It-Tnejn, 15 ta’ Settembru 2014: Bħalma mingħajr Marija ma setax ikun hemm Ġesù, l-istess aħna ma nistgħux nimxu ’l quddiem mingħajr il-Knisja. Dan qalu l-Papa dalgħodu waqt li kien qed jippresjedi l-quddiesa fid-Dar Santa Marta, fil-jum li fih il-Knisja tiċċelebra t-tifkira tal-Beata Verġni Addolorata.
Wara li wrietna l-glorja tas-Salib, il-liturġija turina lill-Omm umli u ġentili. Fl-ittra lil-Lhud, Pawlu jagħmel enfasi fuq tliet kelmiet qawwijin. Jgħid li Ġesù tgħallem, obda u sofra. Kien il-maqlub ta’ dak li kien ġara lil missierna Adam li ma riedx jitgħallem dak li kien ordnalu l-Mulej, ma riedx ibati u lanqas jobdi. Iżda Ġesù, minkejja li kien Alla, sar xejn, umilja ruħu u sar qaddej. Din hi l-glorja tas-Salib ta’ Ġesù.
Il-Papa kompla jgħid li Ġesù ġie fid-dinja biex jitgħallem ikun bniedem, u għax kien bniedem, jimxi mal-bnedmin. Ġie fid-dinja biex jobdi, u obda. Imma din l-ubbidjenza tgħallimha mit-tbatija.
Adam ħareġ mill-Ġnien tal-Eden b’wegħda li damet għaddejja sekli sħaħ. Illum, b’din l-ubbidjenza, bil-mod kif xejjen lilu nnifsu, kif umilja ruħu Ġesù, dik il-wegħda saret tama. U l-poplu t’Alla jimxi f’tama ċerta. Anke l-Omm, l-Eva l-ġdida, kif isejħilha Pawlu stess, tieħu sehem f’din it-triq ta’ Binha: tgħallmet, batiet u obdiet. U saret Omm.
L-Evanġelju jurina lil Marija f’riġlejn is-Salib. Ġesù jgħid lil Ġwanni: ‘Hawn hi Ommok.’ Marija, afferma l-Papa, ħadet id-dilka ta’ Omm. U din hi wkoll it-tama tagħna. Aħna m’aħniex orfni, għandna l-Ommijiet: għandna lil Ommna Marija. Imma anke l-Knisja hija Omm u anke l-Knisja għandha d-dilka ta’ Omm meta timxi fl-istess triq ta’ Ġesù u ta’ Marija: it-triq tal-ubbidjenza, it-triq tat-tbatija, u meta jkollha l-atteġġjament li trid titgħallem, dejjem u l-ħin kollu, it-triq tal-Mulej.
Dawn iż-żewġ nisa, Marija u l-Knisja, imexxu ’l quddiem it-tama li hi Kristu, inisslu lil Kristu fina. Mingħajr Marija ma kienx ikun hemm Ġesù Kristu; mingħajr il-Knisja ma nistgħux nimxu ’l quddiem.
Il-Papa kompla jgħid li għandna żewġ nisa u żewġ Ommijiet u ħdejhom hemm ir-ruħ tagħna li, kif kien jgħid il-monaku Iżakk, l-Abbati ta’ Stella, hija femminili u tixbah lil Marija u lill-Knisja.
Illum, aħna u nħarsu lejn din il-mara ħdejn is-Salib, fil-mixja determinata tagħha wara Binha Ġesù fit-tbatija biex titgħallem l-ubbidjenza, aħna u nħarsu lejha, inħarsu lejn il-Knisja u naraw lil Ommna. U aħna nħarsu wkoll lejn ir-ruħ żgħira tagħna, li mhi se tintemm qatt jekk tkompli tkun femminili u qrib ta’ dawn iż-żewġ nisa kbar li jakkumpanjawna tul ħajjitna: Marija u l-Knisja.
U kif mill-Eden missirijietna ħarġu b’wegħda, aħna llum nistgħu nimxu ’l quddiem b’tama: it-tama li ttina Ommna Marija qawwija taħt is-Salib u Ommna l-Knisja ġerarkika.
Ħajr lill-Kamra tal-Aħbarijiet ta’ Radju Marija, Rabat, Malta