Minn Edwards Tagliaferro
F’Mejju tal-1989 it-tfajjel Matthew Calone spiċċa kors ta’ terapija imħabba kanser. Spiċċa għajjien, wiċċu safrani u bla xagħar. Kien qed joqrob iż-żmien fejn it-tfal Amerikani bħalu jqattgħu minn ġimagħtejn sa erba’ f’xi summer camp. Matthew kien imħasseb u beżgħan biex imur, għax basar li t-tfal l-oħra se joqogħdu jinkuh u jidħku bih. Imma l-ġenituri serrħulu rasu meta qalulu li se jibagħtuh f’summer camp speċjali. Hawn se jsib tfal oħra li bħalu qed jirkupraw minn mard serju. Oħrajn tilfu sieq jew id.
Waqt l-ikel, ħadd mhu se jistagħġeb bik jekk ikollok bżonn tieħu xi mediċina jew xi pinnoli, għax kważi kulħadd se jkollu bżonn jagħmel hekk. L-anqas mhu se jiskanta xi ħadd bik jekk ikollok xi pajp ħiereġ minn imnieħrek. Dan il-Park ġie mibni apposta fil-kampanja u ħdejn għadira kbira (lake). Il-mogħdijiet kollha tajbin għas-siġġu tar-roti. Il-faċilitajiet kollha huma mibnija b’tali mod biex tfal ta’ kull kundizzjoni jkollhom aċċess għalihom. F’nofs il-kamp hemm ukoll helipad fejn ikun jista’ jinżel helicopter f’każ ta’ emerġenza. X’inhu dal-kamp maġiku?
Huwa “The Hole in the Wall Gang Camp.” Din kienet ideja tal-attur famuż Paul Newman. Fl-1982, flimkien ma’ ħabib tiegħu A. E. Hotchner, waqqaf il-kumpanija Newman’s Own Foods biex tbiegħ il-prodotti li beda joħloq Paul. L-ewwel beda b’riċetta oriġinali ta’ salad dressing. Meta din intlaqgħet b’suċċess kbir, kompla b’zalza tal-ispagetti, popcorn u luminata. Paul ried li l-qliegħ kollu jmur għall-karita’. Il-kamp kien se jiġi jiswa 22 miljun dollari. Paul investa l-ewwel 10 miljuni biex ikun jista’ jibda x-xogħol mill-aktar fis. L-aħbar ġriet mal-Amerka kollha, u eluf ta’ nies bdew jorganizzaw maratoni ta’ ġiri, qtugħ ix-xahar, car washes, eċċ. B’hekk, Paul seta’ jtemm dil-opra sabiħa u jinkludi wkoll swimming pool ta’ ġewwa, mgħammra bil-heaters u lifters għal kulħadd.
Tifla bil-krozzi bdiet tibki meta missieru wassalha f’dan il-kamp u kien se jitlaq. Qallha, “Tibża’ xejn, binti. Hawn se tagħmel ħbieb ġodda għax kollha jifhmu int minn x’hiex għaddejja bħalissa.”