QARI I
Qari mill-Ittra lil-Lhud
Lhud 5:7-9
Meta kien jgħix fuq din l-art, Kristu offra talb u suppliki b’leħen għoli u bid-dmugħ lil dak li seta’ jsalvah mill-mewt. U kien mismugħ minħabba fil-qima tiegħu lejn Alla. Għad li kien Iben, tgħallem minn dak li bata xi tfisser l-ubbidjenza. U, billi laħaq il-perfezzjoni, sar awtur tas-salvazzjoni ta’ dejjem għal kull min jisma’ minnu.
Il-Kelma tal-Mulej.
R/. Inroddu ħajr lil Alla.
SALM RESPONSORJALI
Salm 30, 2-6; 15-16.20
R/. Fit-tjieba tiegħek, Mulej, salvani.
Fik, Mulej, jien nistkenn;
ma jkolli qatt għax nirgħex.
Fil-ġustizzja tiegħek salvani,
agħtini widen u fittex eħlisni.
Kun blata tal-kenn għalija,
fortizza qawwija ta’ salvazzjoni. R/.
Inti l-blata u l-fortizza tiegħi;
f’ġieħ ismek mexxini u wassalni.
Oħroġni mix-xibka li ħbew għalija,
għax inti l-qawwa tiegħi.
F’idejk jien nerħi ruħi;
int teħlisni, Mulej, Alla tas-sewwa. R/.
Imma jien fik nittama,
Mulej; jien ngħidlek: “Alla tiegħi int!”
F’idejk hi xortija,
eħlisni minn id l-għedewwa,
minn id dawk li jeħduha kontrija. R/.
Kemm hu kbir il-ġid tiegħek, Mulej,
li inti rfajt għal min jibża’ minnek,
li int ħejjejt għal min jafda fik,
quddiem il-bnedmin kollha! R/.
AKKLAMAZZJONI GĦALL-EVANĠELJU
Ġw 11:25a.26
Hallelujah. Hallelujah.
Il-Verġni mqaddsa Marija
Sultana tas-sema u Sidt id-dinja,
kienet wieqfa imbikkija ħdejn s-salib ta’ Sidna Ġesù.
Hallelujah.
EVANĠELJU
Ġw 19:25-27
Qari mill-Evanġelju skont San Ġwann
Kien hemm wieqfa ħdejn is-salib ta’ Ġesù, ommu, oħt ommu, Marija ta’ Kleofa u Marija ta’ Magdala. Mela kif Ġesù lemaħ lil ommu u lid-dixxiplu li kien iħobb wieqaf ħdejha, qal lil ommu: “Mara, hemm hu ibnek”. Imbagħad qal lid-dixxiplu: “Hemm hi ommok.” U minn dak il-ħin id-dixxiplu ħadha għandu.
Il-Kelma tal-Mulej
R/. Tifħir lilek Kristu.
Jew
EVANĠELJU
Lq 2:33-35
Qari mill-Evanġelju skont San Luqa
Missieru u ommu baqgħu mistagħġba b’dak li kien qiegħed jingħad fuqu. Xmun berikhom, u qal lil ommu Marija: “Ara, dan se jġib il-waqgħa u l-qawmien ta’ ħafna f’Iżrael; se jkun sinjal li jmeruh, – u inti wkoll, sejf jinfidlek ruħek! – biex jinkixfu l-ħsibijiet moħbija fil-qlub ta’ ħafna.”
Il-Kelma tal-Mulej
R/. Tifħir lilek Kristu.