Minn Edward Tagliaferro
Fi Spanja jħobbu jirrakuntaw din il-ħrafa:
Kien hemm missier u ibnu ta’ xi għaxar snin li kellhom bżonn jaqsmu minn naħa għal oħra tal-belt tagħhom. Kienu qegħdin imexxu daqsxejn ta’ ħmar. Għalhekk, minn kull fejn bdew għaddejjin, in-nies bdew iħarsu lejhom u jidħku bihom. Xi wħud bdew jgħajtu: “Ara dawn kemm huma boloh; għandhom ħmar bħal dak u qegħdin jimxu. Għax ma jirkbux fuqu?”
Il-missier qal lil ibnu, “Tassew! Ejja nirkbu fuq il-ħmar.” U hekk għamlu. Ma damux mexjin wisq meta n-nies li rawhom bdew igergru: “Ara naqra dawn kemm jaħqru lill-ħmar! Mank rikeb wieħed minnhom biss!”
Il-missier qal lil ibnu: “Aħjar tinżel, għax għad fadlilna triq twila.” Komplew mexjin, imma issa d-diska nbidlet, u z-zekzik issa sar għax il-missier messu jistħi jirkeb hu meta kien għadu fl-aqwa tiegħu, u jħalli naqra ta’ tifel żgħir jimxi.
Għalhekk il-missier niżel minn fuq il-bhima u qal lit-tifel jirkeb hu. Komplew mixjin ftit u ieħor u ltaqgħu ma lablaba oħra li bdew ixenglu rashom u jgħidu: “Dan it-tifel kbir biżżejjed biex jimxi hu. Mela ma jġibx nitfa rispett lejn missieru?” Il-missier ħabat se jitlagħlu San Filep, imma żamm il-kalma u qal lit-tifel, “Inżel minn hemm u nkomplu t-triq li fadal kif bdejniha.”
It-tagħlima hi li f’Demokrazija qatt ma tista’ tikkuntenta lil kulħadd. Imma naħseb hemm tal-anqas tagħlima oħra: Int tgħix skont kif jgħidulek in-nies lablaba u zekzieta, jew skont it-tagħlim li ħadt fil-familja u fl-iskola, u skont kif taħseb int li hi t-triq it-tajba? Veru li kull tant ikollok bżonn parir. Imma dan żgur li int mhux se tieħdu mill-għidut tan-nies imma minn xi ħadd professjonali.