Il-Ħadd li għadda, meta l-Knisja fl-Italja ċċelebrat il-Festa tal-Magħmudija tal-Mulej, il-Papa Franġisku għammed 16-il tarbija. Taħt l-affresk tal-Kappella Sistina, l-Papa Franġisku ċċelebra r-rigal tal-fidi tal-Mulej lil dawn it-tfal, u qal li huma wkoll protagonisti taċ-ċerimonja, peress li jagħtu xhieda ta’ kif tirċievi l-fidi.
Għalkemm it-tfal kienu kollha siekta waqt li kien qed jitkellem il-Papa, huwa qalilhom “jeħtieġ wieħed biss biex jagħti l-ewwel nota u jibda l-kunċert”. Jekk fil-fatt jibku, kompla l-Papa, “ħalluhom jibku!”. Bl-istess mod, “jekk huma bil-ġuħ, itimgħuhom”. Huma jiddeċiedu f’dan il-jum ta’ festa, hekk kif jippreparaw biex jirċievu d-don tal-fidi.
Fil-fatt, il-Qdusija Tiegħu qalilhom biex iħalluhom ikunu eżempju ta’ fidi għalina lkoll. “Jalla juruna kif nirċievu l-fidi tagħna: b’innoċenza u b’qalb miftuħa”. Imbagħad kompla jgħammed lil kull tifel u tifla u laqa’ lil kull wieħed fil-fidi tiegħu.
Meta indirizza mbagħad lill-parrini li kienu qed jakkumpanjaw lit-tfal u lill-ġenituri tagħhom, il-Papa Franġisku talab li jkunu ta’ għajnuna lit-tfal hekk kif jakkumpanjawhom fit-tkabbir tagħhom, “għax, dan ukoll huwa mod kif tgħinu fil-fidi”. “Grazzi tax-xhieda tagħkom”, żied il-Papa.
Il-Papa ħeġġeġ ukoll lill-familji biex jaraw id-data tal-magħmudija bħala speċi ta’ “birthday”. Huwa l-jum li rċevejna l-fidi, jum li għandu jiġi ċċelebrat, u “għandkom tgħallmu lil uliedhom hekk”, qal il-Papa.
Waqt iċ-ċerimonja, kull missier, wieħed wieħed, ingħata xemgħa biex jixgħel. “Hudu dawn ix-xemgħat id-dar magħkom”, stieden il-Papa. “Jirrappreżenta d-dawl Nisrani, li qatt m’għandu jintefa”, qal il-Papa filwaqt li stieden lill-familji jdura għax-xemgħa fi żmien il-prova.
Fl-aħħarnett, akkumpanjati mill-kliem u l-mużika ta’ ‘O lejl ta’ Skiet’, il-ġenituri u l-parrini rċevew kuruna tar-rużarju u qasmu ftit kelmiet mal-Qdusija Tiegħu, li temm iċ-ċelebrazzjoni billi dar magħhom u bierek lil kull tifel u tifla.
Għal aktar tagħrif idħol fuq is-sit: https://www.vaticannews.va/en/pope/news/2024-01/pope-francis-baptises-babies-sistine-chapel-baptism-lord.html