Il-Ħamis, 16 ta’ Jannar 2014: L-iskandli fil-Knisja jsiru għax m’hemmx rapport ħaj ma’ Alla u mal-Kelma tiegħu. Dan affermah il-Papa Franġisku fl-omelija ta’ dalgħodu waqt il-quddiesa li ppresjieda fid-Dar Santa Marta.
Fil-kumment dwar il-qari tal-ġurnata u s-salm responsorjali li jirrakkuntaw it-telfa kbira li l-poplu ta’ Iżrael sofra minn idejn il-Filistej, il-Papa osserva li l-poplu t’Alla, f’dak iż-żmien, kien abbanduna lill-Mulej. Kien jingħad li l-Kelma t’Alla kienet ħaġa rari f’dak iż-żmien. Ix-xwejjaħ saċerdot Eli kien biered u wliedu kienu korrotti, ibeżżgħu lin-nies u kienu jaħqruhom. Biex jiġġieldu kontra l-Filistej, l-Iżraeliti juzaw l-Arka tal-Patt qisha xi ħaġa maġika, ħaġa barranija. U jispiċċaw telliefa, filwaqt li l-għedewwa jeħdulhom l-Arka. M’hemmx fidi vera f’Alla, fil-preżenza reali tiegħu, fil-ħajja.
Dan il-pass tal-Iskrittura jgegħilna naħsbu dwar kif inhu r-rapport tagħna ma’ Alla, mal-Kelma t’Alla. Huwa rapport formali? Hu rapport imbiegħed? imbiegħed? Il-Kelma t’Alla tidħol fi qlubna, għandha dik is-setgħa li tibdlilna qalbna? Għandha dik is-setgħa jew le? Hu rapport formali u kollox sew?
Imma qlubna magħluqin għal dik il-Kelma! Dan igegħilna niftakru f’tant telfiet li ġġarrab il-Knisja, f’tant telfiet għall-poplu t’Alla sempliciment għax ma jħossx lill-Mulej, ma jħallix lill-Mulej ifittxu! U wara t-traġedja, it-talba tkun din: ‘Imma Mulej, x’ġara? Int għamiltna d-disprezz tal-qraba tagħna, il-mogħdija ta’ żmienu, iż-żuffjett ta’ min hu madwarna. Ghamiltna ħrafa tal-bnedmin u meta jarawna, il-popli jxenglu rashom.’
Il-Papa għadda biex jitkellem dwar l-iskandli tal-Knisja u qal: Imma aħna veru nistħu? Tant skandli li ma rridx insemmihom wieħed, wieħed, imma lkoll nafu x’inhuma… il-mistħija tal-Knisja! Imma stħajna minħabba dawk l-iskandli, minħabba dawk it-telfiet imġarrba minħabba saċerdoti, isqfijiet, lajċi?
Il-Kelma t’Alla f’dawk l-iskandli kienet ħaġa rari: f’dawk l-irġiel u n-nisa l-Kelma t’Alla kienet rari! Ma kellhomx rabta ma’ Alla! Kellhom pożizzjoni fil-Knisja, anke waħda komda, imma l-Kelma t’Alla, le! ‘Jiena għandi medalja, jien għandi salib…’ Iva, bħal dawk li kienu jġorru l-Arka! Mingħajr rapport ħaj ma’ Alla u mal-Kelma tiegħu! Tiġini f’moħħi l-Kelma ta’ Gesu’ lil dawk li jagħtu l-iskandli… U hawn l-iskandlu wasal – hija dekadenza tal-poplu t’Alla – sad-dgħufija, sal-korruzzjoni tas-saċerdoti.
Il-Papa temm l-omelija bi ħsieb dwar il-poplu t’Alla: Imsejknin, imseknin! Ma ntuhomx jieklu l-ħobż tal-ħajja. F’dak il-każ ma ntuhomx jieklu l-verità! U minflok, tant drabi ntuhom jieklu ikel avvelenat! ‘Qum Mulej, għax għadek rieqed!’ Din għandha tkun it-talba tagħna! ‘Qum! Tirrifjutaniex għal dejjem! Għaliex qed taħbi wiċċek? Għaliex qed tinsa l-miżerji u l-oppressjoni tagħna?’
Nitolbu lill-Mulej biex ma ninsew qatt il-Kelma t’Alla, li hi ħajja, biex tidħol fi qlubna, u ma ninsew qatt lill-poplu fidil t’Alla li jitlob minna ikel san!
Ħajr lill-Kamra tal-Aħbarijiet ta’ Radju Marija, Rabat, Malta