Ħabiba tiegħi kellha esperjenza qarsa meta kellha interview għal xi mpieg. Meta saqsewha x’kien ix-xogħol tagħha qaltilhom “Omm”. Huma weġbuha: “Jiddispjaċina imma ‘omm’ mhiex imniżżla bħala mpieg. Forsi ‘mara tad-dar’ tkun aktar aċċettabbli.”
Tgħidx kemm irrabjajt għax jien ukoll kont omm full-time. Għalhekk, meta xtaqt napplika għall-kors qasir imniedi mill-kunsill lokali, kont lesta bi tweġiba kif suppost. Kif l-iskrivan saqsieni x’kont nagħmel bala xogħol, jien weġibtu: “Jiena research assistant fl-iżvilupp tat-tfal u relazzjonijiet umani.” L-iskrivan baqa’ b’ħalqu miftuħ iħares lejja. Wara ftit, qalli: “Imma kif tiżvolġi dan ix-xogħol?” Jiena għidtlu: “It-tiftix tiegħi jeħodni kemm barra (xiri u qadi) u kemm fil-laboratorju (l-aktar fil-kċina, imma wkoll fil-kmamar l-oħra kollha tad-dar). Bħalissa qed nipprepara għall-“Masters” u ġa għandi erba’ credits (uliedi – tnejn subien u tnejn bniet).”
“Dan l-impieg hu wieħed mill-aktar li jiħtieġ attenzjoni fost il- Humanities (hawn xi omm li ma taqbilx?) u naħdem 14-il siegħa kuljum (ġieli anki 24 siegħa). Dan l-impieg joffri ħafna sfidi kuljum imma l-ħlas mistħoqq hu biżżejjed is-sodisfazzjoni li joffri, aktar milli l-paga.”
Mill-ewwel ħassejt tbissima sabiħa ta’ rispett minn għand l-iskrivan fil-waqt li ffirmali l-applikazzjoni u faqqa’ fuqha t-timbru tal-kunsill.
Malli ħriġt minn hemm ħassejtni qisni rbaħt il-lotterija. Stajt ġejt imniżżla fil-kotba uffiċjali bħala persuna importanti u indispensabbli għall-Umanita’ – OMM.