Minn Fr Jimmy Bonnici
Fl-Isem tal-Missier u tal-Iben u tal-Ispirtu s-Santu
Hieni l-bniedem li jqiegħed fil-Mulej it-tama tiegħu.
- Niftħu qalbna għall-Kelma t’Alla
F’dak iż-żmien, Ġesù niżel mat-Tnax u waqaf f’wita, flimkien ma’ kotra kbira ta’ dixxipli u folla kbira ta’ nies minn kull naħa tal-Lhudija u Ġerusalemm u mix-xtajta ta’ Tir u Sidon. Ġesù rafa’ għajnejh lejn id-dixxipli tiegħu u qal: “Henjin intom il-foqra, għax tagħkom hija s-Saltna ta’ Alla. Henjin intom li għalissa bil-ġuħ, għax għad tkunu mxebbgħin. Henjin intom li għalissa tibku, għax għad tithennew. Henjin intom meta minħabba Bin il-bniedem in-nies jobogħdukom, jaqtgħukom minn magħhom, jgħajrukom u jwarrbu isimkom bħallikieku kien xi ħaġa ħażina. Dakinhar li jiġrilkom hekk, ifirħu u aqbżu bil-ferħ, għax araw, ħlaskom kbir ikun fis-sema. L-istess għamlu missirijiethom lill-profeti.
Imma ħażin għalikom, intom l-għonja, għax il-faraġ tagħkom ħadtuh. Ħażin għalikom intom li għalissa mxebbgħin, għax għad tkunu bil-ġuħ. Ħażin għalikom intom li għalissa tidħku, għax għad tnewħu u tibku. Ħażin għalikom meta kulħadd isemmikom fil-ġid. Għax l-istess għamlu missirijiethom lill-profeti foloz!”. (Lq 6, 17.20-26)
- Riflessjoni/talba:
i. Ġesù niżel mat-Tnax u waqaf f’wita, flimkien ma’ kotra kbira ta’ dixxipli u folla kbira ta’ nies minn kull naħa tal-Lhudija u Ġerusalemm u mix-xtajta ta’ Tir u Sidon.
Ġesù jinżel fil-wita
fejn il-pass jinħass aktar komdu
u bħal sajjetta fil-bnazzi
jikxef li l-affarijiet mhux kif jidhru:
fil-wita hemm il-kumbattiment tal-ħajja ta’ kuljum
u jekk l-affarijiet m’humiex sew, l-ebda aljenazzjoni m’hi se tfejjaq!
Imma l-kelma tiegħU bħal xafra taqta’ b’żewġt ixfar
tinfed il-qoxra u ddewwi l-ġewwieni.
Irrifletti:
• B’liema mod tħalli l-Kelma t’Alla tinfed il-ġewwieni tiegħek?
ii. Ġesù rafa’ għajnejh lejn id-dixxipli tiegħu u qal: “Henjin intom il-foqra, għax tagħkom hija s-Saltna ta’ Alla. Henjin intom li għalissa bil-ġuħ, għax għad tkunu mxebbgħin. Henjin intom li għalissa tibku, għax għad tithennew. Henjin intom meta minħabba Bin il-bniedem in-nies jobogħdukom, jaqtgħukom minn magħhom, jgħajrukom u jwarrbu isimkom bħallikieku kien xi ħaġa ħażina. Dakinhar li jiġrilkom hekk, ifirħu u aqbżu bil-ferħ, għax araw, ħlaskom kbir ikun fis-sema. L-istess għamlu missirijiethom lill-profeti.
Ħienja intom li qalbkom miftuħa għal Alla
intom li temmnu li jseħħ kulma jintqalilkom min-naħa tal-Mulej (Lq 1,45)
li dixxipli biss ta’ Dak “li jimla b’kull ġid lil min hu bil-ġuħ,
u l-għonja jibgħathom ’il barra b’xejn” (Lq 1, 53).
Ħenjin intom li tieħdu d-deċiżjonijiet
mhux sempliċiment x’jaqbel lilkom
jew x’inhu l-aktar komdu fil-mument
iżda b’ħarsa usa
li tinkludi l-ġid tal-oħrajn
l-ħajja ta’ dejjem
dixxipli tal-Irxoxt.
Irrifletti
• X’jgħinek tieħu deċiżjonijiet sbieħ?
iii. Imma ħażin għalikom, intom l-għonja, għax il-faraġ tagħkom ħadtuh. Ħażin għalikom intom li għalissa mxebbgħin, għax għad tkunu bil-ġuħ. Ħażin għalikom intom li għalissa tidħku, għax għad tnewħu u tibku. Ħażin għalikom meta kulħadd isemmikom fil-ġid. Għax l-istess għamlu missirijiethom lill-profeti foloz!”.
Ħażin għalikom meta l-għeruq tagħkom fid-deheb:
l-umdità mhix ilma ġieri,
is-saħħa tiegħek mhix Alla!
il-ġuħ tal-qalb għall-verità, għas-sabiħa, għat-tajjeb, għall-imħabba
ma jimteliex bil-ħobż
jekk taljena bil-ħmerijiet f’xi ħin il-ħajja tqajmek.
Imxi umli quddiem Alla.
Imxi fil-verità għax il-falz ismu miegħu.
Irrifletti
• Liema huma l-affarijiet li fihom tpoġġi fiduċja żejda?
- Missierna