Vanġelu (Mark 9, 38-48): Ġesu lil Ġwanni u ħuh Ġakbu kien isejħilhom boanerges, i.e. ulied il-beraq. Dan għaliex kienu minn ta’ l-ewwel li jaqbdu argument u jisponu n-naħa tagħhom b’mod fanatiku. Ftit ġimgħat oħra nisimgħu kif riedu jkunu fuq il-lemin u x-xellug (post ta’ unur u glorja) tal-Mulej fir-renju l-ġdid. Darb’oħra talbu ‘l Ġesu jibgħat nar mis-sema fuq is-Samaritani li ma laqgħux lil Ġesu. Illum nisimgħu lil Ġwanni jgħid lil Ġesu:
- “Wieħed raġel rajnieh ikeċċi x-xjaten f’ismek, u ridna nżommuh għax mhux wieħed minna.” Qabel ma Ġesu beda l-ħajja pubblika, min kien jipprova jkeċċi x-xjaten kien isejjaħ l-isem ta’ xi ħadd famuż, p.e. Salamun, jew xi anġlu. Issa li Ġesu sar magħruf bdew isejħu ismu. Ġwanni ried li ħadd ħlief l-Appostli ma juża’ isem Ġesu b’dan l-iskop. Għalhekk għamlu li setgħu biex lil dan it-tali jwaqqfuh. Mid-dehra ma rnexxilhomx. Ġesu ta s-setgħa lilhom biss biex ikeċċu x-xjaten. Xorta waħda darba ma rnexxilhomx meta missier ġabilhom ‘l ibnu trux u mutu. Dan ġara għax huma kollha, mhux Pietru biss, kellhom fihom ix-xitan tal-kburija, suppervja u poter. Meta jħallu dax-xitan imexxihom ikunu f’periklu tal-fanatiżmu, i.e. jaħsbu li huma biss kapaċi jagħmlu l-ġid. Dan l-element, meta jkun fi grupp, jinħeba taħt il-kappa taz-zelu, u nsibuh fostna llum. Ġieli nsibu li, meta membri ta’ xi għaqda tal-Knisja jkunu sejrin tajjeb, bil-mod il-mod jibdew iħossu li huma biss qed jagħmlu l-ġid. Hawn jibdew il-piki fanatiċi. Kif qal Ġwanni llum: “Dak m’għandux dritt jagħmel il-ġid bħalna.” Niftakru li “tkeċċi x-xitan” minn xi ħadd ifisser li tagħmillu l-ġid billi toħroġ minn ġo fih dak li jbaxxieh, dak li ma jħallihx jibqa’ uman awtentiku. Mela trid teħilsu mill-egoiżmu, is-suppervja, il-kilba għall-poter u l-flus, u vizzji oħra imnebbħa mill-ispirti ħżiena. Minn flokhom tpoġġi l-imħabba, il-maħfra, servizz għall-proxxmu u sentimenti oħra bħal dawn imnebbħin mill-Ispirtu Qaddis. Hekk, jibda jerġa’ jġib ruħu bħala iben dehen tal-Missier Etern. Alla tana l-qawwa biex nagħmlu dan permezz tal-Kelma Tiegħu, tat-talb – l-aktar dak personali f’xi ħin kwiet – fejn nibnu relazzjoni intima mal-Mulej, u billi nersqu spiss għas-Sagramenti tal-Qrar u Tqarbin. Minn jista’ jagħmel dil-biċċa xogħol? Is-saċerdoti u l-membri tal-għaqdiet biss? Le, imma kull maħluq imwieled bix-xbiha u bid-DNA t’Alla u li jħalli lill-Ispirtu Divin imexxieh.
- “La żżommuhx …..” L-appostli għadhon bl-ideja antika ta’ Messija bħala mexxej potenti. Sabiħ tkun miegħu, u l-għira ma kenitx tħallihom jaċċettaw oħrajn fil-klikka, anki jekk dawn ġejjin jagħmlu l-ġid. Ġesu jwieġeb: “Iżżommux lil min tarawh ikeċċi x-xjaten, anzi ifirħu, għax kull min jagħmel il-ġid hu magħna u mhux se jgħid kontrina.” Aħna “tal-Knisja” nifirħu meta membri oħra fil-Knisja ikun qed jirnexxilhom iressqu ħafna nies lejn Kristu, jew ngħiru għalihom, inzekzku, jekk ma niddubitawx ukoll mill-intenzjoni retta tagħhom? Ġesu jixtieq li l-Knisja tiegħu tkun bħal belt mibnija fuq quċċata, biex il-bnedmin kollha jkunu jistgħu jaraw il-ġid li twettaq, jitgħallmu minnha u jagħmlu bħalha. “Għax min mhux kontra tagħna hu magħna.”
- “Min jagħtikom tazza ilma għax intom tal-Messija…” Illum din hi ħaġa żgħira, imma fi żmien Ġesu u f’pajjiż fejn hemm zoni ta’ deżert, tagħti tazza ilma kienet tfisser li tilqa’ dak li jkun għandek biex jiekol, jixrob, jistrieħ u jħossu protett minn kull inkwiet. Jista’ jkun pagan li qed jilqa’ d-dixxiplu ta’ Ġesu. Dan l-att ta’ mħabba u akkoljenza se jippremjah għax se jservi ta’ bidu għad-djalogu bejnu u bejn id-dixxiplu. Kull djalogu u komunikazzjoni bejn żewġ persuni, Insara u mhumiex, dejjem se jkollu l-frott tiegħu. Dan huwa l-ħlas, il-premju.
- “Min jagħti skandlu liċ-ċkejknin…” mhux biss lit-tfal imma kull min hu vulnerabbli, debboli, ta’ fidi ċkejkna. Hi l-ambizzjoni ta’ min hu ġa dixxiplu ffurmat li ġġib il-firdiet u l-konflitti u li tħawwad u tbiegħed liċ-ċkejknin mill-Mulej. Ħasra li dan insibuh illum fil-Knisja bil-ġirja għall-privileġġi u piki bejn għaqdiet u parroċċi. Dawn jiġu ddettati mis-suppervja u l-kilba għall-poter. Ħafna jitbiegħdu mill-Knisja imħabba dawn l-iskandli, għax jippretendu li l-Insara ffurmati u mpenjati għandhom iġibu ruħhom skond l-Evaġelju. Għalhekk Ġesu preokkupat meta fl-intern tal-Knisja tiegħu jitfaċċa l-iskandlu tal-poter u vanita’ li jieħu post is-servizz ġeneruż, ferrieħi u bla kundizzjoni lejn il-proxxmu – f’kelma waħda: l-umilta’. Min jagħti skandlu jistħoqqlu mgħażżra ta’ ħmar m’għonqu u mitfugħ il-baħar. Il-Lhud kienu jagħmlu hekk lil min ma kienx jistħoqqlu jindifen sew. B’hekk, kienu jemmnu, li ma jkunx jista’ jirxoxta għal ħajja oħra.
- “U jekk idek tkun okkażżjoni ta’ dnub..” Dan ma jfissirx li jekk ma taqtax idek u riġlek barra se tmur l-infern. Il-kelma li juża’ Ġesu għall-infern hi Ġeħenna li kien wied qrib Ġerusalem li kien iservi ta’ miżbla tal-belt. Din kienet tkun dejjem taqbad u tarmi riħa tintenn. Ir-Rabbini kienu jgħallmu li min iġib ruħu ħażin (e.g. jagħti skandlu) ikun qisu qed iwaddab ħajtu f’miżbla tinten. Ġesu llum qed jirreferi għal din l-espressjoni popolari mal-Lhud. Il-Ġeħenna kienet ukoll misħuta mill-profeti għax dak iż-żmien kienu jissagrifikaw lit-tfal lil Molek, alla pagan. Mela Ġesu qed jitkellem fuq min qed jaħli din ħajtu t’issa, meta ma jimxix mat-tagħlim tal-Vanġelu. Ġesu qatt ma semma l-infern ta’ wara l-mewt. Dal-kunċett żviluppa bil-mod il-mod fit-tagħlim Nisrani. Meta Ġesu jsemmi n-nar li jixtieq jitkebbes malajr u kullimkien, qiegħed jitkellem fuq l-imħabba li ġejja mill-Ispirtu s-Santu li, meta niżel għall-ewwel darba fuq l-appostli, ħa x-xejra ta’ ilsna tan-nar.
- “L-id..” tagħmel l-azzjoni. Mela, mhux taqta’ idek trid imma il-ħażen li jsir permezz tagħha: serq, swat, qtil u s-sebgħa li jiġġudika u jikkundanna. “Ir-riġel..” juri d-direzzjoni u l-għażliet żbaljati li tieħu. “L-għajnejn” juru l-pjaċiri illeċiti, il-ħolm ta’ glorja u suċċess, il-kilba għall-flus, u l-għira għal min għandu aktar minnek. (“Għandek għajnejk ikbar minn żaqqek” ngħidu aħna l-Maltin). Mela l-messaġġ tal-lum hu li, jekk ma rridux nispiċċaw naħlu ħajjitna fix-xejn jew f’miżbla tinten, hemm bżonn inrażżnu l-istinti tagħna u nikkontrollaw ruħna f’kollox: sess, ikel, xorb, flus, eċċ, anki jekk quddiem in-nies tad-dinja nidhru “strambi”, mhux moderni jew mhux “tal-life”.
Sors: lachiesa.it/liturgia/omelie/padrefernandoarmellini