DISKORS TAL-QDUSIJA THIEGĦU LJUN XIV
LILL-MEMBRI TAL-“WORKING GROUP ON INTERCULTURAL AND INTERRELIGIOUS DIALOGUE”
It-Tnejn, 29 ta’ Settembru, 2025
Insellmilkom ilkoll, l-għodwa t-tajba.
Nibdew bis-Sinjal tas-Salib : Fl-isem tal-Missier, u tal-Iben u tal-Ispirtu s-Santu. Ammen.
Il-paċi magħkom.
Illustri Sinjuri,
Ninsab ferħan nilqa’ lilkom, li fi ħdan il-Parlament Ewropew waqqaftu dan “il-Grupp ta’ Ħidma għad-Djalogu Inter-kulturali u Inter-reliġjuż”. Nifirħilkom għal din l-inizjattiva u nittama li tħalli ħafna frott.
Il-promozzjoni tad-djalogu bejn il-kulturi u r-reliġjonijiet hi l-mira ewlenija tal-politiku Nisrani, u għall-grazzja t’Alla, persuni li taw xhieda tajba ta’ dan mhumiex neqsin.
Li nkunu rġiel u nisa ta’ djalogu jfisser li nibqgħu mwaħħdin sfiq mal-Evanġelju u l-valuri li jitnisslu minnu, waqt li fl-istess ħin inkunu miftuħin, nisimgħu u niddjalogaw ma’ min ġej minn denominazzjonijiet oħra, iffukati dejjem fuq id-dinjità umana u n-natura relazzjonali u komunitarja tiegħu.
Min-natura tiegħu, id-djalogu inter-reliġjuż jagħraf li r-reliġjon għandha valur kemm fuq livell personali u wkoll fl-isfera soċjali. Il-kelma reliġjon minnha nfisha tirreferi għar-rabta tal-element oriġinarju ta’ dak li hu uman. Tabilħaqq, meta hi awtentika u inkulturata, id-dimensjoni reliġjuża taħji bla qies ir-relazzjonijiet inter-personali minbarra li sseddaq il-ħajja komunitarja u tas-soċjetà. U kemm hu importanti llum nemfasizzaw dan il-valur u l-importanza tar-relazzjonijiet umani!
L-istituzzjonijiet ewropej għandhom bżonn nies li jgħixu ħajja ta’ sekulariżmu sân, jiġifieri stil ta’ ħsieb u għemil li jafferma l-valur tar-reliġjon filwaqt li jżommha distinta – mhux mifruda jew f’konfużjoni – mill-qasam politiku. Ta’ min jinnota b’mod partikolari l-eżempji ta’ Robert Schuman, Konrad Adenauer u Alcide de Gasperi.
Għeżież ħbieb, irroddilkom ħajr li żortuni. Irroddilkom ħajr għall-ħidma tagħkom biex tippromwovu d-djalogu bejn il-bnedmin kollha, u nitlob il-barka t’Alla fuqkom u fuq ħidmitkom. Grazzi ħafna!
Miġjub għall-Malti minn Joe Huber