Qari I
Dan hu raġel qaddis ta’ Alla.
2 Slat 4, 8-11.14-16a
Qari mit-Tieni Ktieb tas-Slaten
Ġurnata waħda Eliżew kien għaddej minn Sunem. Hawn kienet toqgħod mara għanja, u din ġagħlitu joqgħod jiekol għandha; u kull meta kien jgħaddi minn hemm kien idur għal għandha biex jiekol hemm. U hi qalet lil żewġha: “Ara, jien żgura li dan ir-raġel, li jgħaddi għandna sikwit, hu raġel qaddis ta’ Alla. Ħa ntellgħulu għorfa fuq is-setaħ, u nqegħdulu fiha sodda, mejda, siġġu u mnara, u meta jgħaddi għandna, ikun jista’ jidħol fiha”.
U ġurnata waħda wasal hemm, u daħal fl-għorfa, u raqad hemm. U Eliżew qal lil Ġeħażi, il-qaddej tiegħu: “X’nistgħu nagħmlulha lil din il-mara?”. U Ġeħażi wieġbu: “Jaħasra, ma għandhiex tfal, u żewġha xiħ!”. U wieġbu: “Sejħilha”. U dak sejħilha u ġiet fil-bieb. U Eliżew qalilha: “Bħal dan iż-żmien sena, int tkun tħaddan iben”.
Il-Kelma tal-Mulej
R/. Irroddu ħajr lil Alla
Salm Responsorjali
Salm 88 (89), 2-3.16-17.18-19
R/. (2a): It-tjieba tal-Mulej irrid dejjem ngħanni
It-tjieba tal-Mulej irrid dejjem ngħanni;
f’kull żmien ixandar fommi l-fedeltà tiegħek.
Għax jien għedt: “Tjubitek tibqa’ sħiħa għal dejjem;
bħas-smewwiet int wettaqt il-fedeltà tiegħek”. R/.
Hieni l-poplu li jaf jgħajjat bil-ferħ,
li jimxi, Mulej, fid-dawl ta’ wiċċek.
B’ismek jithennew il-jum kollu,
u bil-ġustizzja tiegħek jifirħu. R/.
Għax inti l-foħrija tal-qawwa tagħhom;
għal tjubitek nerfgħu rasna fl-għoli.
Għax il-Mulej it-tarka tagħna,
il-Qaddis ta’ Iżrael is-sultan tagħna. R/.
Qari II
Indfinna miegħu permezz tal-magħmudija, biex ngħixu ħajja ġdida.
Rum 6, 3-4.8-11
Qari mill-Ittra ta’ San Pawl Appostlu lir-Rumani
Ħuti, ma tafux li aħna lkoll li tgħammidna fi Kristu Ġesù, tgħammidna fil-mewt tiegħu? Indfinna miegħu fil-mewt permezz tal-magħmudija sabiex kif Kristu kien imqajjem mill-imwiet permezz tal-qawwa glorjuża tal-Missier, hekk aħna ngħixu ħajja ġdida.
Jekk aħna mitna ma’ Kristu, nemmnu wkoll li għad ngħixu ma’ Kristu. Nafu li Kristu qam mill-imwiet u ma jmutx aktar; il-mewt ma għadhiex taħkem fuqu. Hu li miet, miet darba għal dejjem għad-dnub; u issa li qiegħed jgħix, qiegħed jgħix għal Alla. Hekk ukoll intom għandkom tqisu lilkom infuskom mejtin għad-dnub, iżda ħajjin għal Alla fi Kristu Ġesù.
Il-Kelma tal-Mulej
R/. Irroddu ħajr lil Alla
Akklamazzjoni qabel l-Evanġelju
1 Piet 2, 9
Hallelujah. R/. Hallelujah
Intom ġens maħtur, saċerdozju rjali, nazzjon qaddis,
biex ixxandru t-tifħir ta’ dak li sejħilkom mid-dlam
għad-dawl tiegħu tal-għaġeb.
R/. Hallelujah
Evanġelju
Min ma jerfax salibu, ma jistħoqqlux li jkun miegħi; min jilqa’ lilkom ikun jilqa’ lili.
Mt 10, 37-42
Qari mill-Evanġelju skond San Mattew
F’dak iż-żmien, Ġesù qal lill-appostli tiegħu: “Min iħobb lil missieru jew lil ommu iżjed minni ma jistħoqqlux li jkun miegħi; min iħobb lil ibnu jew lil bintu iżjed minni ma jistħoqqlux li jkun tiegħi. U min ma jerfax salibu u jimxi warajja ma jistħoqqlux li jkun miegħi.
Min isib lil ħajtu, jitlifha; u min jitlef lil ħajtu minħabba fija jsibha. Min jilqa’ lilkom jilqa’ lili, u min jilqa’ lili jkun jilqa’ lil dak li bagħatni. Min jilqa’ profeta għax hu profeta, ħlas ta’ profeta jieħu; u min jilqa’ bniedem ġust għax hu ġust, ħlas ta’ wieħed ġust jieħu. U kull min jagħti mqar tazza ilma frisk lil xi ħadd minn dawn l-iżgħar għax hu dixxiplu, tassew ngħidilkom li ma jitlifx il-ħlas tiegħu”.
Il-Kelma tal-Mulej
R/. Tifħir lilek Kristu
29 ta’ Ġunju
Quddiesa tal-Vġili ta’ San Pietru u San Pawl, Appostli
Solennità
QARI I
Minn dak li għandi se nagħtik, fl-isem ta’ Ġesù, imxi!
Atti 3:1-10
Qari mill-Ktieb tal-Atti tal-Appostli
Pietru u Ġwanni
kienu telgħin lejn it-tempju għat-talb tat-tlieta ta’ wara nofsinhar.
U xi wħud kienu qegħdin iġorru raġel magħtub minn twelidu,
li kienu jqegħduh kuljum ħdejn il-bieb tat-tempju,
li jgħidulu s-Sabiħ,
biex jitlob il-karità
lil dawk li jkunu deħlin fit-tempju.
Xħin ra lil Pietru u lil Ġwanni deħlin fit-tempju talabhom il-karità.
Pietru, flimkien ma’ Ġwanni, tefa’ għajnejh fuqu u qallu:
«Ħares lejna.»
Dak baqa’ jħares lejhom,
jistenna li se jaqla’ xi ħaġa minn għandhom.
Imma Pietru qallu:
«Fidda u deheb ma għandix;
imma dak li għandi se nagħtihulek:
fl-isem ta’ Ġesù Kristu ta’ Nazaret, imxi!»
U qabdu minn idu l-leminija u qajjmu.
Minnufih riġlejh u l-għekiesi tiegħu ħadu saħħithom; u malajr qabeż fuq riġlejh u beda jimxi.
U daħal magħhom fit-tempju,
jimxi u jaqbeż bil-ferħ u jfaħħar lil Alla.
Il-poplu kollu rah miexi u jfaħħar lil Alla; għarfu li hu kien l-istess wieħed li soltu kien jitlob il-karità ħdejn il-Bieb is-Sabiħ tat-tempju. U baqgħu mistagħġba u miblugħa b’dak li ġralu.
Il-Kelma tal-Mulej.
R/. Irroddu ħajr lil Alla.
SALM RESPONSORJALI
Salm 18: 2-5
R/. Mal-art kollha jasal leħinhom.
Is-smewwiet ixandru l-glorja ta’ Alla,
għemil idejh tħabbar il-firxa tas-sema.
Jum lil ieħor jagħti l-aħbar,
lejl lil ieħor iwassal it-tagħrif. R/.
Ma hemmx aħbar u anqas kliem,
ma hemmx leħen li ma jinstemax.
Ma’ l-art kollha jasal leħenhom,
mad-dinja kollha jixtered kliemhom. R/.
QARI II
Alla għażilni sa minn ġuf ommi.
Gal 1: 11-20
Qari mit-Tieni Ittra ta’ San Pawl Appostlu lil Galatin.
Dan ngħarrafkom, ħuti:
l-Evanġelju li ħabbartilkom jien m’huwiex Evanġelju tal-bnedmin. Għaliex jiena mhux mingħand bniedem irċevejtu jew tgħallimtu,
imma kien irrivelat lili minn Ġesù Kristu.
Intom smajtu bl-imġieba tiegħi
meta kont għadni fir-reliġjon Lhudija,
kif kont nippersegwita bis-sħiħ il-Knisja ta’ Alla u nfittex li nħarbatha;
u kemm kont ’il quddiem
fir-reliġjon Lhudija fost il-poplu tiegħi aktar minn sħabi kollha ta’ mpari,
imġennen kif kont għat-tradizzjonijiet ta’ missirijieti. Imma meta Dak li għażilni sa minn ġuf ommi,
u li sejjaħli permezz tal-grazzja tiegħu, għoġbu jirrivelali lil Ibnu
biex inħabbru fost il-ġnus,
minnufih,
bla ma qgħadt infittex li nieħu parir
mingħand bnedmin tad-demm u l-laħam, bla ma tlajt Ġerusalemm
għand dawk li kienu appostli qabli,
jiena mort fl-Għarabja,
u mbagħad erġajt lura lejn Damasku.
Imbagħad, tliet snin wara,
tlajt Ġerusalemm inżur lil Kefa,
u bqajt miegħu ħmistax-il ġurnata; mill-appostli l-oħra ma rajt lil ħadd; iżda rajt lil Ġakbu, ħu l-Mulej.
F’dan li qiegħed niktbilkom,
nixhed quddiem Alla, m’iniex nigdeb.
Il-Kelma tal-Mulej.
R/. Irroddu ħajr lil Alla.
AKKLAMAZZJONI GĦALL-EVANĠELJU
Ġw 21:17
Hallelujah. Hallelujah.
Mulej, Inti taf kollox, Inti taf li nħobbok.
Hallelujah.
EVANĠELJU
Irgħa l-ħrief tiegħi, irgħa n-nagħaġ tiegħi.
Ġw 21:15-19
Qari mill-Evanġelju skont San Ġwann
Wara li kielu xi ħaġa, Ġesù qal lil Xmun Pietru:
«Xmun bin Ġwanni, tħobbni int aktar minn dawn?»
«Iva, Mulej,» wieġbu, «int taf li nħobbok.» Qallu: «Irgħa l-ħrief tiegħi.»
Staqsieh għat-tieni darba:
«Xmun bin Ġwanni, tħobbni int?»
«Iva, Mulej,» wieġbu, «int taf li nħobbok.» Qallu: «Irgħa n-nagħaġ tiegħi.»
Għat-tielet darba staqsieh: «Xmun bin Ġwanni, tħobbni?»
Pietru ħass għafsa ta’ qalb
għax staqsieh għat-tielet darba, ‘Tħobbni?’ u qallu:
«Mulej, int taf kollox, inti taf li nħobbok.» Qallu Ġesù: «Irgħa n-nagħaġ tiegħi.
Tassew tassew ngħidlek, meta kont żagħżugħ,
kont titħażżem waħdek u tmur fejn trid; imma meta tixjieħ,
int tiftaħ idejk u ħaddieħor iħażżmek u jieħdok fejn ma tkunx trid!»
Dan qalu biex ifisser b’liema mewta kien sejjer jagħti glorja lil Alla.
Imbagħad Ġesù ssokta jgħidlu: «Ejja warajja.»
Il-Kelma tal-Mulej
R/. Tifħir lilek Kristu.