, sa fuq il-għuda tas-salib, Int ġejt imġarrab mix-xitan. (3 sek pawsa)
Il-Profeta Ħoseja jgħid: “Jiena lil għarusa tiegħi neħodha fid-deżert u lil qalbha nkellem”. U hekk għamilt Int, ħriġt fid-deżert, biex tkun f’relazzjoni mal-Missier, imma wkoll biex tħejji lilek innifsek qabel ma tibda l-missjoni pubblika tiegħek. U kien f’dak il-mument, lix-xitan ipprova jwaqqak, ipprova jħajjrek biex tkun Messija, mhux skont ir-rieda tal-Missier, imma skont ir-rieda tiegħu. Għinna Mulej, għax kontinwament, aħna niġu mġarrbin biex nagħmlu dak li jogħġob lilna u mhux dak li trid minna Int.
Silenzju 2 min
Niftakru li Ġesù għamel 40 jum fid-deżert: isum u jitlob. Huwa f’dak il-ħin, meta Int, o Ġesù, kont f’mument ta’ dugħfija fiżika, meta t-tentatur, ipprova jġarrbek. U kif għamel lilek, hekk jiġri lilna! Ix-xitan, jipprova jbegħdna milli nagħmlu r-rieda ta’ Alla f’ħajjitna. (3 sek pawsa)
U għalhekk, o Maħbub, nitolbuk biex tirbotna miegħek, ħalli fil-mument tal-prova, fil-mument tat-tiġrib, aħna nitwaħħdu miegħek, u nagħmlu r-rieda ta’ Alla f’ħajjitna kif miktuba fl-Iskrittura.
Jalla jkollna qalb miftuħa għall-Kelma ta’ Alla, biex fit-tiġrib, insibu l-qawwa.
Silenzju 3 min
Innu: ____________
Talbiet tal-Komunitá
Il-Mulej Alla tagħna, tana lil Ibnu, biex ikun mudell għalina. Mimlijin b’fiduċja fih, nressqulu dawn it-talbiet:
Mulej Ġesù, nitolbuk tieqaf mal-Knisja tiegħek, biex ma tagħmel qatt dak li jkun jixtieq it-tentatur. Nitolbu.
Mulej Ġesù, nitolbuk għall-mexxejja tal-art, biex bi kliemhom u għemilhom juru li jħobbuk. Nitolbu
Mulej Ġesù, nitolbuk għal dawk li huma esposti kontinwament għal kull tip ta’ tentazzjoni, biex tieqaf magħhom, u tgħinnhom fid-diffikultajiet tagħhom. Nitolbu.
Mulej Ġesù, agħmel li mhux biss li nfittxu l-ikel li jgħajjixna materjalment, imma li nagħmlu ħilitna biex nersqu spiss lejn l-Ewkaristija, li taħjina spiritwalment. Nitolbu.
Mulej Ġesù, nitolbuk għall-katekumeni li se jirċievu l-Magħmudija fil-Vġili tal-Għid, biex timliehom bl-Ispirtu s-Santu, tnaddafhom minn dnubiethom, u ssaħaħhom biex jgħixu ta’ wlied id-dawl. Nitolbu.
Ejjew issa nagħmlu t-talba personali tagħna.
Tingħata l-Barka Sagramentali: