Introduzzjoni eċċellenti għall-Marioloġija Kattolika
Sa mill-bidu nett tal-pontifikat ta’ 27 sena tal-Papa San Ġwanni Pawlu II, waqt l-Udjenzi Ġenerali ta’ bejn l-1995 u l-1997, huwa kien ta 70 katekeżi dwar il-Verġni Mqaddsa Marija. Dawn il-katekeżijiet joffrulna sintesi għanja u aċċessibbli tat-tagħlim tal-Knisja dwar Omm Alla u dwar il-post tagħha fil-misteru ta’ Kristu u tal-Knisja.
Il-Papa beda din is-serje wara li temm sensiela ta’ riflessjonijiet fuq il-Knisja. Huwa stqarr li xtaq idawwar il-ħarsa tal-insara lejn Marija, li hija l-milja perfetta tal-qdusija tal-Knisja u l-mudell tagħha. Din il-perspettiva tibqa’ l-muftieħ biex nifhmu l-katekeżijiet kollha: Marija qatt ma hija ppreżentata bħala figura separata minn Kristu, iżda dejjem bħala dik li twassalna għandu u turina kif għandna nwieġbu għall-grazzja ta’ Alla.
Is-sensiela tista’ tinqasam f’diversi temi ewlenin. L-ewwel katekeżijiet juru lil Marija fl-Istorja tal-Knisja. Fihom il-Papa jfittex l-għeruq tal-missjoni tagħha fl-Iskrittura Mqaddsa, mill-wegħdiet tal-Antik Testment sat-Tħabbira tal-Anġlu u l-Inkarnazzjoni tal-Iben ta’ Alla. Huwa jispjega wkoll id-duttrini fundamentali dwar l-Immakulata Kunċizzjoni, il-Verġinità perpetwa u l-Qdusija singulari tagħha.
Parti importanti mis-sensiel hija ddedikata għall-preżenza ta’ Marija fil-ħajja ta’ Ġesù: it-Twelid tiegħu, il-Preżentazzjoni fit-Tempju, it-Tieġ ta’ Kana, il-ministeru pubbliku, il-Kalvarju u l-Għid. San Ġwanni Pawlu II jenfasizza b’mod partikolari l-għaqda profonda bejn l-Omm u l-Iben fil-pjan tas-salvazzjoni, filwaqt li dejjem iżomm ċar li Kristu huwa l-uniku Feddej u li l-kooperazzjoni ta’ Marija hija kollha dipendenti minnu.
Katekeżijiet oħra jittrattaw ukoll l-Assunzjoni, kif ukoll it-titli marjani bħalma huma “Omm il-Knisja”, “Medjatriċi” u “Reġina tal-Univers”. Il-Papa juri kif dawn it-titli żviluppaw fit-tradizzjoni tal-Knisja u kif għandhom jinftiehmu fid-dawl tal-Vanġelu u tat-tagħlim tal-Konċilju Vatikan II.
L-aħħar parti tas-sensiela hija ddedikata għar-Rwol ta’ Marija fil-Knisja u tinkludi fiha taqsima fuq id-devozzjoni Marjana. Hawnhekk il-Papa jispjega n-natura vera tal-qima lejn Marija, il-valur tat-talb lilha u r-rabta inseparabbli bejn il-venerazzjoni tal-Omm u l-adorazzjoni dovuta biss lil Alla. Għalih, kull devozzjoni awtentika lejn Marija għandha twassal lin-nisrani għal għaqda aktar profonda ma’ Ġesù Kristu u għall-fedeltà akbar lejn il-Knisja.
Dawn is-70 katekeżi huma għalhekk introduzzjoni eċċellenti għall-Marioloġija Kattolika. Huma jgħaqqdu l-Iskrittura, it-Tradizzjoni, it-tagħlim tal-Konċilju Vatikan II u l-esperjenza spiritwali tal-Knisja f’viżjoni waħda. Dawn il-katekeżjiet huma kollha disponibbli bil-Malti fuq is-sit tal-Laikos (https://www.laikos.org/JPII_Madonna_Index.htm) u huma riżorsa prezzjuża kemm għall-formazzjoni personali kif ukoll għall-użu fil-katekeżi, fil-gruppi ta’ talb u fl-istudju teoloġiku.
Meta naqraw dawn il-katekeżi, nindunaw li l-għan ewlieni ta’ San Ġwanni Pawlu II ma kienx biss li jgħallimna dwar Marija, iżda li permezz tagħha jmexxina lejn Kristu. Hekk kif Marija kienet l-ewwel dixxiplu u l-aktar waħda fidila, hija tibqa’ għal kull nisrani mudell ta’ fidi, tama u mħabba.
Hawn taħt tista’ ssib lista tas-suġġetti ta’ kull katekeħi u ma kull waħda ssib ukoll link għal kull traduzzjoni bil-Malti ….
L-Ewwel Parti – Marija fl-Istorja tal-Knisja
1. Il-Preżenza ta’ Marija fl-oriġni tal-Knisja. 06/09/1995.
2. Ir-rwol matern ta’ Marija fl-ewwel sekli. 13/09/1995.
3. Ir-rwol tal-Omm tar-Redentur. 25/10/1995.
4. Marija fl-Iskrittura Mqaddsa u fir-riflessjoni tejoloġika. 08/11/1995.
5. Marija fl-esperjenza spiritwali tal-Knisja. 15/11/1995.
6. L-Influss ta’ Marija fil-ħajja tal-Knisja. 22/11/1995.
7. Marija u l-valur tal-mara. 29/11/1995.
8. Ir-rwol tal-mara fid-dawl ta’ Marija. 06/12/1995.
9. Il-Preżenza ta’ Marija fil-Konċilju Vatikan II. 13/12/1995.
It-Tieni Parti – It-Twemmin tal-Knisja dwar Marija
10. Skop u metodu tal-espożizzjoni tad-duttrina marjana. 03/01/1996.
11. Marija fi prospettiva Trinitarja. 10/01/1996.
12. Marija fil-Protoevanġelju. 24/01/1996.
13. L-Aħbar tal-Maternità Messjanika. 31/01/1996.
14. Il-maternità tiġi minn Alla. 06/03/1996.
15. Nisa mpenjati fil-fidwa tal-poplu. 27/03/1996.
16. In-Nobiltà morali tal-mara. 10/04/1996.
18. Bint Sijon il-ġdida. 01/05/1996.
19. Mimlija bil-grazzja. 08/05/1996.
20. Il-Qdusija perfetta ta’ Marija. 15/05/1996.
21. L-Immakulata Kunċizzjoni. 29/05/1996.
22. Immakulata: mifdija għall-protezzjoni. 05/06/1996.
23. Immakulata: id-definizzjoni dommatika tal-privileġġ. 12/06/1996.
24. Qaddisa tul il-ħajja kollha. 19/06/1996.
25. Dik li emmnet. 03/07/1996.
26. Il-verġinità ta’ Marija, verità ta’ fidi. 10/07/1996.
27. L-Intenzjoni ta’ verġinità. 24/07/1996.
28. Il-valur tal-konċepiment verġinali ta’ Ġesù. 31/07/1996.
29. Marija, mudell ta’ verġinità. 07/08/1996.
30. L-għaqda verġinali ta’ Marija u Ġużeppi. 21/08/1996.
31. Marija dejjem Verġni. 28/08/1996.
32. Il-Qaddejja ubbidjenti tal-Mulej. 04/09/1996.
33. Marija hija Eva l-ġdida. 18/09/1996.
34. Fil-misteru tal-Viżitazzjoni il-preludju tal-missjoni tal-Feddej. 02/10/1996.
35. Fil-Magnificat, Marija tiċċelebra l-opra meraviljuża ta’ Alla. 06/11/1996.
36. Marija fit-twelid ta’ Ġesù. 20/11/1996.
37. It-titolu ta’ Omm Alla. 27/11/1996.
38. Edukatriċi tal-Iben ta’ Alla. 04/12/1996.
39. Il-preżentazzjoni ta’ Ġesù fit-Tempju. 11/12/1996.
40. Il-Profezija ta’ Xmun tassoċja lil Marija mad-destin doloruż tal-Iben. 18/12/1996.
42. Ġesù mitluf u misjub fit-Tempju. 15/01/1997.
43. Marija fil-ħajja moħbija ta’ Ġesù. 29/01/1997.
44. Marija fit-tieġ ta’ Kana. 26/02/1997.
45. F’Kana Marija twassal lil Ġesù biex iwettaq l-ewwel miraklu. 05/03/1997.
46. Is-sehem ta’ Marija fil-ħajja pubblika tal-Iben. 12/03/1997.
47. Ħdejn is-Salib, Marija hija parti mid-dramm tal-Fidwa. 02/04/1997.
48. Marija koperatriċi singolari tal-Fidwa. 09/04/1997.
49. Mara, hemm hu Ibnek. 23/04/1997.
50. Hawn hi Ommok. 07/05/1997.
51. Marija u l-qawmien mill-imwiet ta’ Kristu. 21/05/1997.
52. Marija u d-don tal-Ispirtu s-Santu. 28/05/1997.
53. L-Assunzjoni ta’ Omm Alla. 25/06/1997.
54. L-Assunzjoni ta’ Marija, verità tal-fidi. 02/07/1997.
55. L-Assunzjoni ta’ Marija fit-Tradizzjoni tal-Knisja. 09/07/1997.
56. Is-Sultana tal-Univers. 23/07/1997.
It-Tielet Parti – Ir-Rwol ta’ Marija fil-Knisja
57. Marija, membri sopreminenti tal-Knisja. 30/07/1997.
58. Marija tip u mudell tal-Knisja. 06/08/1997.
59. Marija mudell tal-maternità tal-Knisja. 13/08/1997.
60. Marija mudell tal-verġinità tal-Knisja. 20/08/1997.
61. Marija mudell tal-qdusija tal-Knisja. 03/09/1997.
62. Marija mudell tal-Knisja fil-kult divin. 10/09/1997.
63. Omm il-Knisja. 17/09/1997.
64. L-interċessjoni ċelesti tal-Omma tal-grazzja divina. 24/09/1997.
65. Marija Medjatriċi. 01/10/1997.
66. Il-kult tal-Beata Verġni. 15/10/1997.
67. In-natura tal-kult Marjan. 22/10/1997.
68. Id-devozzjoni Marjana u l-kult tax-xbihat. 29/10/1997.
69. It-talb lil Marija. 05/11/1997.
70. L-Omm tal-għaqda u tat-tama. 12/11/1997.
Aktar katekeżijiet mill-Papa San Ġwanni Pawlu II, tista’ ssibhom fil-Laikos minn din il-paġna … https://www.laikos.org/jpii.htm#kat