Il-Qassis tan-Noodles.

Kitba ta’ Edward Tagliaferro

Mons. John Romaniello inħatar direttur tal-Catholic Relief Services fl-1956.  Dak iż-żmien madwar mitt elf refuġjati kienu jaħarbu miċ-Ċina komunsita lejn Hong Kong.  Sakemm isibu mpieg, ħafna kienu jfittxu tajers, biċċiet  taż-żingu u kartun minn xi miżbla.  B’dawn kienu jibnu xi forma ta’ kenn.  Mons. Romaniello kellu kamp għalihom, imma kien mimli daqs bajda.  Kien mistagħġeb għal dawn in-nies li jaslu biex jippreferi jgħixu hekk milli mjassrin.  Kellu uġigħ ta’ ras biex jitma’ almenu dawn l-eluf li kienu fil-kamp tiegħu.

Il-gvern Amerikan kien jibgħat mijiet ta’ tunellati ta’ trab tal-ħalib, dqieq  u qamħirrum mitħun għar-rifuġjati.  Imma dawn ma kinux jafhom x’se jaqbdu jagħmlu bihom jew kif isajruhom.  Għalhekk kienu jispiċċaw għand xi ħalliel tal-Black Market li ta’ kull kilo qamħirrun li kien jieħu, kien jagħti ross jew noodles bilkemm biżżejjed għal ikla waħda.  Ir-rifuġjati kienu jirraġunaw li aħjar dan il-ftit  milli xejn.

Jum wieħed il-Monsinjur ra tifla bi xkora żgħira dqieq sejra x’imkien.  Mexa warajha u din daħlet għand wieħed furnar.  Meta ħarġet, saqsiha: “Għaliex tagħti d-dqieq lill-furnar?”  “Biex nibdlu man-noodles.  Għal kull ħames kilo dqieq, itini kilo noodles. Dawn faċli ssajjarhom bi ftit ħaxix.”

“Noodles!  Din hi t-tweġuba għat-talb tiegħi,” qal bejnu u bejn ruħu l-Monsignur.  U b’dan il-ħsieb telaq jiġri għand wieħed li kien jagħmel in-noodles.  Dan iċ-Ċiniż kellu r-riċetta tiegħu.  Mons Romaniello staqsieh: “Jista’ jkun li tagħmel għaġna tan-noodles billi tuża trab tal-ħalib, dqieq u qamħirrum?”  Dak wieġbu: “X’nista’ ngħidlek? Nipprova.”  “Grazzi.  Minn dawn l-ingredjenti nġiblek kemm trid.”

Wara xi seba’ provi, iċ-Ċiniż sab riċetta b’tant dqieq, tant trab tal-ħalib u tant qamħirrum.  Mhux biss beda joħroġ noodles kif suppost, imma t-toma ta’ din it-taħlita kienet aħjar minn dik li kien qed juża’ qabel.  Għalhekk il-Mons ħeġġeġ lir-rifuġjati biex ma jmorrux aktar għand tal-black market imma għand dan il-furnar.

Il-kelma malajr xterdet, u tant kienu qed imorru nies għand iċ-Ċiniż li ma setgħax ilaħħaq.  Allura Romaniello ħaseb biex jakkwista maħżen kbir, u bil-fondi mill-benefatturi xtara tliet magni li jagħmlul n-noodles bl-idejn.   Qabbad nies bla xogħol biex jgħinuh.  Wara ftit kellu bżonn aktar magni u aktar nies biex iħaddmuhom. 

M’għaddewx ħafna snin meta sema’ li kienu vvintaw magni tan-noodles jaħdmu bl-elettriku.

B’hekk dan il-qassis solva l-problema tar-rifuġjati bil-ġuħ.  Minn kull fejn kien jgħaddi, it-tfal kienu jiġru lejh biex jifirħu bih u jgħajtulu “Il-qassis tan-noodles.”