Il-Ħamis, 20 ta’ Novembru 2014: Anke llum Ġesù jibki meta l-bibien ta’ qlubna, tar-rgħajja tal-Knisja, jingħalqu għas-sorpriżi tiegħu u ma jagħrfux lil dak li jġib il-paċi. Dan kien il-ħsieb ewlieni tal-omelija li l-Papa Franġisku għamel dalgħodu fid-Dar Santa Marta.
Ġesù jibki fuq Ġerusalemm għax ma għarfitx lil dak li jġib il-paċi. Il-Papa kkummenta l-qari tal-Evanġelju tal-ġurnata fejn spjega li l-Mulej jibki minħabba li l-belt il-magħżula, il-belt tal-poplu magħżul, għalqet qalbha. Ma kellhiex ħin biex tiftaħlu l-bieb! Kellha wisq x’tagħmel. Kienet wisq mimlija biha nfisha.
Imma Ġesù jkompli jħabbat il-bibien, kif ħabbat fuq il-bieb ta’ qalb Ġerusalemm: fuq il-bibien ta’ ħutu subien u bniet, fuq il-bibien tagħna, fuq il-bibien ta’ qlubna, fuq il-bibien tal-Knisja tiegħu.
Ġerusalemm kienet tħossha kuntenta, kwieta bil-ħajja tagħha, u ma kellhiex bżonn lill-Mulej: ma kinitx indunat li kellha bżonn is-salvazzjoni. Għalhekk għalqet qalbha għall-Mulej. Il-biki ta’ Ġesù fuq Ġerusalemm, afferma l-Papa, hu l-biki fuq il-Knisja tiegħu, illum, il-biki fuqna.
U għaliex Ġerusalemm ma laqgħetx lill-Mulej? Għax kienet tħossha sodisfatta b’dak li kellha, ma riditx problemi. Imma wkoll… dan jgħidu l-Mulej fl-Evanġelju: ‘Mhux li għaraft imqar int ukoll f’dan il-jum x’inhu ta’ ġid għalik! Ma għaraftx iż-żmien li fih saritlek iż-żjara.’
Ġerusalemm beżgħet miż-żjara tal-Mulej: beżgħet mill-gratwità taż-żjara tal-Mulej. Kienet tħossha ċerta b’dak li hi setgħet tikkontrolla. Aħna lkoll inħossuna fiċ-ċert fl-affarijiet li nistgħu nikkontrollaw… Imma ż-żjara tal-Mulej, is-sorpriżi tiegħu, ma nistgħux nikkontrollawhom.
Minn dan kienet tibża’ Ġerusalemm: li tkun salvata bis-saħħa tas-sorpriżi tal-Mulej. Kienet tibża’ mill-Mulej, mill-Għarus tagħha, mill-Maħbub tagħha. U għalhekk Ġesù jibki.
Meta l-Mulej iżur il-poplu tiegħu, iġibilna l-ferħ, iġibilna l-konverżjoni. U lkoll kemm aħna nibżgħu mhux mill-allegrija, le, imma mill-ferħ li jġibilna l-Mulej, għax dak ma nistgħux nikkontrollawh. Nibżgħu mill-konverżjoni, għax li tikkonverti jfisser li tħalli lill-Mulej imexxik.
Ġerusalemm kienet kwieta, kuntenta, kompla jgħid Franġisku. It-tempju kien għaddej, is-saċerdoti kienu joffru s-sagrifiċċji, in-nies kienet tmur hemm f’pellegrinaġġi, id-dutturi tal-liġi kienu organizzaw kollox. Kollox! Kollox ċar. Il-Kmandamenti kollha ċari… U b’dan kollu, Ġerusalemm kellha qalbha magħluqa. Is-Salib, il-prezz ta’ dak ir-rifjut, osserva l-Papa, jurina l-imħabba ta’ Ġesù, dak li jwasslu biex jibki anke llum, tant drabi, għall-Knisja tiegħu.
Nistaqsi lili nnifsi, illum, aħna l-Insara, li nafu l-fidi, il-katekiżmu, li mmorru l-quddies kull nhar ta’ Ħadd, aħna l-Insara, aħna r-rgħajja, kuntenti bina nfusna? Għax għandna kollox sistemat u f’postu u m’għandniex bżonn żjarat ġodda mill-Mulej… U l-Mulej ikompli jħabbat fuq il-bieb ta’ kull wieħed u waħda minna, fuq il-bieb tal-Knisja, tar-rgħajja tal-Knisja. Iva, il-bieb ta’ qalbna, tal-Knisja, tar-rgħajja mhux jinfetaħ: il-Mulej qed jibki anke llum!
Il-Papa temm bi stedina biex nagħmlu eżami tal-kuxjenza: naħsbu fina nfusna u neżaminaw kif aħna bħalissa quddiem Alla.
Ħajr lill-Kamra tal-Aħbarijiet ta’ Radju Marija, Rabat, Malta