Home > Arċisqof Charles J. Scicluna > Aħna dixxipli tal-Mulej

Aħna dixxipli tal-Mulej


Il-Ħadd, 16 ta’ Lulju 2017: Quddies minn l-Arċisqof Charles J. Scicluna fil-Festa tal-Madonna tal-Karmnu.

20170716_1807570.jpg

 

L-Omelija tal-Arċisqof Charles J. Scicluna – Fil-Bażilika tal-Madonna tal-Karmnu, Valletta.

Il-Madonna tal-Karmnu, meta nħarsu lejn ix-xbihat tagħha, ngħarfuha minn żewġ elementi importanti. Meta nħarsu lejn xbieha tal-Madonna tal-Karmnu, aħna d-devoti mdorrijin infittxu mill-ewwel il-labtu qaddis li għandha f’idejha. Il-labtu huwa libsa, imma t-tifsira tagħha hija libsa ta’ virtùjiet.

Is-Salm li smajna fil-qari tal-lum jiġbor dawn il-virtùjiet fl-imħabba lejn il-proxxmu u l-biża’ tal-Mulej. Id-domanda tas-Salm 14 hija: “Mulej, min jgħammar fid-dar tiegħek? Min joqgħod fuq il-għolja mqaddsa tiegħek?” (v. 1) Tifhmu mill-ewwel li ntagħżel dan is-salm sabiħ għaliex isemmi l-għolja tal-Mulej, u aħna, li nibqgħu dejjem imsaħħrin bil-ġmiel tal-għolja tal-Karmelu, meta nisimgħu “l-għolja mqaddsa” niftakru f’dik l-għolja sabiħa li t-tarf tagħha jħares fuq il-baħar Mediterran. Nimmaġinawha tħares lejna wkoll, fuq il-belt sabiħa ta’ Ħaifa u fl-istess ħin ixxennaqna għall-ġenna.

Imma r-risposta għal din id-domanda tas-Salm 14 hija domanda konkreta ħafna. Joqgħod fuq l-għolja mqaddsa tal-Mulej, bħalma hi l-għolja tal-Karmelu, “min jgħix bla ħtija u jagħmel it-tajjeb, min jgħid is-sewwa f’qalbu; min ma jqassasx bi lsienu, ma jagħmilx deni lill-ġaru, ma jgħajjarx lill-għajru; min ma jqisx lil bniedem ħażin imma jweġġaħ lil dawk li jibżgħu mill-Mulej” (vv. 2-4). Din hija r-risposta għad-domanda: “Min jgħammar fid-dar tiegħek, Mulej? Min joqgħod fuq l-għolja mqaddsa tiegħek?”

L-Evanġelju jagħtina għolja oħra: l-għolja tal-Kalvarju fejn Ġesù, iben Marija, ġie msallab għalina u għal dnubietna. Minn fuq dik l-għolja Marija ssir l-omm tagħna, l-omm ta’ kull wieħed u waħda minna. Fina hija ssib ukoll il-fedeltà tad-dixxiplu l-maħbub. Fina ssib l-ulied li qed ifittxu omm li tħarishom, imma hi wkoll tfittex fina wlied li nagħtuha ġieħ u fuq kollox nobdu l-aħħar kelmiet tagħha fl-Evanġelju “agħmlu dak li jgħidilkom hu” (Ġw 1, 5)

Aħna l-Insara għandna bżonn iżjed mill-bieraħ u iżjed minn qatt qabel, nirriflettu jekk aħniex dixxipli tal-Mulej.

Id-dixxiplu l-maħbub ħa lil Marija għandu, u b’xi mod, kull min jilbes il-libsa tal-ġmiel tal-Karmelu, li hija libsa ta’ virtù, ta’ mħabba lejn Alla u lejn il-proxxmu, jieħu lil Marija għandu. Għaliex? Għaliex il-Madonna tal-Karmnu – dan huwa t-tieni element li nsibu fix-xbieha tagħha – dejjem iġġorr fi ħdanha lil Ġesù Bambin. Jekk aħna rridu nkunu tassew devoti tagħha, u l-preżenza tagħna hawnhekk hija xhieda ta’ dan, irridu nqisu li fil-qalb tagħna jrid ikun hemm sultan wieħed: Ġesù. Il-Madonna tippreżentahulna bħala l-kelma tal-ħajja, il-kelma ta’ Alla.

Aħna l-Insara għandna bżonn iżjed mill-bieraħ u iżjed minn qatt qabel, nirriflettu jekk aħniex dixxipli tal-Mulej. Bravi biex nagħmlu l-festi, bravi biex niċċelebraw il-kultura Nisranija u Kattolika tagħna, imma domanda li rridu nagħmlu llum hija: aħna dixxipli tal-Mulej? Tgħiduli xi tfisser? Jiena nieħu l-kelma ta’ Ġesù tant bis-serjetà li ngħixha, li l-kelma ta’ Ġesù mhix kelma ta’ ħaddieħor jew daqs ta’ ħaddieħor, imma hija l-kelma ta’ Ġesù. U l-Madonna, li obdiet meta l-anġlu qalilha biex tkun il-qaddejja tal-Mulej u qaltlu “jkun minni skont kelmtek” (Lk 1, 38), tgħallimna mhux biss biex nobdu imma wkoll biex nobdu bil-ferħ u bil-qalb.

Jiena se nagħlaq billi nistedinkom biex nitolbu flimkien is-sekwenza tal-Karmnu biex ukoll nagħtuha qima lill-omm tagħna.

Fjur tal-Karmelu,

dielja bil-frott mgħobbija,

dija tas-sema,

xebba li waħdanija ġieħ omm tiftaħar.

Omm l-aktar ħelwa li ġmielek qatt ma ttabba’

lill-Karmelitani hena uri u mħabba,

kewkba tal-baħar.

✠ Charles J. Scicluna

Arċisqof ta’ Malta

  1. No comments yet.
  1. No trackbacks yet.

Comment

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: