Il-Ħamis, 10 ta’ April 2014:Anke llum teżisti d-dittatura tal-ħsieb uniku li toqtol il-libertà tal-popli, il-libertà tan-nies, il-libertà tal-kuxjenzi: jeħtieġ nishru u nitolbu. Dan qalu l-Papa Franġisku waqt il-quddiesa fid-Dar Santa Marta, dalgħodu l-Ħamis tal-ġimgħa li twassalna għal Ħadd il-Palm.
Alla jwiegħed lil Abraham li se jsir missier ta’ bosta ġnus, imma hu u d-dixxendenti tiegħu jeħtiġilhom josservaw l-alleanza mal-Mulej. Il-Papa ħa spunt mill-ewwel qari tal-ġurnata biex jispjega kif il-fariżej kienu magħluqin għall-messaġġ ta’ Ġesù. L-iżball tagħhom, qal Franġisku, kien illi l-kmandamenti firduhom mill-qalb ta’ Alla.
Kienu jaħsbu li kollox kien sew għax josservaw bir-reqqa l-kmandamenti, imma dawn, kompla jgħid, mhumiex liġi bla fejda għax imnisslin minn relazzjoni ta’ mħabba u huma ‘indikazzjonijiet’ biex jgħinuna ma niżbaljawx it-triq li fiha niltaqgħu ma’ Ġesù.
B’hekk, il-fariżej jagħlqu qlubhom u moħħhom għal kull novità, ma jifhmux it-triq tat-tama. Huma jgħixu d-dramm ta’ qalb magħluqa u meta l-qalb tkun magħluqa, afferma l-Papa, din il-qalb tagħlaq ukoll il-moħħ. Meta mbagħad il-qalb u l-moħħ jingħalqu ma jibqax post għal Alla, imma biss għal dak li aħna jidhrilna li għandu jsir.
Iżda, l-kmandamenti jtuna wegħda li tasal għandna permezz tal-profeti. Dawk li għandhom qlubhom u moħħhom magħluqin ma jirnexxilhomx jilqgħu l-‘messaġġ tan-novità’ li ġabilna Ġesù, messaġġ li kien imwiegħed mill-fedeltà ta’ Alla u tal-profeti. Dawn in-nies ma jifhmux. Għandhom ħsieb magħluq li mhux miftuħ għad-djalogu, għall-possibiltà li jista’ jkun hemm xi ħaġa oħra, għall-possibiltà li Alla jkellimna, jgħidilna x’inhi t-triq tiegħu, kif għamel mal-profeti.
Dawk in-nies la semgħu lill-profeti u lanqas jisimgħu lil Ġesù. Din tagħhom ma kinitx sempliċiment ras iebsa. Le, kienet aktar minn hekk: kienet l-idolatrija tal-ħsieb personali. ‘Jien naħseb hekk, hekk għandu jsir u xejn aktar.’ Dawn in-nies kellhom ħsieb uniku u riedu jimponuh fuq il-poplu t’Alla. Għalhekk Ġesù jċanfarhom: ‘Intom tgħabbu fuq spallejn il-poplu tant kmandamenti u intom ma tmissuhomx b’sebgħa wieħed.’ Ġesù jċanfar l-inkoerenza tagħhom.
It-teoloġija ta’ dawn in-nies, osserva l-Papa, issir skjava ta’ dan il-pjan, ta’ dan il-pjan ta’ ħsieb, il-ħsieb uniku. M’hemmx possibiltà ta’ djalogu, m’hemmx possibiltà ta’ ftuħ għan-novità li Alla jwassal permezz tal-profeti. Dawn in-nies qatlu lill-profeti; għalqu l-bieb għall-wegħda t’Alla. U meta fl-istorja tal-umanità jseħħ dan il-fenomenu tal-ħsieb uniku, kemm jiġru diżgrazzji! Matul is-seklu li għadda rajna tant dittaturi ta’ ħsieb uniku, li waslu biex qatlu tant nies. Imma f’dak il-waqt dawn in-nies kienu jħossu li huma l-padruni u ħadd ma seta’ jaħsibha mod ieħor. Hekk kienu jaħsbu.
Imma anke llum, kompla jgħid il-Papa, teżisti l-idolatrija tal-ħsieb uniku. Illum trid taħseb hekk, u jekk ma taħsibx hekk m’intix modern, m’intix miftuħ, jew int xi ħaġa agħar. Tant drabi xi mexxejja jgħidu: ‘Jien qed nitlob l-għajnuna, għajnuna finanzjarja għal dan l-iskop.’ U t-tweġiba tkun: ‘Imma jekk int trid din l-għajnuna trid taħseb hekk u trid tagħmel dil-liġi jew dik… jew l-oħra…’
Anke llum għandna d-dittatura tal-ħsieb wieħed u din id-dittatura hija l-istess bħal ta’ dawn in-nies: jaqbdu l-ġebla biex iħaġġru l-libertà tal-popli, il-libertà tan-nies, il-libertà tal-kuxjenzi, ir-relazzjoni tal-bniedem ma’ Alla. U b’hekk, illum, Ġesù jerġa’ jissallab għal darb’oħra.
Quddiem din id-dittatura, temm il-Papa, l-eżortazzjoni tal-Mulej hija dejjem l-istess: nishru u nitolbu. Ma nkunux boloh, ma nixtrux ħwejjeġ li jfixkluna milli nkunu umli u milli nitolbu, biex il-Mulej itina dejjem il-libertà ta’ qalb miftuħa biex nirċievu l-Kelma tiegħu li hi wegħda, hena u alleanza! U b’din l-alleanza nibqgħu mexjin ‘il quddiem.
Ħajr lill-Kamra tal-Aħbarijiet ta’ Radju Marija, Rabat, Malta