30/08/2025: Il-Papa Ljun XIV ħatar lill-Em.T. il-Kardinal Mario Grech, Segretarju Ġenerali tas-Sinodu u Isqof Emeritu ta’ Għawdex, bħala membru tad-Dikasteru għall-Kleru.
Fl-aħħar snin, il-Papa Franġisku kien diġà qiegħed lill-Kardinal Grech bħala membru fil-Kunsill Pontifiċju għall-Promozzjoni tal-Għaqda tal-Insara, fit-Tribunal Suprem tas-Senjatura Appostolika, u fid-Dikasteri tal-Isqfijiet u tal-Kult Divin u d-Dixxiplina tas-Sagramenti.
F’kitba fuq Facebook, id-Djoċesi ta’ Għawdex wiegħdet lill-Kardinal Grech it-talb tagħha fil-ħidma tiegħu għall-ġid tal-Knisja universali.
Id-Dikasteru għall-Kleru hu d-dipartiment fi ħdan il-Kurja Rumana li jsegwi l-ħtiġijiet u l-ministeru pastorali tas-saċerdoti u d-djakni, waqt li joffri l-għajnuna meħtieġa lill-Isqfijiet kif ukoll lis-seminarji.
Artiklu miktub minn Francesco Pio Attard
Sors: www.knisja.mt
Ritratt: www.knisja.mt/ritratti