IL-PAPA LJUN XIV
ANGELUS
Pjazza San Pietru
Il-Ħadd 8 ta’ Frar, 2026
Għeżież ħuti, il-Ħadd it-tajjeb!
Wara li ħabbar il-Beatitudnijiet, Ġesù jdur lejn dawk li jgħixuhom, jirringrazzja lil dawk li bis-saħħa tagħhom l-art m’għadhiex l-istess u d-dinja m’għadhiex fid-dlam. “Intom il-melħ tal-art (…) Intom id-dawl tad-dinja” (Mt 5,13-14). Infatti, il-ferħ veru jagħti togħma lill-ħajja u joħroġ għad-dawl dak li qabel kien mistur. Dan il-ferħ hu riżultat ta’ stil ta’ ħajja, tal-mod ta’ kif ngħammru fuq l-art u li b’xewqa u b’għażla ngħixu f’komunità. Hi ħajja li tiddi f’Ġesù, it-togħma ġdida tal-ġesti tiegħu u ta’ kliemu. Wara li nkunu ltqajna miegħu, kull ħaġa li titbiegħed mill-faqar tal-ispirtu, mill-ħlewwa u s-sempliċità tal-qalb tiegħu, mill-ġuħ u l-għatx tiegħu għall-ġustizzja, aspetti li jattivaw il-ħniena u l-paċi bħala dinamiki ta’ trasformazzjoni u rikonċiljazzjoni, tidher bla togħma u opaka.
Il-Profeta Iżaija jagħti lista ta’ ġesti konkreti li jiġġieldu l-inġustizzja: aqsam ħobżok ma’ min hu bil-ġuħ, ddaħħal f’darek lill-imsejken bla saqaf, libbes lil min tara għarwien, in-nies ta’ darek ma tinsihomx (cfr Iż 58,7). “Imbagħad – ikompli l-Profeta – ifeġġ bħaż-żerniq id-dawl tiegħek, u malajr tagħlaqlek il-ġerħa tiegħek (v. 8). Min-naħa d-dawl, dak li ma jistax jinħeba għax qawwi daqs ix-xemx li kull filgħodu tkeċċi d-dlam; mill-oħra l-ġerħa li darba kienet taħraq u issa qed tfiq.
Fil-fatt, huwa ta’ wġigħ li titlef it-togħma u tiċħad il-ferħ; madankollu, huwa possibbli li jkollok din il-ferita f’qalbek. Ġesù jwissi li min kien qed jisimgħu biex ma jaqtax qalbu mill-ferħ. Il-melħ li tilef it-togħma tiegħu, jgħid, “ma jibqa’ tajjeb għal xejn ħlief biex jintrema barra u jintrifes min-nies” (Mt 5:13). Kemm nies – forsi ġara dan lilna wkoll – iħossuhom mormija, żbaljati. Ikun qiesu li d-dawl tagħhom mar jistaħba. Però, Ġesù jħabbrilna Alla li qatt mhu se jarmina, Missier li għandu għal qalbu isimna, l-uniċità tagħna. Kull ġerħa, anki jekk fonda, tfiq, meta nilqgħu l-kelma tal-Beatitudnijiet u nerġgħu nibdew interrqu t-triq tal-Evanġelju.
Infatti dawn huma ġesti ta’ ftuħ għall-oħrajn u ta’ attenzjoni, ikebbsu mill-ġdid il-ferħ. Mhemmx għalfejn ngħidu li bis-sempliċità tagħhom huma kontra l-kurrent. Ġesù stess ġarrab it-tentazzjoni fid-deżert, imħajjar jaqbad toroq oħra: biex jafferma l-identità tiegħu, juriha, jitfa’ d-dinja taħt saqajh. Madankollu hu rrifjuta t-toroq li minnhom tintilef it-togħma ġenwina, it-toroq li nsibuhom kull nhar ta’ Ħadd fil-Ħobż miksur: ħajja mogħtija, imħabba bogħod mill-istorbju.
Ħuti, ejjew inħallu l-komunjoni tagħna ma’ Ġesù tmantnina u ddawwalna. B’dal-mod, bla ebda esibizzjonijżmu, inkunu nixbħu l-belt fuq il-quċċata tal-muntanja, li mhux biss tidher, imma tistieden u tilqa’: il-belt ta’ Alla li fiha, fl-aħħar mill-aħħar, kulħadd jixtieq jgħammar u jsib il-paċi. Issa ndawru ħarsitna u talbna lejn Marija, il-Bieb tas-Sema, biex tgħinna nibqgħu dejjem dixxipli ta’ Binha.
Wara l-Angelus
Għeżież ħuti!
Ilbieraħ f’Huércal-Overa, fi Spanja, kien beatifikat don Salvatore Valera Parra, kappillan iddedikat kompletament għall-merħla tiegħu, umli u ħawtiel fil-karità pastorali tiegħu. Jalla l-eżempju ta’ dal-qassis, iċċentrat fuq l-essenzjali, ikun ta’ stimolu għas-saċerdoti tal-lum biex ikunu fidili fil-ħajja ta’ kuljum mgħejxha bis-sempliċità u r-rażna.
B’niket u tħassib sirt naf bl-attakki ta’ dan l-aħħar fuq xi komunitajiet fin-Niġerja, li ħallew bosta telf ta’ ħajjiet umani. Nesprimi l-qrubija u t-talb tiegħi għall-vittmi tal-vjolenza u tat-terroriżmu. Nawgura li l-awtoritajiet kompententi jkomplu jimpenjaw ruħhom b’determinazzjoni biex jiggarantixxu s-sigurtà u l-ħarsien tal-ħajja ta’ kull ċittadin.
Illum, tifkira ta’ Santa Ġiuseppina Bakhita, qed niċċelebraw il-Jum Dinji ta’ talb u riflessjoni kontra t-traffikar tal-persuni. Irrodd ħajr lis-sorijiet u lil dawk kollha impenjati biex jiġġieldu u jeliminaw dawn il-forom ta’ jasar tal-lum. Flimkien magħhom ngħid: il-paċi tibda mid-dinjità!
Niżgura talbi għall-popolazzjonijiet tal-Portugall, tal-Marokk, ta’ Spanja – partikolarment ta’ Grazalema fl-Andalusija – u tal-Italja t’Isfel, speċjalment Niscemi, fi Sqallija -, li ntlaqtu minn għarar u valangi. Inħeġġeġ lill-komunitajiet biex jibqgħu magħqudin u solidali taħt il-protezzjoni materna tal-Verġni Marija.
U issa nagħti merħba lilkom ilkoll, Rumani u pellegrini Taljani u minn diversi pajjiżi. Insellem lill-fidili minn Melilla, Murcia u Malaga, fi Spanja: lil dawk ġejjin mill-Bjelorussja, mil-Litwanja u mil-Latvja; lill-istudenti minn Olivenza, fi Spanja, u lill-adoloxxenti Maltin li se jagħmlu l-Griżma. Insellem ukoll liż-żgħażagħ magħqudin magħna minn tliet oratorji fid-djoċesi ta’ Brescia.
Inkomplu nitolbu għall-paċi. L-istrateġiji tas-setgħa ekonomika u militari – tgħallimna l-istorja – ma jagħtu ebda futur lill-umanità. Il-futur jiddependi mir-rispett u l-fratellanza bejn il-popli.
Nawgura lil kulħadd il-Ħadd it-tajjeb.
Miġjub għall-Malti minn Joe Huber