Il-Kurċifiss bla idejn

Minn Edward Tagliaferro

1. Fil-knisja dħalt biex nitlob
   Quddiem il-kurċifiss,
   Inżilt ftit għarkupptejja
   Inħares ‘l isfel biss.
   
2. Imbagħad għollejt ftit ħarsti
   Inkellem lill-Mulej ,
   Biex niżżih ħajr u nfaħħru
   Għax tiegħi hu l-Feddej.
   
3. Kien hawn li f’daqqa waħda
   Intbaħt ma nafx minn fejn
   Jew kif din setgħet tiġri –
   Li Kristu bla idejn.
   
4. Forsi xi ħadd kien daħal
   U kissru – hekk jien bsart.
   Għalhekk jien bdejt infittex
   ‘Il hawn u ‘l hinn u fl-art.
   
5. “Idejk,” staqsejt ‘l-Imgħallem,
   “Bl-imsiemer imtaqqbin, –
   Dan kif ma jidhrux aktar,
   Jew forsi ħolma din?”
   
6. Hawnhekk jien rajt ‘l-Imsallab,
   Iħares lejja fiss:
   “Kun af li din mhix ħolma,”
   Hekk qalli l-kurċifiss.
   
7. “Għax minn flok l-idejn tiegħi,
   Minn issa ‘il quddiem,
   INTI SE TKUN IDEJJA
   Li twassal ferħ u sliem.
   
8. Idejk jien irrid nuża,
   Ħa nserraħ lill-mitrugħ;
   Lill-fqir inlibbes, nitma’,
   U nfejjaq lill-muġugħ;
   
9. Nikkonsla lill-imnikket,
   Inqawwi lill-beżgħan,
   Lil ta’ bla dar inkennen,
   L-għajjien intih serħan.”